Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! DISYEMBRE 2013

  ANG HUNAHUNA SA BIBLIYA

Jesus

Jesus

Si Jesus ba ang Diyos?

“Walay tawo nga nakakita sa Diyos sa bisan unsang panahon.”—Juan 1:18.

ANG GIINGON SA MGA TAWO

Daghan ang nagtuo nga si Jesus dili mao ang Diyos. Ang uban usab magpakitag teksto nga pamatuod kuno nga si Jesus katupong sa Diyos.

ANG GIINGON SA BIBLIYA

Ang Bibliya wala mag-ingon nga si Jesus mao ang Labing Gamhanan nga Diyos o nga siya katupong sa Diyos. Sa kasukwahi, ang Bibliya klarong nagtudlo nga si Jesus ubos sa Diyos. Pananglitan, nasulat sa Bibliya nga si Jesus mismo miingon: “Ang Amahan labaw pa kay kanako.” (Juan 14:28) Ang Bibliya usab nag-ingon: “Walay tawo nga nakakita sa Diyos sa bisan unsang panahon.” (Juan 1:18) Dili mahitabo nga si Jesus mao ang Diyos kay daghan ang nakakita kaniya.

Ang unang mga tinun-an ni Jesus wala mag-ingon nga si Jesus ang Diyos. Pananglitan, ang magsusulat sa Ebanghelyo nga si Juan miingon bahin sa iyang gipanulat: “Kini nahisulat aron kamo motuo nga si Jesus mao ang Kristo nga Anak sa Diyos.”Juan 20:31. *

 Kanus-a natawo si Jesus?

“May mga magbalantay . . . nga nagpuyo sa gawas ug nagpadayon sa pagbantay sa ilang mga panon sa kahayopan sa kagabhion.”—Lucas 2:8.

ANG GIINGON SA MGA TAWO

May mga tawo nga magsaulog ug Pasko sa Disyembre 25—nga gituohan sa uban nga maoy petsa sa pagkatawo ni Jesus. Ang uban magsaulog sa adlawng natawhan ni Jesus sa unang bahin sa Enero.

ANG GIINGON SA BIBLIYA

Ang Bibliya wala maghisgot sa petsa sa pagkatawo ni Jesus. Apan, kini nag-ingon nga sa natawo si Jesus, “may mga magbalantay . . . nga nagpuyo sa gawas ug nagpadayon sa pagbantay sa ilang mga panon sa kahayopan sa kagabhion.” (Lucas 2:8) Imposible kaayo nga ipabilin sa mga magbalantay ang ilang mga hayop diha sa gawas sa gabiing dako sa bulan sa Disyembre ug Enero. Ngano?

Ang dapit nga natawhan ni Jesus tugnaw kaayo panahon sa Disyembre ug Enero. Ang Bibliya nag-ingon nga nianang mga bulana ang mga tawo ‘magpangurog . . . tungod sa ulan.’ (Esdras 10:9, 13; Jeremias 36:22) Dili maayo nga nianang bulana ipabilin sa mga magbalantay ang ilang kahayopan diha sa gawas.

Sa namatay si Jesus, tinuod ba nga siya nabanhaw?

“Ang Diyos nagbangon [kang Jesus] gikan sa mga patay.”—Buhat 3:15.

ANG GIINGON SA MGA TAWO

Ang uban nagtuo nga imposibleng mabuhi pag-usab ang patay, lakip kang Jesus.

ANG GIINGON SA BIBLIYA

Gitudloan ni Jesus ang iyang mga tinun-an nga siya “mag-antos sa daghang butang . . . ug pagapatyon, ug sa ikatulo ka adlaw pagabangonon.” (Mateo 16:21) Ang Bibliya nag-ingon nga human si Jesus gipatay ug gibanhaw, siya nagpakita sa kapin sa 500 ka tawo. (1 Corinto 15:6) Kadtong mga nakakita kombinsido gayod nga siya gibanhaw. Sila andam pa ganing mamatay alang niana nga pagtuo!—Buhat 7:51-60; 12:1, 2.

KON NGANONG ANGAY KANG MAHIBALO

Ang Bibliya nagtudlo nga ang kamatayon ug pagkabanhaw ni Jesus maoy nagbukas sa dalan aron ang tanang tawo makabenepisyo sa saad sa Bibliya nga Paraiso sa yuta. (Salmo 37:11, 29; Pinadayag 21:3, 4) Kita dunay paglaom nga makatagamtam ug malipayon, walay kataposang kinabuhi niana nga Paraiso dinhi sa yuta tungod sa gugma nga gipakita ni Jesus ug sa iyang Amahan nga Labing Gamhanan, si Jehova nga Diyos.—Juan 3:16; Roma 6:23.

^ par. 7 Ang Bibliya wala magtudlo nga ang Diyos dunay literal nga asawa nga pinaagi kaniya Siya nakabatog mga anak. Hinunoa, kini nag-ingon nga si Jesus “Anak sa Diyos” kay ang Diyos maoy direktang naglalang kang Jesus, kinsa dunay mga hiyas nga sama sa iyang Amahan.