Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! SEPTIYEMBRE 2013

 ANG HUNAHUNA SA BIBLIYA

Pagpakigsekso Una pa Magpakasal

Pagpakigsekso Una pa Magpakasal

Daotan bang makigsekso una pa magpakasal?

“Kay kini mao ang pagbuot sa Diyos, . . . nga ayran ninyo ang pakighilawas.”—1 Tesalonica 4:3.

ANG GIINGON SA MGA TAWO

Sa ubang kultura, wala isipa nga daotan kon magsekso ang lalaki ug babaye nga dili kasado basta anaa na sa hustong edad. Sa ubang dapit, giisip nga dili daotan kon ang batan-ong lalaki ug babaye nga dili kasado maghimog ubang matang sa seksuwal nga mga buhat.

ANG GIINGON SA BIBLIYA

Dunay mga matang sa seksuwal nga relasyon tali sa mga dili kasado nga gitawag sa Bibliya ug “pakighilawas.” Gusto sa Diyos nga ang iyang mga magsisimba maglikay sa pagpakighilawas. (1 Tesalonica 4:3) Ang pagpakighilawas maoy bug-at nga sala sama sa pagpanapaw, espiritismo, paghubog-hubog, pagsimbag idolo, pagpatay, ug pagpangawat.—1 Corinto 6:9, 10; Pinadayag 21:8.

KON NGANONG ANGAY KANG MAHIBALO

Ang usa ka rason mao nga ang Bibliya nagpasidaan nga “hukman sa Diyos ang mga makihilawason.” (Hebreohanon 13:4) Ang laing rason, nga mas importante, mao nga ang atong pagsunod sa mga balaod sa Diyos bahin sa sekso nagpakita nga atong gihigugma si Jehova nga Diyos. (1 Juan 5:3) Sa bahin usab ni Jehova, iyang panalanginan kadtong nagtuman sa iyang mga sugo.—Isaias 48:18.

 Daotan ba kon ang lalaki ug babaye nga dili kasado maghimog bisan unsang matang sa seksuwal nga buhat?

“Ang pakighilawas ug ang tanang matang sa kahugawan o kadalo dili gayod angay hisgotan sa inyong taliwala.”—Efeso 5:3.

ANG GIINGON SA MGA TAWO

Daghan ang nagtuo nga, gawas sa pagpakigsekso, ang ubang seksuwal nga mga buhat tali sa mga dili kasado dili sala.

ANG GIINGON SA BIBLIYA

Kon maghisgot gani ang Bibliya ug daotang seksuwal nga mga buhat, dili lang pakighilawas ang gihisgotan niini kondili seksuwal nga “kahugawan” usab ug “malaw-ayng panggawi.” (2 Corinto 12:21) Dayag nga dunay ubang matang sa seksuwal nga mga buhat nga dulumtanan sa Diyos kon kini himoon niadtong mga dili kasado, bisan pag dili sila magsekso.

Ang Bibliya nagtudlo nga ang pagpakigsekso ug ang ubang matang sa seksuwal nga mga buhat maoy para lang sa lalaki ug babaye nga kasado. Ang Bibliya supak usab sa “mahakogong kaibog sa seksuwal nga gana.” (1 Tesalonica 4:5) Unsay ipasabot niana? Palandonga ang usa ka pananglitan nga aplikado sa lalaki o babaye: Ang usa ka babaye tingali determinado nga dili makigsekso sa iyang trato. Apan siya ug ang iyang trato naghimog ubang matang sa seksuwal nga mga buhat. Sa paghimo niana, ilang gikaibgan o gikahinaman ang butang nga dili para nila. Busa sila sad-an sa “mahakogong kaibog sa seksuwal nga gana.” Kini nga buhat gihukman sa Bibliya.—Efeso 5:3-5.

Sa unsang paagi malikayan nimo ang daotang seksuwal nga mga buhat?

“Kalagiw gikan sa pakighilawas.”—1 Corinto 6:18.

KON NGANONG ANGAY KANG MAHIBALO

Sumala sa Bibliya, kadtong makigsekso nga dili kasado mahimong mawad-an sa ilang suod nga relasyon sa Diyos.—Colosas 3:5, 6.

ANG GIINGON SA BIBLIYA

Ang Bibliya nagtambag sa mga tawo sa ‘pagkalagiw gikan sa pakighilawas.’ (1 Corinto 6:18) Kini nagpasabot nga ang usa kinahanglang magpalayo sa bisan unsa nga makatental kaniya sa pagpakighilawas. (Proverbio 22:3) Pananglitan, aron makapabiling hinlo sa moral, kinahanglang ang usa maglikay sa pagpakigsuod sa mga tawo nga wala magpadapat sa mga prinsipyo sa Diyos bahin sa sekso. Ang Bibliya nagpasidaan: “Siya nga nagalakaw uban sa mga tawong maalamon mahimong maalamon, apan siya nga may pakiglabot sa mga hungog mahisugamak sa kadaot.”—Proverbio 13:20.

Ang pagpasulod ug malaw-ayng mga butang diha sa hunahuna mahimong mosangpot usab ug daotang seksuwal nga mga buhat. (Roma 8:5, 6) Busa, maayong likayan ang mga musika, video, basahon, ug bisan unsa nga nagpasundayag o nagpasiugdag seksuwal nga mga buhat nga dulumtanan sa Diyos.—Salmo 101:3.

Pagkat-og Dugang

Husto Bang Mag-ipon nga Walay Kasal?

Sayra kon unsay giingon sa Bibliya bahin sa gugma, pakigsekso ug pag-ipon.