Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! SEPTIYEMBRE 2012

Mga Kapuli sa Pag-abonog Dugo

Mga Kapuli sa Pag-abonog Dugo

ANG inilang mga espesyalista gikan sa 40 ka nasod nagkomperensiya sa Moscow alang sa ika-60 nga Jubilee International Congress of the European Society for Cardiovascular and Endovascular Surgery niadtong Mayo 20-22, 2011. “Alang sa mga doktor, ang kombensiyon nga sama niini ka dako morag Olympic sa mga atleta,” miingon ang usa ka magsusulat sa TV sa Russia.

Sa tulo ka adlawng komperensiya, daghan ang nainteres sa booth nga nanghatag ug impormasyon bahin sa mga kapuli sa pag-abonog dugo. Ang Hospital Information Services (HIS) sa mga Saksi ni Jehova maoy nagdumala niini nga booth. Ang mga doktor maikagong nanguhag daghang information folder, libro, DVD, ug mga artikulo sa medisina bahin niining importanteng ulohan. Mas daghan ang nanguhag DVD nga dunay salida nga nag-ulohang Transfusion-Alternative Strategies—Simple, Safe, Effective. *

Ang Hospital Information Services sa mga Saksi ni Jehova maoy nagdumala niini nga booth. Ang mga doktor maikagong nanguhag daghang folder, libro, DVD, ug mga artikulo sa medisina

 Daghang doktor nga nanganha sa booth miadmitir nga kinahanglang mag-amping gyod dihang mag-opera aron sa pagkonserbar sa dugo. Usa ka siruhano nga taga-Italy, nga midiskurso sa komperensiya, miingon nga pamilyar siya sa mga Saksi ug malamposong nakaoperag kasingkasing sa 70 ka pasyenteng Saksi nga walay pag-abonog dugo. Siya miingon usab nga kini nga pamaagi nay iyang ginahimo diha sa iyang klinika. Usa ka propesor sa Deutsches Herzzentrum Berlin (German Heart Institute Berlin) mikuhag DVD para sa iyang kaugalingon ug para sa usa niya ka kauban. Siya miingon sa nanambong nga siya nakaopera nag masuso nga 2.5 kilos lang ang timbang nga walay pag-abonog dugo; ug diha sa iyang klinika nakaopera na siyag kasingkasing sa mga masuso nga ubos pa niinig timbang nga wala gihapoy pag-abonog dugo.

Ang pag-opera nga walay pag-abonog dugo molampos pinaagi sa tukmang kombinasyon sa mga aparato, tambal, ug pamaagi sa pag-opera nga magkonserbar sa dugo

Usa ka bulan human sa komperensiya didto sa Moscow, ang mga doktor sa nagkalainlaing nasod mitambong sa Fourth Belomorsk Symposium of Anesthesiologists and Intensive Care Physicians of the Northwest Region of Russia, sa siyudad sa Arkhangel’sk. Ang HIS nagbutang na pod ug booth didto, ug daghan usab ang nainteres niini. Sa pagkakita sa mga basahon ug DVD, usa ka doktor sa St. Petersburg miingon, “Mao gyod kini ang among gikinahanglan!” Siya nasubo nga kay batasan na ang pag-abonog dugo, ang pipila sa iyang kaubang mga doktor nagpadayon gihapon sa pag-abonog dugo sa mga pasyenteng grabeg mga paso. Siya midugang, “Ang inyong mga impormasyon magamit kaayo diha sa komperensiya maylabot sa pagtambal sa mga pasyente nga grabeg paso, diin kini nga komperensiya himoon sa St. Petersburg.”

Sa tibuok kalibotan, nagkadaghang doktor nakakita sa mga bentaha sa pagtambal ug pag-opera nga walay pag-abonog dugo. Panahon na lay mag-igo kon kini nga pamaagi sa pagtambal mao na unyay sundon sa tibuok kalibotan.

^ par. 3 Gihimo sa mga Saksi ni Jehova.