Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) MAYO 2016

Pahimusli sa Bug-os ang mga Tagana ni Jehova

Pahimusli sa Bug-os ang mga Tagana ni Jehova

“Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan.”ISA. 48:17.

AWIT: 117, 114

1, 2. (a) Giunsa pag-isip sa mga Saksi ni Jehova ang Bibliya? (b) Unsay paborito nimong bahin sa Bibliya?

GIMAHAL sa mga Saksi ni Jehova ang Bibliya. Kini nagtaganag kasaligang instruksiyon ug makatabang nato nga makabatog paghupay ug paglaom. (Roma 15:4) Giisip nato ang Bibliya, dili ingong koleksiyon sa tawhanong mga ideya, kondili “ingong pulong sa Diyos.”—1 Tes. 2:13.

2 Segurado nga kitang tanan dunay paboritong bahin sa Bibliya. Ang pipila ganahan kaayo sa mga Ebanghelyo, nga naghatag ug nindot nga hulagway sa personalidad ni Jehova ingon sa gipakita ni Jesus. (Juan 14:9) Ang uban ganahan sa mga bahin sa Bibliya nga naghisgot ug mga tagna—tingali ang Pinadayag, nga naghatag natog ideya sa “mga butang nga kinahanglang mahitabo sa dili-madugay.” (Pin. 1:1) Ug kinsa nato ang wala mahupay sa pagbasa sa Salmo o wala makakuhag praktikal nga mga leksiyon gikan sa Proverbio? Ang Bibliya usa gayod ka basahon para sa tanang tawo.

3, 4. (a) Giunsa nato pag-isip ang atong mga publikasyon? (b) Unsang mga publikasyon ang gitagana para sa espesipikong grupo sa mga tawo?

3 Tungod kay atong gimahal ang Bibliya, gimahal sab nato ang atong binase sa Bibliyang mga publikasyon. Pananglitan, atong gipabilhan ang espirituwal nga pagkaon nga atong nadawat pinaagig mga libro, brosyur, magasin, ug ubang literatura. Nahibalo kita nga  kini nga mga tagana ni Jehova makatabang nato sa pagpabiling alerto ug busog sa espirituwal, ug ‘himsog sa pagtuo.’—Tito 2:2.

4 Gawas sa mga publikasyon nga para sa mga Saksi ni Jehova sa katibuk-an, duna pod tay mga publikasyon nga gitagana para sa espesipikong mga magbabasa. Ang pipila ka publikasyon ilabinang gitagana sa pagtabang sa mga batan-on; ang uban sa pagtabang sa ilang ginikanan. Ang kadaghanang publikasyon nga naimprenta ug naa sa atong website giandam para sa mga dili Saksi. Ang dagayang espirituwal nga pagkaon nagpahinumdom kanato nga gituman ni Jehova ang iyang saad nga maghikay siyag “usa ka bangkete” sa lamiang pagkaon para sa tanang katawhan.—Isa. 25:6.

5. Unsa ang seguradong gipabilhan ni Jehova?

5 Lagmit, gusto natong makabaton ug dugang panahon sa pagbasa sa Bibliya ug sa atong mga publikasyon. Makaseguro kita nga gipabilhan ni Jehova ang atong mga paningkamot sa ‘pagpalit sa nahiangay nga panahon’ pinaagi sa regular nga pagbasa ug pagtuon sa Bibliya. (Efe. 5:15, 16) Tinuod, dili tingali kanunayng managsama ang gidaghanon sa panahon nga atong magugol alang sa tanang espirituwal nga pagkaon. Pero, angay tang mag-amping sa kapeligrohan. Unsa kini?

6. Nganong dili tingali nato mapahimuslan ang pipila ka tagana ni Jehova?

6 Dunay kapeligrohan nga basin dili kita makapahimulos sa pipila ka espirituwal nga tagana kay naghunahuna ta nga dili kana mapadapat kanato. Pananglitan, komosta kon ang usa ka bahin sa Bibliya morag dili praktikal sa atong kahimtang? O komosta kon dili para nato pangunang gisulat ang usa ka publikasyon? Dalidalion ra ba nato kanag basa o kaha dili na lang gyod basahon? Kon mao, atong gihikawan ang atong kaugalingon sa impormasyon nga dako untag ikatabang kanato. Unsaon nato paglikay sa maong kapeligrohan? Angay natong hinumdoman nga ang Diyos mao ang Tinubdan sa atong espirituwal nga pagkaon. Pinaagi kang propetang Isaias, siya miingon: “Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan.” (Isa. 48:17) Makatabang ang pagkonsiderar sa tulo ka sugyot kon sa unsang paagi makabenepisyo ta sa tanang bahin sa Bibliya ug sa lainlaing matang sa espirituwal nga pagkaon nga gitagana kanato.

