Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! OKTUBRE 2013

 PANGUNANG TOPIKO

Tulo ka Butang nga Dili Mapalit ug Kuwarta

Tulo ka Butang nga Dili Mapalit ug Kuwarta

DAW makapatingala kaayo kay ang mga tawo bisag nameligrong mawad-ag trabaho, balay, o pensiyon, kadaghanan nagpanikad gihapon sa pagbaton ug bisan unsang butang nga mapalit ug kuwarta.

Kining mga tawhana daling mabiktima sa mga tigpaanunsiyo nga nagsigeg pangdani kanato pinaagig mga paanunsiyo nga kita kinahanglang makabaton ug mas dagkong balay, mas mahalong awto, ug may tatak nga mga sinina. Wala kay kuwarta? Dili na problema—pangutang! Para sa daghan, bahala nag maputos sila sa utang basta dato lang tan-awon.

Pero mogawas ra gyod ang tinuod. “Ang pagpamalit ug mahalong mga butang pinaagig utang aron mahimong dato tan-awon kaamgid sa pagsuyop ug crack cocaine sa pagpagaan sa pamati,” nag-ingon ang librong The Narcissism Epidemic. “Kining duha sa sinugdanan morag gaan sa bulsa ug makapalipay—pero makadiyot lang. Sa kapulihay kini makabuslot ug bulsa ug makapaguol pag-ayo.”

Gipakita sa Bibliya nga dili maalamon “ang mapagawalong pagpasundayag sa mga kahinguhaan sa kinabuhi sa usa.” (1 Juan 2:16) Ang tinuod, ang sobrang pagtinguhag materyal nga mga butang makapalinga kanato sa mas hinungdanong mga butang sa kinabuhi—mga butang nga dili mapalit ug kuwarta. Tagda ang tulo ka pananglitan.

 1. KASUOD SA PAMILYA

Si Brianne, * usa ka tin-edyer sa United States, miingon nga gihatagag mas dakong importansiya sa iyang Papa ang trabaho ug kuwarta. “Nabatonan na namo ang tanan namong gikinahanglan, ug nanobra pa gani,” siya miingon, “pero si Papa pirmeng wala sa balay kay nagsigeg biyahe. Nahibalo ko nga tungod kana sa iyang trabaho, pero duna usab siyay responsabilidad sa iyang pamilya!”

Palandonga: Unsa kahay mahayan sa amahan ni Brianne? Sanglit giuna man sa amahan ang pagpangitag kuwarta, unsay epekto niini sa iyang relasyon sa iyang anak? Unsay gikinahanglan sa iyang pamilya kaniya nga labaw pa sa kuwarta?

Prinsipyo sa Bibliya nga makatabang:

  • “Ang paghigugmag kuwarta maoy hinungdan sa tanang problema. Ang ubang tawo gusto kaayog kuwarta nga tungod niana ilang . . . gihatagag daghang kasakit ang ilang kaugalingon.”—1 Timoteo 6:10, Contemporary English Version.

  • “Mas maayo pang magsud-an lang ug utan uban sa imong mga minahal kay sa magsud-an ug karne pero anaa ang pagdumtanay.”—Proverbio 15:17, Good News Translation.

Ang punto: Dili kuwarta ang makapasuod sa pamilya kondili ang paggahin ug panahon uban kanila, pagpakita kanilag gugma, ug paghatag ug atensiyon.—Colosas 3:18-21.

 2. TINUOD NGA KASEGUROHAN

“Sultihan ko pirme ni Mama nga kinahanglang magminyo kog sapian ug magtuon ug pangabuhian aron duna koy maayong trabaho nga akong kabuhian,” miingon ang 17 anyos nga si Sarah. “Ang pagpangitag kuwarta ang anaa kanunay sa iyang hunahuna.”

Palandonga: Dihang mamalandong sa umaabot, unsang mga panginahanglan ang imong gikabalak-an? Sa unsang paagi ang pagkabalaka sa mga panginahanglan mahimong wala na sa lugar? Unsa untay angayng himoon sa inahan ni Sarah sa pagpakitag mas timbang nga panglantaw sa pinansiyal nga kasegurohan?

Prinsipyo sa Bibliya nga makatabang:

  • “Hunong na kamo sa pagtigom ug mga bahandi alang kaninyo dinhi sa yuta, diin ang tangkob ug taya magakutkot, ug diin ang mga kawatan magalungkab ug magapangawat.”—Mateo 6:19.

  • “Kamo wala masayod kon unsay dangatan sa inyong kinabuhi ugma.”—Santiago 4:14.

Ang punto: Adunay mas labaw pa nga makahatag ug kasegurohan kay sa pagtumpi ug daghang kuwarta. Ang kuwarta makawat—ug kini dili makaayog sakit o makapugong sa kamatayon. (Ecclesiastes 7:12) Sumala sa Bibliya, ang tinuod nga kasegurohan mabatonan pinaagi sa pagbaton ug kahibalo bahin sa Diyos ug sa iyang katuyoan.—Juan 17:3.

 3. PAGKAKONTENTO

“Gimatuto ako sa akong ginikanan sa pagkinabuhing simple,” miingon ang 24 anyos nga si Tanya. “Kami sa akong kaluha nagdako nga malipayon bisag igo-igo rang masaparan ang among mga panginahanglan.”

Palandonga: Ngano kahang lisod magmakontento sa simpleng pagkinabuhi? Kon bahin sa kuwarta, unsay imong gipakitang panig-ingnan ngadto sa imong pamilya?

Prinsipyo sa Bibliya nga makatabang:

  • “Kon kita adunay makaon ug ikabesti, kita magmakontento na niining mga butanga.”—1 Timoteo 6:8.

  • “Malipayon kadtong mahunahunaon sa ilang espirituwal nga panginahanglan.”—Mateo 5:3.

Ang punto: Duna pay mas importante sa kinabuhi kay sa kuwarta ug sa mga butang nga mapalit niini. Gani, ang Bibliya nag-ingon: “Bisag ang usa ka tawo adunay kadagaya ang iyang kinabuhi wala magagikan sa mga butang nga iyang gipanag-iya.” (Lucas 12:15) Ang tinuod nga katagbawan maangkon pinaagi sa pagkahibalo sa tubag sa importanteng mga pangutana sama sa:

  • Nganong ania kita dinhi?

  • Unsay anaa sa umaabot?

  • Sa unsang paagi akong matagan-an ang akong espirituwal nga panginahanglan?

Ang mga Saksi ni Jehova, nga maoy nag-imprenta niini nga magasin, malipay sa pagtabang kanimo sa pagtubag sa maong mga pangutana. Kontaka ang mga Saksi sa inyong lugar o ablihi ang Web site nga jw.org/ceb.

^ par. 8 Ang mga ngalan niini nga artikulo giilisan.

Pagkat-og Dugang

Sa Unsang Paagi Magmalipayon ang Imong Pamilya?

Gusto ni Jehova, nga malipayong Diyos, nga malipay ang mga pamilya. Susiha ang praktikal nga tambag sa Bibliya para sa mga bana, asawa, ginikanan, ug mga anak.

Kon Unsaon Pagkontrol sa Paggasto

Ayaw paghulat hangtod mahutdan kag kuwarta ayha pa mamalandong bahin sa imong batasan sa paggasto. Sayra kon unsaon pagkontrol sa paggasto sa dili pa kini mahimong dakong problema.