Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

PAGMATA! AGOSTO 2013

 TABANG ALANG SA PAMILYA | PAGMATUTO UG MGA ANAK

Kon ang Imong Anak Magsamad sa Iyang Lawas

Kon ang Imong Anak Magsamad sa Iyang Lawas

ANG PROBLEMA

Imong nahibaloan nga ang imong anak tigsamad sa iyang lawas. * Mangutana ka, ‘Nganong gihimo niya kini? Maghikog ba siya?’

Lagmit dili. Pero nagkinahanglan siyag tabang. Unsaon nimo siya pagtabang? Una, sayra kon unsay hinungdan sa iyang makapabalaka nga buhat.

MGA HINUNGDAN

Nagsundog lang ba siya sa uban? Tinuod, dunay mga batan-on nga magsamad sa lawas kay nagsundog-sundog sila sa uban. Bisag mao kanay ilang rason, dili kana normal nga buhat. Ngano? Ang tigsamad ug lawas sagad mohimo niini sa tago ug maulaw sa iyang buhat. “Dili ko gustong may mahibalo sa akong ginahimo,” matod pa sa 20 anyos nga si Celia. * “Maayo kaayo kong motago sa akong mga ulat.”

Gusto lang ba siyag atensiyon? Tingali ingon niana ang uban. Pero ang mga tigsamad ug lawas nga gihisgotan niini nga artikulo sagad magtago-tago sa paghimo niini, ug dili nila ipasaya-saya ang ilang mga samad ug bun-og sa pagpakuhag atensiyon. Bisan pa niana, ang usa ka tigsamad ug lawas kanhi nag-ingon nga maayo untag dihay nakamatikod sa iyang mga samad aron ang iyang buhat madayag ug siya matabangan dayon.

Kon mao, nganong dunay magsamad sa ilang lawas? Ang mga hinungdan niini tulukibon kaayo, apan sa pagkatinuod ang batan-on sagad dunay gibating emosyonal nga kasakit nga maglisod siya pagsulti. Diha sa librong Cutting, ang espesyalista sa mental health nga si Steven Levenkron miingon nga ang tigsamad ug lawas “nagtuo nga ang pisikal nga kasakit makatambal sa emosyonal nga kasakit.”

Ang tigsamad sa lawas sagad dunay gibating emosyonal nga kasakit nga maglisod siya pagsulti

Imo bang gibasol ang imong kaugalingon? Imbes maghunahuna nga nagkulang ka ingong ginikanan nga tungod niini nagsamad ang imong anak sa iyang lawas, hatagig pagtagad kon unsay maayo nimong himoon aron dili na siya magsamad sa iyang lawas.

 ANG IMONG HIMOON

Dasiga ang imong anak sa pagsulti sa iyang problema. Aniay mga sugyot nga makatabang.

Hupaya siya. Kon ang imong anak motug-an nga ginasamaran niya ang iyang lawas, ayaw ipakita nga nakuratan o nakuyawan ka. Hinunoa, sulti nga kalmado ug sa paagi nga makapahupay.—Prinsipyo sa Bibliya: 1 Tesalonica 5:14.

Pangutana sa paagi nga dili siya mahadlok. Pananglitan, mahimong moingon ka: “Nahibalo ko nga usahay dili ka ganahan sa imong kaugalingon. Unsa man gyoy nakapaguol nimo?” o “Unsay akong ikatabang dihang mabalaka o maguol ka?” o “Unsay imong gusto nga akong himoon aron magkasuod pa gyod ta?” Pamatia siya ug ayaw pagsalga.—Prinsipyo sa Bibliya: Santiago 1:19.

Tabangi siya nga makita niya ang iyang maayong mga hiyas. Sanglit ang makita sa tigsamad sa lawas mao lang ang iyang mga kapakyasan, maayong ipakita sa imong anak nga siya may maayong mga hiyas. Mahimo nga imong ipasulat kaniya bisag tulo lang ka butang nga iyang ganahan sa iyang kaugalingon. Si Briana miingon: “Sa gisulat nako ang akong maayong mga hiyas, akong nakita nga duna pod diay maayo sa akong kaugalingon.” *

Dasiga ang imong anak sa pag-ampo kang Jehova nga Diyos. Ang Bibliya nag-ingon: “Itugyan kaniya ang tanan ninyong mga kabalaka, kay siya may kahingawa kaninyo.” (1 Pedro 5:7) Ang 17 anyos nga si Lorena miingon: “Akong isulti kang Jehova nga Diyos ang akong pagbati ilabina kon matental ko sa pagsamad sa akong lawas. Kini nakatabang nako sa pagpaningkamot ug maayo sa paghunong niini nga buhat.”—Prinsipyo sa Bibliya: 1 Tesalonica 5:17.

^ par. 4 Gawas sa pagsamad, sakiton sa uban ang ilang lawas pinaagi sa pagbun-og, pagbunal, o uban pa.

^ par. 7 Ang mga ngalan niini nga artikulo giilisan.

^ par. 15 Sagad, ang pagsamad sa lawas simtoma sa depresyon o laing sakit. Kon ingon niini ang imong anak, tingali maayong ipakonsulta siyag doktor. Ang Pagmata! wala magduso ug bisan unsang pamaagi sa pagpanambal. Apan kinahanglang paneguroon sa mga Kristohanon nga ang pamaagi sa pagtambal nga ilang gamiton dili supak sa mga prinsipyo sa Bibliya.

Pagkat-og Dugang

MGA BATAN-ON NANGUTANA

Nganong Magsamad Ko sa Akong Lawas?

Ang pagsamad sa lawas problema sa daghang batan-on. Kon ginahimo nimo kini, sa unsang paagi makapangayo kag tabang?