Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! NOBYEMBRE 2012

Molampos Ka!

Molampos Ka!

“Malipay kaayo ko dihang mamarayeg nako ang akong duha ka anak nga babaye ug moingon, ‘Love you, Ma.’”—ANNA, SOLO NGA INAHAN NGA TAGA-POLAND.

“Kontento na kaayo ko dihang ipakita sa akong mga anak ang ilang apresasyon sa akong gihimo para nila. Usahay hatagan nila kog gagmayng mga regalo, sama sa mga drowing nga ilang gihimo. Dako na kaayo kining balos sa akong mga paghago.”—MASSIMO, SOLO NGA AMAHAN NGA TAGA-ITALY.

“Usahay kon maguol ko, gakson ko sa usa sa akong mga anak nga lalaki, halokan, ug sultihan nga mahal kaayo ko niya.”—YASMIN, SOLO NGA INAHAN NGA TAGA-SOUTH AFRICA.

PIPILA lang kini sa mga komento nga nadawat sa Pagmata! gikan sa daghang solo nga ginikanan sa lainlaing nasod nga gisurbi. Daghan kanila, sagad mga inahan, nag-ingon nga maayo untag duna silay mahigugmaong kapikas nga moabag kanila. * Apan ang ilang mga komento nagpakita usab nga nakapaangay na sila sa ilang kahimtang.

Sa unsang paagi sila nakapaangay ug nagmalamposon sa ilang lisod nga kahimtang? Sa sunod nga mga artikulo, hisgotan nato ang ilang praktikal ug sinserong mga komento, maingon man ang ubang prinsipyo nga nakatabang kanila. Kon solo ka nga ginikanan, kami nanghinaot nga kining mga artikuloha makatabang nimo dili lang aron molampos ka pagtuman sa imong lisod nga responsabilidad kondili aron magmalipayon pod ka ug kontento. Ang tinuod, lisod kana niining mausab-usabon ug walay kasegurohang kalibotan. *

Hisgotan sa mga artikulo ang unom ka punto. Kon sa unsang paagi ang solo nga ginikanan

  1.   Makapangayog tabang
  2.   Makakomunikar ug maayo sa ilang mga anak
  3.   Makatakda ug hustong prayoridad
  4.   Makatakda ug klarong mga balaod sa panimalay
  5.   Makatakda ug maayong mga prinsipyo
  6.   Makahatag ug panahon para sa Diyos diha sa ilang pamilya

^ par. 5 Sa tibuok kalibotan mga babaye ang kadaghanan sa solo nga ginikanan, ug kanay gipakita niini nga serye sa mga artikulo.

^ par. 6 Daghan sa mga prinsipyo niini nga serye sa mga artikulo makatabang usab sa mga pamilya nga kompletog ginikanan.