Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! NOBYEMBRE 2012

Pangayog Tabang

Pangayog Tabang

Pangayog tabang sa kasaligang mga paryente ug mga higala

“Buotan ang among mga higala sa kongregasyon. Sila mahigugmaon ug matinabangon. Mora silag among pamilya.”—LIZAAN, INAHAN SA DUHA KA TIN-EDYER.

Ang problema.

Si Alina, nga dunay duha ka anak nga lalaki, miingon: “Problema gyod nako ang kakapoy ug kakulang pirme ug panahon.” Ang situwasyon ni Alina maoy kasagarang problema sa solo nga mga inahan. Busa daghan kanila mangitag tawong kadangpan nga dili sila maikog.

Mga sugyot.

Pangayog tabang sa kasaligang mga paryente ug mga higala. Ilista ang ngalan sa mga tawo nga makatabang nimo sa pag-atiman sa bata, pag-ayo-ayo sa balay, dihang magkinahanglan kag sakyanan, o magkinahanglag kapahungawan sa problema. Ug i-update kanunay ang imong listahan. Susiha usab kon duna bay makuhang tabang sa gobyerno ug sa ubang ahensiya.

Si Renata, nga Saksi ni Jehova, gitabangan sa iyang mga igsoon sa pagtuo. “Wala gyod ko nila pasagdi,” siya miingon. “Sa dihang gitrangkaso ko ug ang akong nuybe anyos nga kaluhang anak nga babaye, dili ko makaluto. Sa nahibaloan kini sa among kongregasyon, adlaw-adlaw nga dunay maghatod kanamog pagkaon.” Kini makapahinumdom kanato sa giingon sa Bibliya sa 1 Juan 3:18: “Minahal nga mga anak, maghigugmaay kita, dili pinaagi sa pulong ..., kondili sa buhat ug sa kamatuoran.”

Makatabang ba ang imong kapikas kanhi? Kon siya (sagad amahan) gihatagan sa gobyerno ug katungod nga makauban ang inyong mga anak ug responsable ug andam motabang, pangayo kaniyag tabang. Ang mga bata nagkinahanglan pod ug panahon nga makauban ang ilang amahan. *

Tudloi ang imong mga anak sa pagtabang. Hatagig trabaho ang imong mga anak nga sibo sa ilang edad, kay kini makatabang kanimo ug kanila usab. Kini makatudlo kanila sa pagkahimong responsable ug kugihan, nga ila unyang mapuslan.

^ par. 6 Angayng ipadapat sa Kristohanong ginikanan ang mga prinsipyo sa Bibliya kutob sa mahimo sumala sa iyang kahimtang ug pamalandongon kon unsay maayo alang sa iyang mga anak. Kinahanglan niyang tahoron ang desisyon sa korte.