MGA SUGYOT ALANG SA MAPUSLANONG PAGBASA SA BIBLIYA

7. Nganong angay natong basahon ang Bibliya uban ang bukas nga hunahuna?

7 Pagbasa uban ang bukas nga hunahuna. Ang Bibliya tin-awng nag-ingon nga “ang tibuok Kasulatan inspirado sa Diyos ug mapuslanon.” (2 Tim. 3:16) Tinuod, may pipila ka bahin sa Bibliya nga sa sinugdan nagtumong sa usa ka indibiduwal o grupo. Kanay rason kon nganong angay natong basahon ang Bibliya uban ang bukas nga hunahuna. “Dihang magbasa kog Bibliya, akong hinumdoman nga dili lang usa ka leksiyon ang mahimong makat-onan sa usa ka asoy,” miingon ang usa ka brader. Siya midugang: “Ang paghinumdom niini nagdasig nako sa pagsusi pag dugang.” Sa dili pa ta magbasa sa Pulong sa Diyos, angay tang moampo alang sa bukas nga hunahuna ug kaalam aron masabtan ang mga leksiyon nga gusto ni Jehova nga atong makat-onan.—Esd. 7:10; basaha ang Santiago 1:5.

Bug-os ba nimong gipahimuslan ang imong pagbasa sa Bibliya? (Tan-awa ang parapo 7)

8, 9. (a) Dihang magbasa sa Bibliya, unsay mahimo natong ipangutana sa kaugalingon? (b) Unsay atong makat-onan bahin kang Jehova gikan sa mga kuwalipikasyon alang sa mga ansiyano?

8 Pangutana. Samtang magbasa ka sa Bibliya, paggahig panahon sa pagpamalandong, ug pangutan-a ang imong kaugalingon: ‘Unsay gisulti niini kanako bahin kang Jehova? Unsaon nako pagpadapat kini nga impormasyon? Unsaon nako ni paggamit sa pagtabang sa uban?’ Dihang atong pamalandongon ang maong mga pangutana, seguradong mas makabenepisyo ta sa atong pagbasa sa Bibliya. Ingong pananglitan, hunahunaa ang Kasulatanhong mga kuwalipikasyon para sa mga ansiyano.  (Basaha ang 1 Timoteo 3:2-7.) Tungod kay ang kadaghanan kanato dili man mga ansiyano, maghunahuna tingali kita nga kini dili kaayo mapadapat kanato. Pero kon atong konsiderahon ang pipila sa posibleng mga tubag sa mosunod nga mga pangutana, atong makita nga kitang tanan daghan ug makat-onan gikan niini nga mga kuwalipikasyon.

9 Unsay gisulti niini kanako bahin kang Jehova? Pinaagi sa paghatag niini nga mga kuwalipikasyon, gipakita ni Jehova nga duna siyay taas nga sukdanan alang niadtong nagapanguna sa kongregasyon. Gidahom niya nga sila maghatag ug maayong ehemplo, kay sila manubag kaniya kon giunsa nila pag-atiman ang kongregasyon, “nga iyang gipalit pinaagi sa dugo sa iyang kaugalingong Anak.” (Buh. 20:28) Gusto ni Jehova nga kita mobating luwas ilalom sa pag-atiman sa tinudlong mga ansiyano. (Isa. 32:1, 2) Busa kining Kasulatanhong mga kuwalipikasyon para sa mga ansiyano nagpahinumdom nato kon unsa ka dako ang gugma ni Jehova kanato.

10, 11. (a) Dihang magbasa ta sa mga kuwalipikasyon para sa mga ansiyano, unsaon nato pagpadapat ang maong impormasyon? (b) Unsaon nato paggamit kini nga impormasyon sa pagtabang sa uban?

10 Unsaon nako pagpadapat kini nga impormasyon? Matag karon ug unya, angayng susihon sa usa ka ansiyano ang iyang kaugalingon base niining espirituwal nga mga kuwalipikasyon aron makita kon unsay angay niyang pauswagon. Ang usa ka brader nga ‘nagapangab-ot sa katungdanan’ ingong tigdumala kinahanglang maghatag ug bug-os nga pagtagad niini nga mga kuwalipikasyon, kay siya angayng maningkamot sa pagkab-ot niini kutob sa iyang maarangan. (1 Tim. 3:1) Sa pagkatinuod, ang matag Kristohanon makakat-on sa mga kuwalipikasyon nga nasulat niining mga bersikuloha, kay kadaghanan niini naglakip sa mga butang nga gidahom ni Jehova sa tanang Kristohanon. Pananglitan, kitang tanan angayng magmakataronganon ug magbatog maayong panghunahuna. (Filip. 4:5; 1 Ped. 4:7) Samtang ginapamatud-an sa mga ansiyano nga sila “mga panig-ingnan alang sa panon,” kita makakat-on kanila ug ‘makasundog sa ilang pagtuo.’—1 Ped. 5:3; Heb. 13:7.

