Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Pagmata!  |  Marso 2014

 ANG HUNAHUNA SA BIBLIYA

Kuwarta

Kuwarta

Kuwarta ba ang hinungdan sa tanang pagkadaotan?

“Ang gugma sa salapi maoy gamot sa tanang matang sa makadaot nga mga butang.”—1 Timoteo 6:10.

ANG GIINGON SA UBANG TAWO

Ang kuwarta maoy hinungdan sa tanang pagkadaotan.

ANG GIINGON SA BIBLIYA

“Ang gugma sa salapi”—dili ang salapi mismo—maoy hinungdan sa “makadaot nga mga butang.” Diha sa Bibliya, ang adunahang si Haring Solomon naghisgot ug tulo ka matang sa makadaot nga mga butang nga sagad mahitabo sa mga tawong mahigugmaon ug kuwarta. Kabalaka: “Ang kadagaya sa dato dili magpakatulog kaniya.” (Ecclesiastes 5:12) Pagkawalay-katagbawan: “Ang mahigugmaon lamang sa salapi dili matagbaw sa salapi, ni sa kinitaan si bisan kinsa nga mahigugmaon sa bahandi.” (Ecclesiastes 5:10) Tentasyon sa paglapas ug balaod: “Siya nga nagadali sa pagbaton ug mga bahandi dili magpabiling inosente.”Proverbio 28:20.

 Unsay kapuslanan sa kuwarta?

“Ang salapi usa ka panalipod.”—Ecclesiastes 7:12.

ANG GIINGON SA UBANG TAWO

Ang kuwarta makahatag ug kasegurohan ug kalipay.

ANG GIINGON SA BIBLIYA

Ang pagtuo nga ang kuwarta makapalit ug kalipay ug kasegurohan maoy bahin sa “malimbongong gahom sa mga bahandi.” (Marcos 4:19) Bisan pa niana, ang salapi makatagana sa tanang panginahanglan. (Ecclesiastes 10:19) Pananglitan, ang kuwarta makapalit ug mga butang nga kinahanglanon sa kinabuhi—sama sa pagkaon ug medisina.2 Tesalonica 3:12.

Ang kuwarta makatabang usab kanimo sa pag-atiman sa imong pamilya. Gani, ang Bibliya nag-ingon: “Kon adunay si bisan kinsa nga wala magtagana alang sa mga iya, ug ilabina alang sa mga sakop sa iyang panimalay, siya naglimod sa pagtuo ug mas daotan pa kay sa tawong walay pagtuo.”1 Timoteo 5:8.

Unsaon nimo paggamit sa kuwarta sa maalamong paagi?

‘Lingkod una ug kuwentaha ang gasto.’Lucas 14:28.

ANG GIINGON SA BIBLIYA

Gamita ang kuwarta sa paagi nga makapahimuot sa Diyos. (Lucas 16:9) Maalamong gamiton ang kuwarta sa balanse ug dili linimbong nga paagi. (Hebreohanon 13:18) Aron dili ka maglisod kay nagkinabuhi nga sobra sa kinitaan, ‘himoa ang imong paagi sa pagkinabuhi nga mahigawas sa gugma sa salapi.’Hebreohanon 13:5.

Bisan tuod ang Bibliya wala mag-ingon nga ang pagpangutang daotan, kini nagpasidaan: “Ang manghulam maulipon sa nagpahulam.” (Panultihon [Proverbio] 22:7, Ang Bag-ong Maayong Balita Biblia) Ayaw pagdali-dalig palit nga wala sa plano kay “ang matag usa nga madalidalion mosangko lamang sa kawalad-on.” (Proverbio 21:5) Hinunoa, ‘paggahin ug kuwarta sumala sa imong kinitaan’ ug pagtigom alang sa kon unsay importante kanimo.1 Corinto 16:2, Ang Bag-ong Maayong Balita Biblia.

Ang Bibliya nagdasig kanato sa ‘pagbatasan sa pagpanghatag.’ (Lucas 6:38) Ang tawo nga nagtinguha sa pagpahimuot sa Diyos angayng magmahinatagon kay “gihigugma sa Diyos ang malipayong maghahatag.” (2 Corinto 9:7) Busa, ‘ayaw kalimot sa pagbuhat ug maayo ug sa pagpaambit sa mga butang ngadto sa uban, kay ang maong mga halad gikahimut-an sa Diyos.’Hebreohanon 13:16.