Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! PEBRERO 2010

Masalbar pa ba ang Imong Kaminyoon?

Masalbar pa ba ang Imong Kaminyoon?

 Masalbar pa ba ang Imong Kaminyoon?

Nakita sa tag-iya nga ang balay kahugnoon na, apan midesisyon sila nga ayohon kana.

INGON ba usab niana ang buot nimong himoon sa imong kaminyoon? Kon mao, unsaon nimo kana paghimo? Sulayi ang mosunod nga mga sugyot.

1 Kinahanglan ang determinasyon.

Kinahanglang sabotan ninyo nga magtinabangay mo sa pagpasig-uli sa kalinaw sa inyong kaminyoon. Isulat ang inyong mahunahunaan nga solusyon diha sa papel. Ang inyong determinasyon makatabang aron kamo magtinabangay sa pagsalbar sa inyong kaminyoon.—Ecclesiastes 4:9, 10.

2 Sayra ang problema.

Unsa ang hinungdan sa problema sa inyong kaminyoon? Isulat kon unsay wala nimo mahimo o kon unsay imong gustong usbon. (Efeso 4:22-24) Lagmit lahi ang imong isulat sa isulat sa imong kapikas.

3 Paghimog tumong.

Unsang mga pag-uswag ang buot nimong mahitabo sa inyong kaminyoon unom ka bulan gikan karon? Isulat kana. Mas daling makab-ot ang tumong kon nahibalo kamo kon unsay gikinahanglan sa pagpauswag sa inyong kaminyoon.—1 Corinto 9:26.

 4 Ipadapat ang tambag sa Bibliya.

Sa dihang mahibalo na mo sa problema ug kon unsay angay ninyong buhaton, susiha kon unsay tambag sa Bibliya. Ang mga prinsipyo diha niana epektibo gihapon hangtod karon. (Isaias 48:17; 2 Timoteo 3:17) Pananglitan, ang Bibliya nagdasig kanimo ug sa imong kapikas nga magmapinasayloon. Sa pagkatinuod, ang Bibliya nag-ingon nga mas maayong ‘palabyon na lang ang kalapasan.’—Proverbio 19:11; Efeso 4:32.

Bisan ug sa sinugdanan daw walay bunga ang imong mga paningkamot, ayawg surender! Ang librong The Case for Marriage naghisgot bahin sa maayong resulta sa usa ka panukiduki, nga nag-ingon: “Wala namo damha nga 86 porsiyento sa problemadong magtiayon nga midesisyon sa pagsalbar sa ilang kaminyoon ang nagmalipayon lima ka tuig sa ulahi.” Bisan kadtong mga magtiayon nga nakasinatig grabeng mga problema nagmalipayon.

Lagmit ingon usab niana ang imong masinati. Ang mga Saksi ni Jehova, nga nagpatik niini nga magasin, nagtuo nga ang Bibliya naundag epektibong mga prinsipyo nga makatabang sa mga magtiayon. Pananglitan, daghang kaminyoon ang natabangan sa dihang ang mga kapikas nagmaluluy-on, nagpakitag simpatiya, ug nagmapinasayloon. Nakat-onan sa mga asawa ang kahinungdanon sa pagpakitag “malinawon ug malumong espiritu,” ug natagamtam sa mga bana ang mga kaayohan sa dili pagkasuko sa hilabihan sa ilang asawa.—1 Pedro 3:4; Colosas 3:19.

Kini nga mga tambag epektibo gayod tungod kay kini gikan sa Bibliya, ug ang Awtor niini nga si Jehova nga Diyos mao ang naghimo sa kahikayan sa kaminyoon. Nganong dili nimo sulayan pagpangutana ang mga Saksi ni Jehova alang sa dugang impormasyon kon sa unsang paagi ang Bibliya makatabang sa imong kaminyoon? *

[Potnot]

^ par. 14 Aron matabangan ang mga pamilya, gipatik sa mga Saksi ni Jehova ang 192-panid nga libro nga nag-ulohang Ang Sekreto sa Kalipay sa Pamilya. Alang sa dugang impormasyon, palihog pagsulat sa nahiangayng adres nga nalista sa panid 5 niining magasina.