11 Unsaon nako paggamit kini nga impormasyon sa pagtabang sa uban? Magamit nato ang listahan sa mga kuwalipikasyon alang sa mga ansiyano aron tabangan ang mga interesado o mga Bible study nga makita ang kalainan sa mga ansiyano sa mga Saksi ni Jehova ug sa mga lider sa Kakristiyanohan. Dugang  pa, samtang atong basahon ang mga kuwalipikasyon, ato tingaling mahinumdoman ang paningkamot sa mga ansiyano sa atong kongregasyon alang sa atong kaayohan. Ang pagpamalandong sa ilang pagkugi makapalalom sa atong pagtahod niadtong “naghago” sa atong taliwala. (1 Tes. 5:12) Ug kon mas tahoron nato kining kugihang mga ansiyano, sila mas magmalipayon.—Heb. 13:17.

12, 13. (a) Gamit ang mga himan nga mabatonan, unsang pagpanukiduki ang atong mahimo? (b) Paghatag ug pananglitan kon sa unsang paagi ang dugang impormasyon makatabang nato nga makita ang mga leksiyon nga dili daling mamatikdan.

12 Panukiduki. Gamit ang mga himan nga mabatonan, mahimo natong susihon ang mosunod nga mga impormasyon:

  • Kinsay nagsulat niining basahona sa Kasulatan?

  • Asa ug kanus-a kini gisulat?

  • Unsa ang importanteng mga hitabo dihang gisulat kini nga basahon sa Bibliya?

Kini nga mga impormasyon makatabang nato nga makita ang mga leksiyon nga dili daling mamatikdan.

13 Pananglitan, konsideraha ang Ezequiel 14:13, 14, nga nag-ingon: “Kon mahitungod sa usa ka yuta, kon kana makahimog sala batok kanako pinaagi sa paglihok nga dili-matinumanon, ako magatuy-od usab sa akong kamot batok niana ug balion alang niana ang mga tuhoganan nga niini gituhog ang siningsing nga mga tinapay, ug akong ipadangat niana ang gutom ug laglagon gikan niana ang yutan-ong tawo ug ang binuhing hayop. ‘Ug kon kining tulo ka tawo anaa sa taliwala niana, si Noe, si Daniel ug si Job, tungod sa ilang pagkamatarong sila makaluwas sa ilang kalag,’ mao ang giingon sa Soberanong Ginoong Jehova.” Pinaagi sa pagpanukiduki, atong makat-onan nga kini nga bahin sa Ezequiel gisulat sa mga tuig 612 B.C.E. Nianang panahona, si Noe ug Job gatosan ka tuig nang nangamatay, ug ang ilang pagkamatinumanon anaa sa panumdoman sa Diyos. Pero si Daniel buhi pa. Gani, tingali mga 20 anyos lang siya dihang gisultian siya ni Jehova nga siya matarong sama kang Noe ug Job. Unsay atong makat-onan niini? Si Jehova nakakita ug nagpabili sa pagkamatinumanon sa tanan niyang mga magsisimba, lakip na niadtong mga batan-on.—Sal. 148:12-14.

PAHIMUSLI ANG LAINLAING PUBLIKASYON

14. Sa unsang paagi ang publikasyon nga gipatik alang sa mga batan-on makatabang kanila, ug sa unsang paagi kini makatabang usab sa uban? (Tan-awa ang hulagway sa sinugdan sa artikulo.)

14 Sama nga kita makabenepisyo sa pagbasa sa tanang bahin sa Pulong sa Diyos, kita makabenepisyo usab sa tanang espirituwal nga pagkaon nga gitagana kanato. Tagda ang pipila ka pananglitan. Publikasyon para sa mga batan-on. Sa di pa dugayng katuigan, daghan sa atong mga literatura ang gipatik alang sa mga batan-on. [1] Ang pipila niini gidisenyo sa pagtabang kanila sa pag-atubang sa presyur sa eskuylahan o sa mga hagit sa pagkabatan-on. Sa unsang paagi kitang tanan makabenepisyo sa pagbasa niining mga publikasyona? Kon basahon nato kana, mapahinumdoman ta sa mga problemang giatubang sa atong matinumanong mga batan-on. Busa, mas makatabang ug makadasig ta kanila.

15. Nganong ang gulanggulang nga mga Kristohanon angayng mainteres sa mga publikasyon nga para sa mga batan-on?

15 Kita usab nakasinati sa mga problema nga gihisgotan diha sa mga publikasyon para sa mga batan-on. Kitang tanan angayng modepensa sa atong pagtuo, magkontrolar sa atong emosyon, magsalikway sa makadaot nga impluwensiya, ug maglikay sa dili maayong panagkauban ug kalingawan. Kini ug ang uban pang topiko gihisgotan diha sa mga publikasyon para sa mga tin-edyer. Angay bang ikaulaw sa gulanggulang nang mga Kristohanon ang pagbasag mga publikasyon nga para sa mga batan-on? Dili gayod! Bisag kini  gidisenyo sa paagi nga makadani sa mga batan-on, ang mga impormasyon niini gibase sa way paglubad nga mga prinsipyo sa Kasulatan, ug kitang tanan makabenepisyo niining espirituwal nga mga tagana.

