Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! OKTUBRE 2012

 Ang Hunahuna sa Bibliya

Ang mga Bituon ba Makaapektar sa Imong Kinabuhi?

Ang mga Bituon ba Makaapektar sa Imong Kinabuhi?

Nahigugma kaha siya nako?

Maayo kahang ibiyahe ron?

Madawat kaha ko sa trabaho?

ARON matubag ang mga pangutanang sama niini, daghan mokonsultag astrolohiya. * Apan makaapektar ba gyod sa imong kinabuhi ang mga bituon? Makatabang ba kini nimo sa pagkahibalo sa imong umaabot, o sa imong kaugalingon? Unsay giingon sa Bibliya?

Ang mga Bituon ba Makaimpluwensiya sa Atong Umaabot?

Ang uban nagtuo nga kita dili makaikyas sa atong kapalaran. Ang umaabot nahisulat na, matod pa nila, ug makita kini diha sa mga bituon. Apan lahi ang giingon sa Bibliya. Kini nag-ingon nga gihatagan sa Diyos ang tawo ug kapilian, nga nagpasabot nga ang tawo may igong kagawasan sa pagpili sa mahitabo kaniya. Pananglitan, iyang gisultihan ang mga Israelitas: “Gibutang ko ang kinabuhi ug ang kamatayon sa imong atubangan, ang panalangin ug ang maldisyon; ug kinahanglan nga pilion mo ang kinabuhi aron ikaw magpadayong buhi, ikaw ug ang imong kaliwat.”—Deuteronomio 30:19.

Pinaagi nianang mga pulonga, giklaro ni Jehova nga Diyos ngadto sa iyang katawhan nga  sila may igong kagawasan sa pagpili sa ilang umaabot. Kon sila motuman sa iyang mga sugo, sila mapanalanginan. Kon sila mosupak, sila madaot.

Palandonga: Kon ang umaabot sa matag Israelitas nahisulat na sa mga bituon, kinahanglan pa bang sultihan sila sa Diyos sa pagpili sa kinabuhi? Husto kaha nga papanubagon sila sa Diyos sa mga buhat nga maoy sugo sa ilang kapalaran?

Tin-aw ang gitudlo sa Bibliya: Ang atong kinabuhi nagdepende sa atong mga desisyon—dili sa mga bituon.—Galacia 6:7.

Ang mga Bituon ba Makaimpluwensiya sa Atong Personalidad?

Ang kadaghanang astrologo nag-ingon nga dili sila motuo ug kapalaran. Dihay miingon nga “kitay magbuot sa atong kapalaran,” apan siya midugang: “Sa laing bahin, ang panahon sa atong pagkahimugso dunay impluwensiya sa atong personalidad.” Mao usab kanay pagtuo sa uban. Sanglit ang mga bituon ug mga planeta dunay epekto sa Yuta, sila nagtuo nga kini dunay epekto usab sa tawo. Unsay giingon sa Bibliya?

Ang Bibliya dili usa ka libro sa siyensiya diin gilatid ang matag detalye sa lawas sa tawo ug sa uniberso. Apan gisaysay niini ang katuyoan kon nganong gilalang ni Jehova ang mga bituon ug mga planeta. Ang Genesis 1:14, 15 nag-ingon: “Ang Diyos miingon, ‘Gisugo ko ang kahayag sa pagtungha sa kalangitan ug sa pagbulag sa adlaw gikan sa gabii ug sa pagpaila sa pagsugod sa mga panahon . . . Gisugo ko sila sa pagsidlak diha sa yuta.’”—Contemporary English Version.

Palandonga: Kon gilalang pa sa Diyos ang mga bituon sa pag-impluwensiya sa atong personalidad, dili ba iya unta kitang sultihan?

Unsay atong ikaingon? Nga ang mga bituon maoy bahin sa kalalangan sa Diyos pero dili makaimpluwensiya sa atong personalidad.

Mas Maayong Giya

Kon gusto kitang mahibalo bahin sa atong umaabot o makasabot sa atong kaugalingon, dalayegon kana. Pero dunay mas maayong giya kay sa mga bituon.

Ang Bibliya naghubit kang Jehova nga Diyos ingong “ang Usa nga nagsulti sa kataposan sukad sa sinugdan.” (Isaias 46:10) Siya dunay katuyoan nga iyang tumanon. (Isaias 55:10, 11) Atong mahibaloan ang katuyoan sa Diyos pinaagi sa pagbasag Bibliya. Kining karaang balaan nga basahon nagsaysay usab kon nganong kita nag-antos ug kon sa unsang paagi taposon sa Diyos ang mga kahimtang nga nagsakit sa katawhan. *2 Pedro 3:13; Pinadayag 21:1-4.

Kon bahin sa pag-ila ug pagpauswag sa atong kaugalingon, ang Bibliya mao ang kinamaayohang giya. Ngano? Tungod kay ang pagbasa niini makatabang kanato sa matinud-anong pagsusi sa atong kaugalingon. Pananglitan, ang Bibliya nag-ingon nga si Jehova nga Diyos “maluluy-on,” “mahinay sa kasuko,” ug ‘andam mopasaylo.’ (Exodo 34:6; Salmo 86:5) Ingon ba usab kita niana? Ang Bibliya makapaamgo kanato nga sayop ang atong panghunahuna ug makatabang kon unsay angay natong pauswagon.

Busa dili kinahanglang motan-aw pa kitag mga bituon aron mahibalo kita sa atong umaabot ug sa atong kaugalingon. Ang mas maayong giya mao ang Bibliya nga “inspirado sa Diyos ug mapuslanon sa pagpanudlo, sa pagpamadlong, sa pagpanul-id sa mga butang.”—2 Timoteo 3:16, 17.

^ par. 6 Ang astrolohiya maoy pagtuon sa adlaw, bulan, mga planeta, ug mga bituon, sa pagtuo nga kini dunay impluwensiya kanato ug makatabang sa pagsabot sa atong kaugalingon.

^ par. 19 Alang sa dugang impormasyon sa katuyoan sa Diyos, basaha ang kapitulo 3 sa librong Unsay Tinuod nga Gitudlo sa Bibliya? nga giimprenta sa mga Saksi ni Jehova.

Pagkat-og Dugang

Nganong Tun-an ang Bibliya?

Ang Bibliya nagtabang sa minilyong tawo sa tibuok kalibotan nga masayran ang tubag sa dagkong pangutana bahin sa kinabuhi. Gusto ba sab nimong masayran kini?

Sa Unsang Paagi Makabenepisyo Kita sa mga Prinsipyo sa Bibliya?

Si Jesus naghisgot nga kita nagkinahanglag giya ug kon unsa ang duha ka prinsipyo sa Bibliya nga labing hinungdanon.

Gitakda ba Daan kon Kanus-a Kita Mamatay?

Nganong nag-ingon ang Bibliya nga may “panahon sa pagkamatay”?