Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

PAGMATA! AGOSTO 2013

 ANG HUNAHUNA SA BIBLIYA

Alkoholikong Ilimnon

Alkoholikong Ilimnon

Daotan ba ang pag-inom ug alkoholikong ilimnon?

“Bino nga makapalipay kanato, lana sa olibo nga makapasadya kanato, ug tinapay nga makapabaskog kanato.”Salmo 104:15, “Good News Translation.”

ANG GIINGON SA MGA TAWO

Sa daghang panimalay, duna gayoy alkoholikong ilimnon halos matag kaon. Sa ubang panimalay, kini gidili. Nganong lainlaig panglantaw ang mga tawo? Tungod sa lainlaing rason, sama sa kultura, panglawas, ug relihiyon.

ANG GIINGON SA BIBLIYA

Gidili sa Bibliya ang paghubog-hubog ug pagpatuyag inom pero wala idili ang kasarangang pag-inom. (1 Corinto 6:9, 10) Sukad pa sa una, ang mga magsisimba sa Diyos moinom ug bino, ilimnon nga gihisgotan sa Bibliya ug kapig 200 ka beses. (Genesis 27:25) Ang Ecclesiastes 9:7 nag-ingon: “Kan-a ang imong pagkaon uban ang pagmaya ug imna ang imong bino uban ang usa ka maayong kasingkasing.” Sanglit makapalipay ang bino, kini sagad idalit sa mga kombira, sama sa kombira sa kasal. Niini nga okasyon gihimo ni Jesu-Kristo ang iyang unang milagro—ang tubig gihimo niyang “maayong bino.” (Juan 2:1-11) Kini gigamit usab ingong medisina.—Lucas 10:34; 1 Timoteo 5:23.

 Duna bay limitasyon ang Bibliya kon unsa ka daghan ang imnon?

[Ayaw] paulipon sa daghang bino.’Tito 2:3.

NGANONG ANGAY KANG MAHIBALO?

Tuig-tuig, daghang pamilya mag-antos kay ang usa o duha ka ginikanan palainom. Tungod sa sobrang pag-inom daghan ang makaagom ug disgrasya, lakip na sa mga disgrasya sa dalan. Ug ang pagkapalainom sa ngadto-ngadto makadaot sa utok, kasingkasing, atay, ug tungol.

ANG GIINGON SA BIBLIYA

Ang Diyos nagsugo nga ang tawo magmakasaranganon sa pag-inom ug pagkaon. (Proverbio 23:20; 1 Timoteo 3:2, 3, 8) Ang kakulag pagpugong sa kaugalingon makawala sa pabor sa Diyos. Ang Bibliya nag-ingon: “Ang bino mabiaybiayon, ang makahubog nga ilimnon sabaan, ug ang matag usa nga mapahisalaag niini dili maalamon.”—Proverbio 20:1.

Pananglitan, ang alkoholikong ilimnon makapahisalaag sa mga dili maalamon kay sila dili na makapanimbang-timbang kon unsay husto ug sayop. Ang Oseas 4:11 nag-ingon: “Ang bino ug ang tam-is nga bino mao ang magakuha sa maayong motibo.” Nakita ni John nga tinuod kana. * Human sila maglalis sa iyang asawa, siya miadtog hotel, nagpasulabig inom, ug nakapanapaw—mga buhat nga iyang gibasolag maayo ug gipanumpa nga dili na gyod niya himoon pag-usab. Ang sobrang pag-inom makadaot sa pisikal, moral, ug espirituwal, ug ang Bibliya nag-ingon nga ang mga palahubog dili makabatog kinabuhing walay kataposan.—1 Corinto 6:9, 10.

Kanus-a dili angayng moinom?

“Ang tawong maalamon makakita sa kasamok ug magpalayo niana, apan ang tawong walay salabotan mosulod sa kasamok ug magbasol sa ulahi.”—Proverbio 22:3, “Good News Translation.”

NGANONG ANGAY KANG MAHIBALO?

Ang World Book Encyclopedia nag-ingon: “Isog ang alkoholikong ilimnon.” Busa may mga panahon nga tingali dili maayo bisan ang kasarangang pag-inom.

ANG GIINGON SA BIBLIYA

Ang mga tawo sagad “mosulod sa kasamok” kay moinom sila sa dili hustong panahon. Ang Bibliya nag-ingon: “Adunay tinudlong panahon alang sa tanang butang,” ug lakip niana ang bahin sa pag-inom. (Ecclesiastes 3:1) Pananglitan, dili puwedeng moinom kon ang usa menor de edad pa, o kaha siya nagpauli sa lawas gikan sa pagkapalainom, o basin duna siyay ginatomar nga medisina nga dili maayog epekto kon siya moinom. Ug para sa kadaghanan, ang “tinudlong panahon” nga dili sila angayng moinom maoy sa dihang moadto sa trabahoan o samtang magtrabaho, ilabina kon mag-operit ug makina. Oo, giisip sa tawong maalamon ang kinabuhi ug maayong panglawas ingong bililhong mga gasa gikan sa Diyos. (Salmo 36:9) Atong ikapasundayag ang atong pagtahod niini nga mga gasa kon atong sundon ang mga prinsipyo sa Bibliya bahin sa alkoholikong ilimnon.

^ par. 11 Ang ngalan giilisan.