Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! OKTUBRE 2012

Magmahimsog

Magmahimsog

Kon atimanon nimo ang imong panglawas, maayo kag lakat sa klase ug maayo pod ug kinabuhi.

MAAYO gyod nga atimanon ang lawas nga gihatag sa Diyos kanimo. (Salmo 139:14) Aniay ilustrasyon: Handurawa nga duna kay awto, apan wala nimo hatagig panahon ang pagmentinar niini. Sa kadugayan maguba kini. Ingon usab niana ang imong lawas. Unsay imong himoon sa “pagmentinar” niana?

Pahulay.

Kon kulang kag tulog, haga kag panagway ug pirme kang kapoyon, dili kahunahunag tarong, ug magul-anon. Apan kon husto kag pahulay, lagsik ka. Kini makapatubog kusog sa imong lawas, makapauswag sa obra sa imong utok, makahatag nimog resistensiya batok sa sakit, ug maayo ang imong pamati. Dako kana nga ganansiya gikan sa gamayng paghago!

Sugyot: Kon mahimo, sulay ug katulog sa samang oras matag gabii.

Nutrisyon.

Ang tin-edyer kusog motubo. Pananglitan, gikan sa edad nga 10 ngadto sa 17, ang kadaghanan sa batan-ong lalaki modoble ug timbang. Ang mga babaye kusog usab nga motubo. Ang nagtubong lawas nagkinahanglag daghang sustansiya ug enerhiya. Tagan-i gyod ang imong lawas ug nutrisyon nga gikinahanglan niana.

Sugyot: Ayaw gyod kalimot sa pagpamahaw. Kon imong ‘kargahan’ ug pagkaon ang imong lawas sa dili pa magklase, kana makatabang aron makahunahuna kag tarong ug momaayo ang imong memorya.

Ehersisyo.

Ang Bibliya miadmitir nga “ang ehersisyo makaayo sa imong lawas.” (1 Timoteo 4:8, Contemporary English Version) Kini makalig-on sa imong kaunoran ug kabukogan, dili ka daling kapoyon, ang imong timbang mamentinar, mouswag ang imong katakos sa panghunahuna, may resistensiya ka batok sa sakit, mahupay ang tensiyon, ug maayo ang imong buot. Siyempre, ang ehersisyo makalingaw usab, ilabina kon ganahan ka sa ehersisyo nga imong ginahimo!

Ang punto: Ang bastanteng katulog, hustong nutrisyon, ug kasarangang ehersisyo makatabang aron ang imong “makina” maayog kondisyon. Ug tungod niana maayo kag lakat sa klase. *

Sulayi kini. Paghimog rasonableng rutina sa pag-ehersisyo. Subaya ang imong batasan sa pagkatulog ug pagkaon sa usa ka bulan, ug isulat kon unsa pay kinahanglan nimong himoon.

“Kon maglakaw-lakaw ko agig ehersisyo, lagsik kog pamati—bisag kapoy ko sa sinugdan.”—Jason, New Zealand.

“Ang pagkaon gihimo sa Diyos sa pagpabaskog sa atong lawas, busa sustansiyado gyod nga pagkaon ang akong kaonon!”—Jill, United States.

“Mag-jogging ko tulo ka beses sa usa ka semana, ug magbisikleta o maglakaw-lakaw kaduha sa usa ka semana. Ang ehersisyo makapalagsik nako ug makapahuwas sa tensiyon.”—Grace, Australia.

^ par. 9 Alang sa dugang impormasyon bahin sa imong panglawas, tan-awa ang kapitulo 10 sa librong Mga Pangutanang Gisukna sa mga Batan-on—Mga Tubag nga Mosaler, Tomo 1, nga giimprenta sa mga Saksi ni Jehova.

Pagkat-og Dugang

Unsay Akong Himoon Aron Ganahan Kong Mag-ehersisyo?

Sayra ang tulo ka benepisyo sa maayong programa sa pag-ehersisyo aron ganahan kang mag-ehersisyo.