Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! 2007-11

 Mga Katarongan Kon Nganong Kasaligan ang Bibliya

5. Nangatuman nga mga Tagna

5. Nangatuman nga mga Tagna

Handurawa ang usa ka tigbalita sa panahon nga gidungog nga husto kanunay ang iyang ginabalita. Kon siya moingon nga mag-ulan, magdala ka ba ug payong?

ANG Bibliya punog mga tagna. * Kining mga tagnaa natuman, sumala sa gipanghimatud-an sa kasaysayan.

Lahi kaayo kini.

Ang mga tagna sa Bibliya sagad espesipiko ug nangatuman bisan sa kinagamyang detalye. Ang tagna kasagaran may kalabotan sa mga butang nga importante kaayo ug sukwahi sa gidahom sa mga tawo nga nagkinabuhi sa panahon nga kini gisulat.

Usa ka talagsaong pananglitan.

Ang karaang Babilonya, nga gitadlasan sa Suba sa Euprates, giingon nga mao ang “sentro sa politika, relihiyon, ug kultura sa karaang Sidlakan.” Niadtong mga 732 W.K.P., ang manalagna nga si Isaias misulat ug makuyawng tagna bahin sa pagkapukan sa Babilonya. Si Isaias mihatag ug espesipikong mga detalye: Usa ka lider nga ginganlag “Ciro” mao ang mopukan unya niini, ang katubigan sa Euprates nga nagsilbing depensa ‘mahubas,’ ug ang mga ganghaan sa siyudad mapasagdang ‘bukas.’ (Isaias 44:27–45:3) Paglabay sa mga 200 ka tuig, sa Oktubre 5, 539 W.K.P., ang tanang detalye sa tagna natuman. Gipanghimatud-an sa Gregong historyano nga si Herodotus (ikalimang siglo W.K.P.) ang paagi sa pagkapukan sa Babilonya. *

Dili tiaw nga detalye.

Si Isaias nagpahayag ug laing kuyaw nga tagna bahin sa Babilonya: “Siya dili na gayod pagapuy-an.” (Isaias 13:19, 20) Dili tiaw ang pagtagna ug bug-os nga kagun-oban sa usa ka dakong siyudad nga dili daling masulong. Siyempre makadahom ka gayod nga ang ingon niana nga siyudad dali nga makabangon gikan sa pagkapukan. Bisan pag nakapabilin makadiyot ang Babilonya human kini gisulong, ang mga pulong ni Isaias sa ngadto-ngadto natuman. Ang magasing Smithsonian nag-ingon nga ang dapit sa karaang Babilonya karon maoy “gun-ob, init, awaaw ug abogon.”

Makapahinuklog gayod kon imong palandongon ang kagrabehon sa tagna ni Isaias. Ang iyang gitagna susama ra sa pagtagna nga ang usa ka modernong siyudad, sama sa New York o London, mapukan sa samang paagi 200 ka tuig gikan karon ug dayon way popanaganang moingon nga dili na gayod kini pagapuy-an pag-usab. Siyempre, mas labaw pang makapahinuklog ang katumanan sa tagna ni Isaias! *

Niini nga serye sa mga artikulo, ato nang nahisgotan ang pipila ka pamatuod nga nakapakombinsir sa milyon-milyong tawo nga kasaligan ang Bibliya. Ilang gitamod gayod kini ingong kasaligang giya sa pagtultol sa ilang lakang. Busa, among gidapit ka sa pagtuon pag dugang sa Bibliya aron masuta nimo kon ikaw makasalig ba usab niini.

^ par. 4 Ang mga balita bahin sa panahon dili matag-an. Apan ang tagna sa Bibliya dinasig sa Diyos, busa siya makamaniobra sa mga panghitabo kon buot niya aron ang tagna matuman.

^ par. 6 Alang sa dugang detalye bahin sa katumanan sa tagna ni Isaias, tan-awa ang mga panid 27-29 sa brosyur nga Usa ka Basahon Alang sa Tanang Tawo, nga gipatik sa mga Saksi ni Jehova.

^ par. 8 Alang sa uban pang mga tagna sa Bibliya ug sa mga panghitabo sa kasaysayan nga nagpamatuod sa katumanan niini, tan-awa ang mga panid 117-33 sa librong Ang Bibliya—Pulong sa Diyos o sa Tawo? nga gipatik sa mga Saksi ni Jehova.

Pagkat-og Dugang

Gikan ba Gayod sa Diyos ang Maayong Balita?

Nganong makaseguro kita nga tinuod ang mensahe sa Bibliya?

Nganong Tun-an ang Bibliya?

Ang Bibliya nagtabang sa minilyong tawo sa tibuok kalibotan nga masayran ang tubag sa dagkong pangutana bahin sa kinabuhi. Gusto ba sab nimong masayran kini?