Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! SEPTIYEMBRE 2013

 INTERBIYO | CÉLINE GRANOLLERAS

Usa ka Espesyalista sa Kidney Nagpatin-aw sa Iyang Pagtuo

Usa ka Espesyalista sa Kidney Nagpatin-aw sa Iyang Pagtuo

Si Dr. Céline Granolleras espesyalista sa kidney sa France. Kapin sa 20 ka tuig sukad nahimo siyang doktor, siya nakombinsir nga dunay Maglalalang nga nahingawa kanato. Giinterbiyo siya sa Pagmata! bahin sa iyang trabaho ug sa iyang pagtuo.

Estoryahi mi bahin sa imong pagkabata.

Sa nag-edad kog nuybe, ang akong pamilya mibalhin sa France gikan sa Spain. Katoliko ang akong ginikanan, apan pag-edad nakog 16 dili na ko motuog Diyos. Para nako, ang relihiyon dili importante sa kinabuhi. Kon dunay mangutana kon sa unsang paagi mitungha ang kinabuhi kon walay Diyos, motubag ko, “Dili pa kana matubag sa mga siyentista karon, pero moabot ra ang panahon nga matubag nila kana.”

Nganong nag-espesyalista man ka sa kidney?

Nagtungha ko sa eskuylahan sa medisina sa Montpellier, France. Usa ka propesor didto nakig-estorya nako bahin sa pagtrabaho diha sa nephrology, usa ka natad sa medisina maylabot sa kidney. Nalangkit niana nga trabaho ang pag-research ug pag-atimag mga pasyente. Mao kanay akong gusto. Sa 1990, usa ko sa nag-research labot sa paggamit ug recombinant erythropoietin (EPO) sa pagmaniobra sa produksiyon sa pulang mga selula sa dugo diha sa atong mga bukog. Medyo bag-o pa kini nga natad sa research niadtong panahona.

Nganong nakahunahuna man ka bahin sa Diyos?

Niadtong 1979, ang akong bana nga si Floréal nagsugod pagtuon sa Bibliya uban sa mga Saksi ni Jehova. Pero ako dili interesado. Bata pa ko nga nawad-ag gana sa relihiyon. Bisan pa niana, ang akong bana ug mga anak nahimong mga Saksi, ug sa ulahi halos tanan namong mga higala mga Saksi. Usa kanila, si Patricia,  nagdasig kanako sa pag-ampo. “Kon walay Diyos, walay mawala nimo,” siya miingon. “Pero kon dunay Diyos, makita nimo kon unsay mahitabo.” Katuigan sa ulahi, nagsugod ko sa pagpamalandong bahin sa kahulogan sa kinabuhi, ug nahinumdom ko sa gisulti ni Patricia. Nagsugod ko sa pag-ampo aron mangayog katin-awan.

Nganong nakapamalandong ka sa kahulogan sa kinabuhi?

Dihang giatake sa mga terorista ang World Trade Center sa New York, nakapangutana ko kon nganong kaylap kaayo ang pagkadaotan. Naghunahuna ko: ‘Ang mga relihiyon nga ekstremista nagpameligro sa atong umaabot. Pero ang among mga higala nga mga Saksi ni Jehova makigdaiton. Dili sila mga ekstremista. Nagkinabuhi sila subay sa Bibliya. Maayo tingali nga susihon nako ang Bibliya.’ Busa nagsugod ko sa pagbasa niini.

Ingong doktor, naglisod ka ba sa pagtuo ug Maglalalang?

Wala. Nakadayeg kaayo ko sa talagsaong disenyo sa atong lawas. Pananglitan, kahibulongan kaayo ang paagi sa pagkontrol sa kidney sa gidaghanon sa pula nga mga selula sa atong dugo.

Nganong nakasulti ka niana?

Nakaamgo ko nga Diyos lang ang makadisenyo niining maayo kaayo nga sistema

Abi god nimo, ang pula nga mga selula sa dugo maoy tigdalag oksiheno. Kon mawad-an kag daghang dugo o moadto sa habog kaayong dapit, ang imong lawas mawad-ag oksiheno. Ang atong kidney dunay mga oxygen sensor. Kon makamatikod kini nga kulag oksiheno ang dugo, palihokon niini ang kidney sa paggamag EPO, ug modaghan ug libolibo ka pilo ang EPO diha sa dugo. Palihokon sa EPO ang bone marrow sa paggamag dugang pula nga mga selula, nga maoy magdalag dugang oksiheno. Katingalahan kaayo kini! Ugaling lang, miabot pag napulo ka tuig ang akong pagtuon niini nga proseso ayha ko nakaamgo nga Diyos lang ang makadisenyo niining maayo kaayo nga sistema.

Unsay imong impresyon sa Bibliya?

Daghan kog nabasa nga mga libro sa kasaysayan ug popular nga mga nobela, apan nakita dayon nako nga lahi ang Bibliya. Ang mga tambag niini praktikal kaayo maong nakaingon ko nga kini gikan sa usa nga labaw kay sa tawo. Ang personalidad ni Jesus nakapainteres nako. Tinuod diay nga nabuhi siya dinhi sa yuta kaniadto. Siya dunay pagbati, ug siya dunay mga higala. Kay dili ko gustong mogamit sa mga publikasyon sa mga Saksi ni Jehova, nanukiduki ko sa mga ensiklopedia ug ubang reperensiya kon duna koy dili masabtan.

Unsay imong gipanukiduki?

Nanukiduki ko sa mga libro sa kasaysayan . . . Sa kataposan, nakaingon ko nga kini nga tagna sa Bibliya natuman sa husto gyod nga panahon

Usa sa nakapainteres nako mao ang paagi sa pagtagna sa Bibliya sa tuig sa pagbawtismo kang Jesus. Gipakita niini ang eksaktong lak-ang sa panahon tali sa ika-20 nga tuig sa pagmando ni Artaxerxes nga hari sa Persia ug sa tuig nga ipadayag ni Jesus ang iyang kaugalingon ingong Mesiyas. * Naanad ko sa pagpanukiduki kay bahin kana sa akong trabaho. Busa nanukiduki ko sa mga libro sa kasaysayan sa pagtino sa petsa sa paghari ni Artaxerxes ug sa petsa sa ministeryo ni Jesus. Sa kataposan, nakaingon ko nga kini nga tagna sa Bibliya natuman sa husto gyod nga panahon ug nga kini inspirado gayod sa Diyos.

^ par. 19 Tan-awa ang librong Unsay Tinuod nga Gitudlo sa Bibliya? nga gipatik sa mga Saksi ni Jehova, panid 197-199.