Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! HULYO 2013

Inhustisya ang Akong Makita Bisan Asa

Inhustisya ang Akong Makita Bisan Asa

NATAWO ko sa 1965 sa kabos nga pamilya didto sa Northern Ireland. Nagdako ko sa County Derry panahon sa gitawag nga “Troubles,” ang mapintas nga panag-away sa mga Katoliko ug Protestante nga mikabat ug kapin sa 30 ka tuig. Ang minoriya nga Katoliko mibati nga gidaog-daog sa mayoriya nga Protestante, nga nangakusar kanila sa dili patas nga palakaw sa eleksiyon, panarbaho, pamalay, ug sobrang paggamit sa puwersa sa kapolisan.

Bisan asa ko motan-aw, inhustisya ug pagpihig ang akong nakita. Makadaghan ko gikulata, gibira gikan sa awto ug gitionan ug pistola, o giimbestigar ug girekisa sa mga polis o mga sundalo. Ako naagrabyar, ug nakaingon ko, ‘Mahimong palabyon lang ni nako, o kaha duna koy himoon!’

Miapil ko sa mga martsa nga gitawag ug Bloody Sunday niadtong 1972, sa paghandom sa 14 ka tawo nga gipusil sa mga sundalo sa Britain, ug sa mga hunger strike niadtong 1981, sa paghandom sa mga pinirisong republican kinsa nagpagutom hangtod namatay. Nagtaod kog gidili nga mga bandera ug nagsulat-sulat bisan diin ug eslogan nga batok sa Britain. Morag pirme na lang nga dunay  kapintasan o kamatayon sa Katoliko nga iprotesta. Sagad, ang mga martsa mahimong rayot.

Sa nag-eskuyla pa ko sa unibersidad, nag-apil-apil ko sa mga protesta alang sa kalikopan. Sa ulahi mibalhin kog puyo sa London, ug miapil sa sosyalista nga mga martsa batok sa mga palisiya sa gobyerno nga morag mga dato ray nagpahimulos. Miapil sab ko sa welga sa mga unyon batok sa pagkunhod sa suweldo, ug sa mga martsa niadtong 1990 batok sa dili patas nga pagpamuhis, nga tungod niini nadaot pag-ayo ang Trafalgar Square.

Apan sa ulahi, ako nahigawad. Ang mga pagprotesta wala makasulbad sa isyu kondili nakapasamot sa pagdumot.

Bisan pag maayog tuyo, ang tawo dili gayod makahatag ug hustisya ug patas nga kahimtang

Niining panahona, gipaila-ila ko sa akong amigo sa mga Saksi ni Jehova. Ila kong gitudloan base sa Bibliya nga ang Diyos nahibalo sa atong pag-antos ug nga iyang wad-on ang tanang kadaot nga gipahinabo sa tawo. (Isaias 65:17; Pinadayag 21:3, 4) Bisan pag maayog tuyo, ang tawo dili gayod makahatag ug hustisya ug patas nga kahimtang. Gawas nga kita nagkinahanglag pagtultol sa Diyos, nagkinahanglan usab kita sa iyang gahom sa pagbuntog sa dili makitang mga puwersa nga maoy nakaingon sa mga problema sa kalibotan.—Jeremias 10:23; Efeso 6:12.

Karon akong naamgohan nga ang akong mga pagprotesta kaniadto kaamgid sa pagtarong ug mga lingkoranan sa barko nga hapit nang malunod. Nalipay ko nga nahibalo nga moabot ang panahon nga wala nay inhustisya niini nga kalibotan, diin ang tanang tawo patas na.

Ang Bibliya nagtudlo nga si Jehova nga Diyos “mahigugmaon sa hustisya.” (Salmo 37:28) Kini ang usa sa mga hinungdan kon nganong makaseguro kita nga magpatungha gayod siya ug hustisya nga dili ikahatag sa gobyerno sa tawo. (Daniel 2:44) Kon gusto kag dugang impormasyon, kontaka ang mga Saksi ni Jehova sa imong dapit o ablihi ang among Web site nga www.jw.org/ceb.

Pagkat-og Dugang

Nganong Gitugotan sa Diyos ang Pagkadaotan ug Pag-antos?

Sa unsang paagi nagsugod ang pagkadaotan, ug nganong gitugotan kini sa Diyos nga magpadayon? Matapos pa kaha ang pag-antos?

Nganong Tun-an ang Bibliya?

Ang Bibliya nagtabang sa minilyong tawo sa tibuok kalibotan nga masayran ang tubag sa dagkong pangutana bahin sa kinabuhi. Gusto ba sab nimong masayran kini?