Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

PAGMATA! SEPTIYEMBRE 2013

Pagpaniid sa Kalibotan

Pagpaniid sa Kalibotan

Arctic

“Ang gibag-on sa yelo sa ting-init maoy 25 porsiyento na lang kon itandi sa gibag-on niini 30 ka tuig kanhi,” matod pa ni Peter Wadhams, propesor sa ocean physics sa University of Cambridge, Britain. Niadtong 2012, mga 50 ka barko miagi sa Northern Sea Route kay ang baga nga yelo niining dapita nangatunaw na tungod sa global warming o pag-init sa Yuta.

Kalibotan

Ang gatas sa inahan pila ka adlaw human siya manganak nadiskobrehang dunay kapin sa 700 ka klaseng bakterya—mas daghan kay sa gidahom sa mga eksperto. Ang mga researcher padayong nagsusi kon unsay benepisyo niini nga mga bakterya sa panghilis ug imyunidad sa bata.

Britain

Diha sa simulated-driving study nga gihimo sa mga siyentista sa Britain, ilang nasayran nga mas hinay ug reaksiyon ang mga drayber nga gisip-on ug giubo kay sa mga nakainom.

Democratic Republic of Congo

Nasinati karon sa Africa ang giingon sa uban nga “wala pa sukad” mahitabong pagpamatay sa libolibong elepante tuig-tuig tungod lang sa ilang bangkil. Sa usa ka higayon, ubay-ubayng elepante ang gipamusil diha sa ulo, nga daw gipusil sa mga nag-helikopter.

Australia

Katunga sa kagasangan sa Great Barrier Reef nangamatay sulod sa milabayng 27 ka tuig. Ang mga siyentista nag-ingon nga ang kasagarang hinungdan niini mao ang bagyo, pagdagsang sa dap-ag, ug pagpamuti sa kagasangan tungod sa pagtaas sa temperatura sa dagat.