Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! ABRIL 2013

Pagpaniid sa Kalibotan

Pagpaniid sa Kalibotan

United States

Sa semana sa Oktubre 29, 2012, mikunhod pag-ayo ang pagpatay, felony assault, ug pagpanulis sa New York City kon itandi nianang mga petsaha niadtong 2011. Ngano? Tungod kana sa paglampornas sa Bagyong Sandy sa East Coast sa United States, nga miresultag kaylap kaayong brown-out. “Human sa kinaiyanhong mga kalamidad o grabeng katalagman sama sa [pag-atake sa terorista niadtong Septiyembre 11, 2001], mous-os ang gidaghanon sa komon nga mga krimen,” miingon si Paul Browne sa New York Police Department. Hinuon midaghan ang pagpangawat, ug wala matingala niana si Browne. “Daghang lugar ang walay suga,” siya miingon.

Antarctica

Ang mga siyentista nabalaka nga mameligro ang lumad nga mga tanom ug hayop sa Antarctica tungod sa pagsulod sa langyawng mga tanom ug hayop. Tuig-tuig, gibanabana nga libolibong turista wala tuyoang makadala ug aberids nga 9.5 ka liso matag usa, nga mamilit sa ilang mga botas o bag. Daghan nang tanom gikan sa laing lugar ang nanubo sa Western Antarctic Peninsula.

Netherlands

Usa ka babaye nga 83 anyos ang unang nataoran ug titanium nga apapangig nga gihimo pinaagig 3-D laser printer. Ang pasyente, kansang apapangig nadaot sa impeksiyon, dili na karon maglisod sa pagkaon, pagginhawa, ug pagsulti. Gisapaw-sapaw pag-print sa laser printer ang tinunawng polbos nga titanium hangtod natibuok ang apapangig, ug kini gitaod pinaagig operasyon.

Germany

Sulod sa usa ka tuig nga gidili ang pagpanigarilyo sa pipila ka publikong lugar sa Germany, ang gidaghanon sa naadmit nga may sakit nga angina pectoris base sa usa ka grupo nga gisusi mikunhod ug 13.3 porsiyento; sa atake sa kasingkasing, mga 8.6 porsiyento.