Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Pagmata!  |  Septiyembre 2012

Kataposan sa Kalibotan Gikaikagan Pag-ayo

Kataposan sa Kalibotan Gikaikagan Pag-ayo

GIKULBAAN ka ba sa mahitabo sa umaabot? Nan, wala ka mag-inusara. Sukad pa sa una, ang mga tawo nagtag-an-tag-an na kon unsay mahitabo sa umaabot, ug daghan ang nag-ingon nga mangiob kini. Ang giingon nga kataposan sa kalibotan gikaikagan pag-ayo sa libolibo nang katuigan.

Tagda pananglitan ang dili tinuod nga mga estorya karon. Ang mga komiks, TV, sine, ug mga libro naghimog daghan kaayong estorya kon sa unsang paagi matapos ang kalibotan. Tanang klase sa kontrabida—mga robot, monster, taga-laing planeta, patayng namangon, multo, dragon, aliwas, langgam, ilaga, ug higanteng mga tambuboan—naglungot-lungot sa pag-atake ug sa paglaglag sa tanang tawo. Siyempre, walay motuo niini nga mga estorya!

Hinunoa, dunay mga estorya ug teoriya nga nakapalisang pag-ayo sa ubang tawo. Ang pipila niini gibase kono sa siyensiya. Ang usa niini nag-ingon nga ang tibuok lut-od sa yuta moirog nga moresultag dagkong tsunami, linog, ug pagbuto sa mga bolkan. Ang laing teoriya mao nga ang mga planeta maglumbay nga makapakusog ug samot sa solar winds ug moresultag dakong kalaglagan sa Yuta. Lain pang teoriya nag-ingon nga ang magnetic pole sa Yuta kalit nga mobali ug tungod niini ang radyasyon sa adlaw makapatay kanatong tanan. Pero ayawg kabalaka kay dili kini mahitabo. Bisan pa niana, ang tawo  interesado gihapon kaayo niini nga mga estorya o teoriya.

Komosta ang mga libro ug mga Web site nga nanagna nga ang kalibotan matapos sa Disyembre 21 karong tuiga? Dunay nag-ingon nga ang planetang Nibiru (o Planet X) ug ang atong planeta magkabangga sa Disyembre 2012. Kini ug ang uban pang teoriya gibase lang sa mga interpretasyon sa karaang kalendaryo sa Maya, nga sumala pa sa uban, matapos kono sa tingtugnaw sa 2012.

Sanglit nakombinsir sa susamang mga panagna sa katalagman, ang uban nagtukod ug mga tagoanan sa likod sa ilang balay, o nagpareserbag mahal kaayong puy-anan ilalom sa yuta. Ang uban namalhin sa bukid nga dunay kaugalingong sistema sa tubig, heater, o elektrisidad.

Siyempre, may mga tawo nga dili motuo niini. Sila dili kombinsido nga matapos ang kalibotan. Pananglitan, ang mga siyentista sa NASA miingon: “Walay daotang mahitabo sa Yuta sa 2012. Ang atong planeta maayo kaayog kahimtang sulod na sa kapig 4 ka bilyon ka tuig, ug ang tinamod nga mga siyentista sa tibuok kalibotan nahibalo nga walay mahitabong kalaglagan sa 2012.”

Apan sayop ang pag-ingon nga ang tawo walay atubangong kalaglagan o nga mga ignorante lang ang motuo nga matapos ang kalibotan. Tinuod ba gayod nga matapos ang kalibotan? Kon mao, sa unsang paagi ug kanus-a kini matapos?