Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! HUNYO 2013

 PANGUNANG TOPIKO: SOBRA RA BA KITANG MAKAPAMALIT?

Nganong Kita Mamalit?

Nganong Kita Mamalit?

Sa tibuok-kalibotang surbi nga gihimo niadtong 2012, katunga sa gisurbi miingon nga sila nakapalit ug butang nga wala nila kinahanglana. Kapin sa 60 porsiyento miingon nga ang mga tawo sobrang makapamalit. Daw sakto ang ilang giingon kay daghan ang naputos sa utang. Ang mga tigdukiduki nag-ingon nga imbes malipay ta sa atong gipamalit, matensiyon na hinuon ta ug maguol! Kon mao, nganong sobra kaayo kitang makapamalit?

ANG mga tawo gibombardiyohan ug daghan kaayong paanunsiyo. Unsay tuyo sa mga tigpaanunsiyo? Ilang ipabati kanato nga kanang atong gustong paliton kinahanglanon gyod. Ang mga tigpaanunsiyo nahibalo nga ang mga tawo maaghat sa pagpalit tungod sa emosyon. Busa ang mga paanunsiyo gihimo sa paagi nga makabig pag-ayo ang emosyon.

Ang librong Why People Buy Things They Don’t Need nag-ingon: “Sa dihang magplanong mamalit, ang pumapalit sagad magpanghanduraw nga nangita sa iyang palitonon, nakit-an kana, ug gipalit.” Ang ubang eksperto nagtuo nga ang ubang pumapalit maghinamhinam samtang namalit, gani mobati sila nga mibukal ang adrenaline sa ilang lawas. Ang eksperto sa paanunsiyo nga si Jim Pooler miingon: “Kon mamatikdan sa naninda nga nagpanikad ka sa pagpalit, iya kining pahimudsan.”

Unsay imong himoon aron dili ka mabiktima sa maayong laking mga tigpaanunsiyo? Ayaw padala sa imong emosyon, ug timbang-timbanga kon unsay gipasalig sa mga tigpaanunsiyo ug kon unsay tinuod.

 ANG PASALIG: “Moarang-arang ang Imong Kinabuhi”

Normal lang nga ang tawo gustog maarang-arang nga kinabuhi. Kita bombardiyohan sa mga tigpaanunsiyo ug mga mensahe nga ang tanan natong gipangandoy—maayong panglawas, kasegurohan, pagkawalay-tensiyon, ug suod nga relasyon—mabatonan pinaagi sa pagpalit sa husto kuno nga produkto.

ANG TINUOD:

Sa magkadaghan ang atong butang, magkamenos usab ang kalidad sa atong kinabuhi. Dugang panahon ug kuwarta ang gikinahanglan sa pag-atiman ug daghang butang. Ang tensiyon mosamot tungod sa pagsigeg hunahuna sa utang, ug momenos ang panahon para sa pamilya ug mga higala.

Sa magkadaghan ang atong butang, magkamenos usab ang kalidad sa atong kinabuhi

Prinsipyo: “Bisag ang usa ka tawo adunay kadagaya ang iyang kinabuhi wala magagikan sa mga butang nga iyang gipanag-iya.”Lucas 12:15.

ANG PASALIG: “Mosikat Ka”

Pipila lang ang moadmitir nga mamalit sila aron magpabilib sa uban. Apan si Jim Pooler miingon: “Dihang ang mga tawo mamalit, kinaiya nila nga makigkompetensiya sa mga higala, silingan, kauban sa trabaho ug mga paryente.” Tungod niini, ang mga anunsiyo magpakitag mga produkto nga nabatonan sa mga tawong dato. Ang ilang mensahe sa mga pumapalit mao kini: “Mahimong maparehas ka niini!”

ANG TINUOD:

Kon ikomparar nato ang atong kaugalingon sa uban aron lang motaas ang atong pagtamod sa kaugalingon, dili gyod kita makontento. Dihang makab-ot na nato ang atong gipangandoy, mangandoy kitag mas labaw pa.

Prinsipyo: “Ang mahigugmaon . . . sa salapi dili matagbaw sa salapi.”Ecclesiastes 5:10.

ANG PASALIG: “Mailhan Ka Kon Kinsa Ka”

Ang librong Shiny Objects nag-ingon: “Sagad ipadayag nato sa uban kon kinsa kita (o kon unsay gusto nato nga mailhan ta) pinaagi sa atong paggamit ug pagpagarbo sa materyal nga mga butang.” Ang mga tigpaanunsiyo nahibalo niini ug ilang manehoon nga ang tatak sa produkto—ilabina iladong tatak—malantaw nga para sa mga sosyal ug maayog moral.

Ikaw komosta? Gusto ka bang mailhan nga pasyonista o hilig ug esport? Bisag unsa pay imong gusto, ipasalig sa mga tigpaanunsiyo nga maingon ka niana basta mopalit lang kag produkto sa usa ka partikular nga tatak.

ANG TINUOD:

Bisag unsa pay atong paliton, dili kana makausab sa atong pagkatawo ni makahatag kana kanato ug dalayegong mga hiyas, sama sa pagkamatinud-anon ug pagkamaayog moral.

Prinsipyo: “Himoa nga ang inyong dayandayan dili . . . sa pagsul-ob ug mga pahiyas nga bulawan o sa pagsul-ob ug panggawas nga mga besti, kondili diha sa natago nga pagkatawo sa kasingkasing.”1 Pedro 3:3, 4.