Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Pagmata!  |  Disyembre 2013

Alibangbang nga Painted Lady—Misteryo Niini Nasulbad

Alibangbang nga Painted Lady—Misteryo Niini Nasulbad

ANG mga taga-Europe dugay nang ginindotan sa guwapog kolor nga painted lady (Vanessa cardui) ug sila nahibulong kon unsay mahitabo niining maong mga alibangbang human sa ting-init. Mangamatay ba sila inig-tingtugnaw? Ang nadiskobrehan sa dili pa dugayng panukiduki talagsaon kaayo. Sila magsugod sa ilang tinuig nga paglalin tali sa amihanang Europe ug Africa.

Ang nakaplagan sa mga tigpanukiduki gibase sa mga signal nga nasagap sa modernong mga radar ug sa mga report sa mga boluntaryo sa tibuok Europe nga naniid sa mga alibangbang. Ang mga resulta nagpakita nga inigkatapos sa ting-init, minilyong painted lady molalin pahabagatan, kadaghanan molupad sa gihabogon nga kapin sa 500 metros—nga dili makita sa tawo. Ang mga alibangbang maghulat ug pabor nga hangin, diin magpautaw-utaw sila niana sa gikusgong 45 kilometros matag oras sa layo nga panaw paingon sa Africa. Ang ilang tinuig nga paglalin, nga may gilay-ong 15,000 kilometros, magsugod sa amihanan nga ingon ka layo sa Arctic ug matapos sa habagatan nga ingon ka layo sa tropikal nga West Africa. Ang ilang biyahe halos doble nianang sa monarch butterfly sa North America. Nagkinahanglag unom ka kaliwatan sa painted lady sa pagkompleto niining idabuwelta nga panaw.

Si Propesor Jane Hill sa University of York, England, nag-ingon: “Ang Painted Lady magsigeg panaw, magsanay ug dayon magpadayon sa pagpanaw.” Tuig-tuig, ang tibuok populasyon sa alibangbang molalin gikan sa amihanang Europe paingon sa Africa, ug balik na pod.

“Kining gigming nga insekto nga motimbang ug halos usa ka gramo nga may utok nga samag gidak-on sa ulo sa dagom ug walay higayon nga makakat-on gikan sa mas gulang, mas eksperyensiyadong mga alibangbang, magsugod sa halayong panaw nga motabok ug mga kontinente,” miingon si Richard Fox, nga maoy nangulo sa pagpanukiduki sa Butterfly Conservation. Siya miingon usab nga kini nga mga alibangbang “gituohan kaniadto nga paliron sa hangin hangtod mangamatay sa grabeng katugnaw sa Britain, nga mao poy mahitabo sa ilang mga kaliwat.” Apan kini nga panukiduki “nagpakita nga ang mga Painted Lady hawod diay kaayong mga biyahedor.”