Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Pagmata!  |  Enero 2013

 KAYUTAAN UG KATAWHAN

Pagbisita sa Cameroon

Pagbisita sa Cameroon

ANG mga tawo sa tribong Baka—nga nailhan usab nga mga Pygmy—lagmit mao ang unang mga molupyo sa Cameroon. Dayon, sa mga tuig sa 1500, nangabot ang mga Portuges. Paglabay ug gatosan ka tuig, ang amihanang bahin sa Cameroon gisakop sa tribong Fulani, nga mga tawong Islam. Karon, 40 porsiyento sa mga molupyo sa Cameroon mga Kristiyano, 20 porsiyento mga Muslim, ug 40 porsiyento membro sa Aprikanhong mga relihiyon.

Ang mga Saksi ni Jehova nagpatik ug binase sa Bibliya nga literatura sa Bassa, nga usa ka pinulongan sa Cameroon

Ang mga tawo nga nagpuyo sa kabaryohan sa Cameroon maabiabihon. Ang mga bisita padayonon sa balay ug dalitag pagkaon ug tubig. Isipon nilang insulto kon balibaran ang ilang gitanyag, apan malipay sila kon kini dawaton.

Ang panag-estorya sugdan pinaagi sa pagpangatahoran sa pamilya ug pagpangomosta kanila. Hasta mga binuhi komostahon! “Sa dihang molakaw na ang bisita, ang tagbalay dili lang igong moingon ug ‘Babay,’ ” miingon si Joseph, nga taga-Cameroon. “Sagad, kuyogan sa tagbalay ang bisita hangtod pa sa dalan ug magpadayon sa pagpakig-estorya kaniya samtang maglakaw. Dayon manamilit siya ug mobalik na sa balay. Kon ang bisita dili tagdon ug ingon niini, mobati siya nga wala abiabiha.”

Komon ang mga sakayan diha sa Sanaga River. Bisag unsa rang materyales ang gamiton para sa layag

Sa dihang mag-uban pagpangaon, may mga higayon nga ang managhigala magsalo sa usa lang ka plato, nga usahay magkinamot. Sa Cameroon, kini nga batasan maoy simbolo sa panaghiusa. Gani, kini himoon usahay aron magkauli ang nagkalinay-anayng mga higala. Ang panagsalo ug kaon maoy usa ka paagi sa pag-ingon, “Nagkauliay na ta.”

Ang mga Saksi ni Jehova, nga maoy magpapatik niining magasina, dunay kapin sa 300 ka kongregasyon sa Cameroon ug nagdumalag mga 65,000 ka pagtuon sa Bibliya