16. Unsay laing paagi nga ang atong mga publikasyon nagtabang sa mga batan-on?

16 Gawas sa pagtabang sa mga batan-on sa pag-atubang sa ilang mga problema, ang atong mga publikasyon nagtabang nila nga mouswag sa espirituwal ug masuod kang Jehova. (Basaha ang Ecclesiastes 12:1, 13.) Ang gulanggulang nga mga Kristohanon makabenepisyo usab. Pananglitan, ang Abril 2009 nga gula sa Pagmata! dunay artikulo nga “Mga Batan-on Nangutana . . . Unsaon Nako Paghimong Makalingaw ang Pagbasa sa Bibliya?” Ang artikulo dunay pipila ka sugyot ug may kahon nga puwedeng guntingon ug tipigan ingong reperensiya. Nakabenepisyo ba sab ang mga hamtong niining artikuloha? Usa ka 24 anyos nga asawa ug inahan miingon: “Sa una, laayan kong magbasa sa Bibliya. Akong gisunod ang mga sugyot niining artikuloha ug gigamit ang panid nga guntingon. Karon maghinamhinam na ko sa pagbasa sa Bibliya. Akong nakita nga nagkaharmonya ang mga asoy diha sa mga basahon niini. Mas ganahan na ko karon nga mobasa sa Bibliya.”

17, 18. Sa unsang paagi makabenepisyo ta sa pagbasag publikasyon nga para sa publiko? Paghatag ug pananglitan.

17 Publikasyon para sa publiko. Sukad sa 2008, atong napahimuslan ang tun-anang edisyon sa Bantayanang Torre, nga pangunang gisulat alang sa mga Saksi ni Jehova. Pero komosta ang atong mga magasin nga pangunang gisulat para sa publiko? Makabenepisyo ba sab ta sa pagbasa niana? Tagda ang usa ka ilustrasyon. Hunahunaa nga usa ka adlaw niana, sa wala pa magsugod ang pakigpulong publiko, imong nakita nga miabot sa Kingdom Hall ang tawo nga imong giimbitar. Seguradong nalipay ka. Samtang nagsulti ang mamumulong, lagmit naghunahuna ka sa imong bisita. Tingali naghunahuna ka kon unsay epekto kaniya sa iyang nadunggang impormasyon ug kon sa unsang paagi kana makapabag-o sa iyang kinabuhi. Tungod niana, human sa pakigpulong, mas napabilhan nimo ang maong topiko.

18 Makasinati tag sama niana dihang magbasa tag publikasyon nga para sa publiko. Pananglitan, ang publikong edisyon sa Bantayanang Torre naghisgot ug mga topiko sa Kasulatan sa paagi nga masabtan sa dili Saksing magbabasa. Tinuod sab kana sa daghang artikulo nga makita sa jw.org, sama sa mga seksiyong “Tubag sa mga Pangutana Bahin sa Bibliya” ug “Komon nga mga Pangutana.” Kon atong basahon ang maong mga impormasyon, mas molalom ang atong apresasyon sa mga kamatuoran nga ato nang nahibaloan. Dugang pa, makakat-on tingali kitag bag-ong mga paagi sa pagpatin-aw sa atong mga gituohan dihang makigbahin ta sa ministeryo. Sa susama, ang Pagmata! kanunayng nagpalig-on sa atong pagtuo nga naglungtad ang matuod nga Diyos, ug kini nagtabang nato sa pagkat-on kon unsaon pagdepensa sa atong pagtuo.—Basaha ang 1 Pedro 3:15.

19. Unsaon nato pagpakita nga kita mapasalamaton sa mga tagana ni Jehova?

19 Tin-aw, si Jehova naghatag kanatog abundang tagana sa pagtagbaw sa atong “espirituwal nga panginahanglan.” (Mat. 5:3) Hinaot nga padayon natong pahimuslan ang tanang espirituwal nga tagana nga atong madawat. Sa ingon, atong gipakita nga kita mapasalamaton sa Usa nga nagtudlo kanato alang sa atong kaayohan.—Isa. 48:17.

^ [1] (parapo 14) Ang maong mga publikasyon naglakip sa librong Mga Pangutanang Gisukna sa mga Batan-on—Mga Tubag nga Mosaler, Tomo 1 ug 2, ug sa seryeng “Mga Batan-on Nangutana,” nga karon mabasa lang online.