Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Pagmata!  |  Oktubre 2012

 Pagpaniid sa Kalibotan

Pagpaniid sa Kalibotan

“Ang hinungdan sa halos katunga sa gikanser matag tuig [sa United Kingdom]—kapin sa 130,000—maoy tungod sa mga batasan nga malikayan unta sama sa pagpanigarilyo, pag-inom, ug pagkaog makadaot sa panglawas nga kalan-on.”—BBC NEWS, BRITAIN.

“Ang dako, moderno kaayong negosyo sa mga sindikato sa pagpamaligyag mga parte sa lawas sa ihalas nga mananap nakapakunhod sa gidaghanon sa nindot kaayong mga mananap sa kalibotan . . . nga wala pa mahitabo sukad.”—WILDLIFE CONSERVATION SOCIETY, U.S.A.

Ang mga tawo nga mogugol sa aberids ug unom ka oras sa pagtan-awg TV makuhaag 4.8 ka tuig sa kinabuhi kay sa niadtong dili motan-awg TV. Sa ato pa, matag oras sa pagtan-awg TV makapakunhod ug mga 22 minutos sa gitas-on sa kinabuhi sa hamtong.—BRITISH JOURNAL OF SPORTS MEDICINE, BRITAIN.

Sa Germany, kapin sa 90 porsiyento sa mga babaye kansang bata nga gisabak nadayagnos nga dunay Down syndrome magpaaborsiyon.—DER TAGESSPIEGEL, GERMANY.

Tensiyon sa Pagkinabuhig Siyudad

Sumala sa panukiduki, ang “mga siyudadnon grabeg reaksiyon sa tensiyon kay sa mga tawong nagpuyo sa gagmayng mga lungsod,” nag-ingon ang magasing Przekrój sa Poland. “Ang siyudad daghan kaayog makapatensiyon nga situwasyon,” nag-ingon ang psychotherapist nga si Mieczysław Jaskulski sa Psychoeducation Laboratory sa Warsaw. “Ang gidaghanon sa mga siyudadnon nga posibleng atakehon ug nerbiyos mas taas ug 21 porsiyento kay sa mga nagpuyo sa kalungsoran, ug ang gidaghanon niadtong atakehon ug mood disorder mas taas ug 39 porsiyento.” Unsay makatabang sa mga siyudadnon sa pagsagubang niini? “Ayawg kabalaka sa mga butang nga wala ka nay mahimo,” “ang problema sa trabaho ayaw dad-a sa balay,” “paglakaw-lakaw,” ug “ayawg kahadlok sa pagbakasyon,” nagsugyot ang Przekrój.

Pilay Matipigang Impormasyon sa Facebook?

Usa ka estudyante sa abogasiya didto sa Austria gustong mahibalo kon unsa ka daghang impormasyon bahin kaniya ang natipigan diha sa kinadak-ang social network sa kalibotan sulod sa iyang tulo ka tuig nga pagkamembro, busa nangayo siyag kopya niana. Gipadad-an siya sa Facebook ug CD nga nasudlag 1,222 ka panid nga impormasyon. Sumala sa report sa mantalaang Der Tagesspiegel sa Germany, ang estudyante miingon: “Ang tanan natipigan—message, chat, lakip sa sekretong impormasyon bahin sa mga higala.” Lakip niana ang impormasyon nga abi niyag iya nang na-delete!