Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! HUNYO 2013

Pagpaniid sa Kalibotan

Pagpaniid sa Kalibotan

Kalibotan

Ang World Health Organization nag-ingon nga ang pagsigeg ginhawag binuga sa dekrudong mga sakyanan “dakog posibilidad nga makapakanser sa baga” ug posible usab nga makapakanser sa pantog.

Antarctica

Ang mga pollen ug spore nga nahimong fossil nga nakaplagan diha sa salog sa dagat nagpakita nga ang Antarctic kaniadto gipanuboan ug mga palma ug mga kahoy sa tropiko. Daghan ang nagtuo nga sa milyon-milyong tuig kanhi, ang tingtugnaw sa Antarctic dili grabe ka tugnaw ug halos walay yelo, ug ang temperatura sa North Pole ug South Pole halos parehas lang diha sa ekwetor.

Ireland

Sa 2012 nga report sa Association of Catholic Priests sa Ireland, 87 porsiyento sa mga Katoliko nga gisurbi niining nasora nagtuo nga ang pari angayng tugotang magminyo; 77 porsiyento nagtuo nga ang mga babaye angayng tugotang magpari.

Sub-Saharan Africa ug Southeast Asia

Nakita sa pagsusi maylabot sa mga medisina sa malarya nga may mga lugar diin ang mga medisina sagad menos ug kalidad o peke, busa ang mga pasyente dili mahatagan ug hustong tambal o dili mangaayo. Sa Southeast Asia, 36 porsiyento sa mga medisina nga gisusi nakita nga peke, ug 20 porsiyento sa mga medisina nga gisusi sa sub-Saharan Africa peke usab.

El Salvador

Niadtong Abril 2012, gipasigarbo sa mga opisyales sa gobyerno ang unang higayon sa halos tulo ka tuig nga walay gipatay sa El Salvador sulod sa usa ka adlaw. Tungod sa mga krimen nga nalangkit sa droga, sa 2011 ang proporsiyon sa gipamatay maoy 69 sa matag 100,000—usa sa kinagrabehan sa tibuok kalibotan.