Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! AGOSTO 2013

 INTERBIYO | IRÈNE HOF LAURENCEAU

Usa ka Orthopedic Surgeon Nagpatin-aw sa Iyang Pagtuo

Usa ka Orthopedic Surgeon Nagpatin-aw sa Iyang Pagtuo

Si Dr. Irène Hof Laurenceau maoy usa ka orthopedic surgeon sa Switzerland. Kaniadto dili siya motuo nga dunay Diyos. Pero sa ulahi siya nakombinsir nga dunay Diyos ug nga Siya ang Maglalalang sa kinabuhi. Giinterbiyo siya sa Pagmata! bahin sa iyang trabaho ug sa iyang pagtuo.

Unsay nakapainteres nimo sa siyensiya?

Sa bata pa ko, malingaw kaayo ko sa mga mananap ug mga tanom. Nagdako ko sa Richterswil, usa ka nindot nga baryo sa Lake Zurich. Dalhon ko sa akong ginikanan ug mga magulang sa paglakaw-lakaw ug estoryahan ko nila bahin sa mga mananap ug tanom nga among makita sa dalan.

Nganong nagtuon ka man ug orthopedic surgery?

Ang akong amahan nakatrabaho ingong atendant sa operating room sa usa ka ospital. Tungod sa iyang makita, maikagon kaayo siyang maghisgot bahin sa proseso sa pag-opera. Nainteres ko sa iyang kadasig mao nga akong gipili nga propesyon ang natad sa surgery. Ang orthopedic surgery maoy akong giespesyalisar kay interesado ko sa mekanikal nga bahin niini. Ang mga orthopedic surgeon kinahanglang maghunahuna samag inhenyero aron maka-repair ug mga bukog, kaunoran, ug tendon nga maoy makapalihok-lihok nato.

Labaw sa tanan, kon makita nako nga miarang-arang na ang akong pasyente, malipay kaayo ko. Gusto kong magtrabaho uban sa mga tawo.

Nganong dili ka man motuo ug Diyos sa una?

Ang akong pagduhaduha nagsugod sa bata pa ko tungod sa duha ka rason. Una, akong nadiskobrehan nga ang ubang magtutudlo sa simbahan mga imoral, ug natugaw kaayo ko niini. Ikaduha, ang akong mga titser sa biology nagtuo ug ebolusyon—pagtulon-an nga sa ulahi akong gidawat, ilabina sa mieskuyla na ko sa kolehiyo.

Nganong mituo ka man ug ebolusyon?

Mituo ko sa akong mga propesor. Nagtuo sab ko nga ang kaamgiran sa lawas sa pipila ka  matang sa mananap nagpakita nga usa ray ilang gigikanan ug nagsuportar sa ideya nga ang genetic mutation mopatunghag bag-ong matang sa espisye.

Nganong nausab ang imong hunahuna?

Gidapit ko sa akong higala sa tigom sa mga Saksi ni Jehova. Nakadayeg ko sa mahigalaong mga membro sa kongregasyon ug sa mga pakigpulong kay daghan kag makat-onan. Sa ulahi, usa ka buotang babaye sa maong kongregasyon miduaw nako ug gipangutana nako siya, “Unsaon nako pagtino nga tinuod ang Bibliya?”

Gipakita niya kanako ang mga tagna sa Bibliya bahin sa daghang hitabo nga nagtumong sa atong panahon. Usa ka pananglitan niana mao ang tagna ni Jesus nga sa kataposang mga adlaw niining presente nga kalibotan ang mga nasod maggubatay, may mahitabong “dagkong mga linog,” ug daghang “kamatay ug mga kanihit sa pagkaon.” * Iyang gihisgotan usab ang mga tagna bahin sa pagkadaot sa moral sa mga tawo ug pagkaylap sa kahakog ug ubang pagkadaotan nga komon kaayo sa atong panahon. * Wala madugay, nagsugod ko sa pagtuon sa Bibliya ug nakombinsir nga nangatuman gayod ang tanang tagna niini. Nagsugod sab ko sa pagsusi sa akong panglantaw bahin sa sinugdanan sa kinabuhi.

Ang imo bang pag-research sa medisina nakatabang nimo sa pagtugkad sa sinugdanan sa kinabuhi?

Oo. Sa nagsugod ko pagtuon sa Bibliya, nag-research ko bahin sa pag-opera sa tuhod. Sugod sa ulahing bahin sa katuigan sa 1960, nagkatin-aw ang pagsabot sa mga siyentista bahin sa komplikadong mekanismo sa tuhod. Ilang nadiskobrehan nga ang atong tuhod dili sama sa bisagra nga mapiko-piko sa usa lang ka direksiyon. Hinunoa kini malihok-lihok sa lainlaing anggulo mao nga kita makahimo sa paglakaw, pagsayaw, pag-skate ug uban pa.

Sa mga 40 ka tuig, ang mga siyentista nagsulay pagdisenyo ug artipisyal nga tuhod. Apan ang tuhod sa tawo lisod sundogon. Gawas pa, kon itandi sa atong tuhod, ang artipisyal nga tuhod dili modurar ug dugay. Bisan pa sa bag-ong mga materyales nga mabatonan, ang mga siyentista malipay na kon ang ilang mga produkto moabot ug 20 ka tuig. Siyempre, ang atong tuhod gilangkoban ug buhing mga selula nga kanunayng nagabag-o. Para nako, ang tuhod nagpamatuod nga kini wala mitungha pinaagig ebolusyon kondili pinaagi sa kaalam sa Diyos.

Unsay imong ikasulti bahin sa mutation ug sa kaamgiran sa lawas sa pipila ka mananap?

Kana nga kaamgiran nagpamatuod nga usa ra ang Tigdisenyo. Dugang pa, ang mutation dili makapauswag sa disenyo sa buhing mga organismo, nga mahimong mas taas nga matang sa espisye. Hinunoa, ang mutation daw makadaot sa genes. Siyempre, posible nga ang usa ka aksidente makahatag ug benepisyo—sama pananglitan sa usa ka tren nga mabangga sa taytayan ug makaguba niini, busa ang siyudad napanalipdan batok sa mga sundalo nga moatake. Pero kana nga aksidente wala makapauswag sa siyudad. Sa susama, ang mutation dili makapauswag sa mga organismo. Ug dili gayod kini makapatunghag maayo kaayong pagkadisenyong tuhod sa tawo—ug sa uban pang parte sa lawas sa tawo.

Ang mutation dili gayod makapatunghag maayo kaayong pagkadisenyong butang, sama sa tuhod sa tawo

Nganong nahimo kang Saksi ni Jehova?

Sa gipadapat nako ang mga prinsipyo sa Bibliya, miuswag pag-ayo ang kalidad sa akong kinabuhi. Dugang pa, niadtong 2003, mitambong kog internasyonal nga kombensiyon sa mga Saksi ni Jehova ug nakakita sa ilang talagsaong panaghiusa nga samag pamilya, bisan taliwala sa mga delegado nga mao pay pagkaila. Nagpakita silag gugma sa usag usa, ug gusto ko nga mahimong bahin niana.