Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) PEBRERO 2016

 GIKAN SA AMONG ARCHIVES

Ang Sound Car nga Nailhan sa Milyonmilyon

Ang Sound Car nga Nailhan sa Milyonmilyon

“Dinhi sa Brazil, usa lang ang sound car nga gigamit alang sa pag-alagad sa Ginoo, ug kana nailhan sa minilyong tawo, ‘ang sound car sa Watch Tower.’”—Nathaniel A. Yuille, niadtong 1938.

SA SAYONG bahin sa katuigan sa 1930, hinay ang pag-uswag sa buluhaton sa Gingharian didto sa Brazil. Pero pagka-1935, ang mga payunir nga si Nathaniel ug Maud Yuille misulat kang Joseph F. Rutherford, kinsa maoy nanguna kaniadto sa buluhatong pagsangyaw. Sila miingon nga sila “andam nga moalagad bisag asa.”

Si Nathaniel nga usa ka retiradong civil engineer 62 anyos niadtong tungora. Siya ang direktor sa pag-alagad sa usa ka kongregasyon sa mga Saksi ni Jehova sa San Francisco, California, U.S.A. Didto iyang giorganisar ang buluhatong pagsangyaw ug migamit siyag sound system sa pagpakaylap sa maayong balita. Ang iyang kasinatian ug pagkaandam moboluntaryo maoy dakong panalangin sa iyang bag-ong asaynment ingong alagad sa sangang buhatan sa dako ug daghag pinulongan nga teritoryo—ang Brazil.

Niadtong 1936, si Nathaniel ug Maud miabot sa Brazil, kauban sa laing payunir ug interpreter nga si Antonio P. Andrade. Dala nila ang bililhong sound car ug 35 ka ponograpo. Ang Brazil, nga ikalima sa kinadak-ang nasod sa kalibotan, may mga 60 lang ka magmamantala niadtong panahona! Apan kining bag-ong mga gamit sa pagsangyaw makatabang nila nga masangyawan ang minilyon sulod lang sa pipila ka tuig.

Usa ka bulan human sa pag-abot sa magtiayong Yuille, gihikay sa sangang buhatan sa Brazil nga ipahigayon sa siyudad sa São Paulo ang unang kombensiyon nga dunay pagsangyaw. Dayag nga si Maud ang nagdrayb sa sound car ug gianunsiyo nila ang pakigpulong publiko, nga gitambongan ug 110 ka tawo! Ang programa sa kombensiyon nakapadasig sa mga magmamantala sa pagpauswag sa ilang pagpakigbahin sa pagsangyaw. Nakakat-on sila sa pagsangyaw gamit ang mga literatura ug testimony card, maingon man ang mga rekording sa ponograpo sa  Iningles, German, Hungarian, Polish, Spanish ug, sa ulahi, sa Portuguese.

Kini nga sound car nakatabang nga makaabot sa minilyon didto sa Brazil ang maayong balita

Pagka-1937, tulo ka kombensiyon nga dunay pagsangyaw ang gipahigayon sa São Paulo, Rio de Janeiro, ug Curitiba. Tungod niana, mas miuswag ang buluhatong pagsangyaw. Ang sound car nagsunod samtang namalaybalay ang mga kombensiyonista. Si José Maglovsky, nga batan-on pa niadtong panahona, sa ulahi misulat: “Among ibutang ang among mga publikasyon sa Bibliya sa usa ka patonganan, ug samtang ang sound car magsibyag usa ka girekord nga mensahe, kami makigsulti sa mga tawo nga manggawas sa ilang mga balay sa pagtan-aw kon unsay nahitabo.”

Ang bawtismo ginahimo sa suba, samtang ang mga nangaligo nagpabulad diha sa duol. Maayo kaayo kadto nga kahigayonan sa pagsangyaw sa maayong balita gamit ang sound car! Ang tingog ni Brader Rutherford naglanoglanog gikan sa mga amplipayer samtang naghatag siyag pakigpulong sa bawtismo. Ang mga tawo nga nainteres nag-alirong sa sound car, nga naminaw sa pakigpulong nga gihubad ngadto sa Portuguese. Human niana, ang mga kandidato sa bawtismo gituslob sa tubig samtang gipatokar ang mga awit sa Gingharian sa Polish nga pinulongan. Ang mga igsoon miduyog sa pagkanta gamit ang lainlaing pinulongan. Ang 1938 Yearbook nag-ingon: “Kini nagpahinumdom namo kon sa unsang paagi sa Pentekostes ang matag usa nakasabot [sa mensahe] diha sa iyang kaugalingong pinulongan.”

Human sa mga kombensiyon, matag Dominggo, mag-ulan man o mag-init, ang girekord nga mga pakigpulong sa Bibliya ipatokar gikan sa sound car ug madungog sa mga tawo diha sa mga parke, kabalayan, ug mga pabrika sa sentro sa São Paulo ug sa sikbit nga mga lungsod. Ang sound car magsibyag binulan nga programa ngadto sa 3,000 ka residente sa komunidad sa mga sanlahon nga 97 kilometros amihanan-kasadpan sa São Paulo. Sa ngadtongadto, natukod didto ang usa ka mauswagong kongregasyon. Bisan pa sa ilang grabeng sakit, ang maong mga magmamantala sa Gingharian gihatagag permiso nga moduaw sa laing komunidad sa mga sanlahon dala ang makapahupay nga mensahe sa Bibliya.

Ang girekord nga mga mensahe sa Portuguese nga pinulongan miabot sa hinapos sa 1938. Panahon sa Kalagkalag, ang sound car milibot sa mga sementeryo nga nagpatokar sa mga rekording nga “Hain ang mga Patay?,” “Jehova,” ug “Bahandi,” nga napaminawan sa kapig 40,000 ka tawo!

Ang mga klerigo naglagot sa maisogong pagmantala sa mga Saksi bahin sa kamatuoran sa Bibliya ug sagad ilang sulsolan ang mga awtoridad aron idili ang sound car. Si Sister Yuille nahinumdom sa usa ka higayon dihang ang pari naghulhog sa magubtanong panon nga libotan ang sound car. Apan ang mayor ug ang kapolisan nangabot ug namati sa tibuok programa. Paglakaw sa mayor, nagdala siyag literatura sa Bibliya. Walay nahitabong kagubot niadtong adlawa. Bisan pa sa mga pagsupak, ang report sa 1940 Yearbook bahin sa Brazil nag-ingon nga ang tuig 1939 mao “ang kinamaayohang panahon sa pag-alagad [kang Jehova] ug sa pagmantala sa iyang ngalan.”

Ang pag-abot sa “sound car sa Watch Tower” mao gayoy sinugdanan sa pag-uswag sa buluhatong pagsangyaw sa Brazil. Dako kinig natabang nga makaabot sa minilyon ang mensahe sa Gingharian. Bisag ang maong gibantog nga sakyanan gibaligya niadtong 1941, ang mga Saksi ni Jehova nagpadayon sa pagmantala sa maayong balita ngadto sa matinud-anog kasingkasing nga mga tawo sa dakong teritoryo sa Brazil.—Gikan sa among archives sa Brazil.