Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! AGOSTO 2010

Unsay Imong Nahibaloan Bahin sa mga Saksi ni Jehova?

Unsay Imong Nahibaloan Bahin sa mga Saksi ni Jehova?

  Unsay Imong Nahibaloan Bahin sa mga Saksi ni Jehova?

“Daghan akog nabasahan bahin sa mga Saksi ni Jehova diha sa Internet, nakadungog akog mga hungihong ug negatibong mga komento bahin kanila,” misulat ang usa ka gibansayng reporter sa Denmark. “Busa dili maayo ang akong panglantaw sa mga Saksi ni Jehova”

KINI nga reporter nakainterbiyo ug usa ka pamilyang Saksi. Unsay resulta? “Nausab ang akong panglantaw kanila sa dihang nakasulod ako sa ilang balay!” siya misulat. “Tingali ang mga tawo wala kaayo makaila kanila, o kaha manghukom dayon kita kanila. Mao kanay akong panglantaw kanila kaniadto. Ug akong nakita nga sayop diay ko.”—Cecilie Feyling, matod pa niya kang Jydske Vestkysten.

Bahin sa iyang mga pakiglabot sa mga Saksi ni Jehova ingong propesyonal, nakita sa usa ka tig-interbiyog mga aplikante nga konsultant sa dakong kompaniya sa mga tindahan sa Uropa nga sila maoy kasaligang mga trabahador. Busa mga Saksi ang iyang gipangdawat sa trabaho.

Ang mga Saksi ni Jehova ilado sa ilang buluhatong pagsangyaw. Ilang nakita nga ang ubang mga tawo dili gustong maghisgot bahin sa Bibliya, samtang ang uban interesado. Gani, kapin sa pito ka milyon, sa halos tanang nasod, regular nga nagtuon ug Bibliya uban sa mga Saksi ni Jehova, ug sa ngadto-ngadto ang ubang mga estudyante nahimong mga magtutudlo usab sa Bibliya. Pananglitan, sa Amerika, ang National Council of Churches nagreport nga sa 25 ka kinadak-ang mga relihiyon, upat lang ang miuswag, ug usa niana ang mga Saksi ni Jehova.

Nganong minilyon man ang nagtuon ug Bibliya uban sa mga Saksi? Sa unsang paagi ginadumala ang mga pagtuon? Gidahom ba nga mahimong Saksi ang ilang mga estudyante? Bisag dili ka interesadong mahimong Saksi, may katungod kang mahibalo sa tinuod. Busa ayaw pamati sa negatibong mga sulti-sulti, apan susiha ang tinuod. Ang Bibliya diha sa Proverbio 14:15 nag-ingon: “Ang tawong habol ug salabotan motuo sa tanan nga iyang madunggan; ang tawong maalamon mangitag ebidensiya.”—The New English Bible.

Hinaot kini nga gula sa Pagmata! motabang kanimo sa pagbaton ug dugang ug mas tukmang kahibalo bahin sa mga Saksi ni Jehova. Gani, ang imong pagbasa niining magasina nagpakita nga bukas ug timbang kag panghunahuna. Busa sulayi kini: Samtang magbasa ka sa sunod nga upat ka artikulo ug sa mga kahon niini, tan-awa ang gikutlong mga teksto diha sa imong kaugalingong Bibliya. * Kon imo kining himoon, ikaw maalamon ug, sumala pa sa Bibliya, ikaw “hamilig-hunahuna.”—Buhat 17:11.

[Potnot]

^ par. 7 Kon wala kay Bibliya apan maka-Internet ka, masusi nimo ang mga teksto diha sa www.watchtower.org. Makita nimo diha ang kahon nga “Read the Bible Online.” Dugang pa, ang Web site dunay literatura diha sa kapig 380 ka pinulongan.