Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) MARSO 2016

Sa Unsang Paagi Makatabang Ka sa Pagpalig-on sa Atong Panaghiusa?

Sa Unsang Paagi Makatabang Ka sa Pagpalig-on sa Atong Panaghiusa?

“Gikan kaniya ang tibuok lawas . . . takdo nga pagkadugtong ug gihimong magtambayayongay.”—EFE. 4:16.

AWIT: 53, 107

1. Sukad sa sinugdan, unsay makita diha sa kalalangan ug sa mga alagad sa Diyos?

SUKAD sa sinugdan sa kalalangan, dayag gayod ang panaghiusa sa Amahan ug Anak. Ingong personipikasyon sa kaalam, ang Anak, nga panganay sa kalalangan sa Diyos miingon: “Didto ako tupad [kang Jehova] ingon nga batid nga magbubuhat, ug ako iyang gikahinangpan pag-ayo sa matag adlaw.” (Prov. 8:30) Ang Amahan ug Anak nagtinabangay, ug ilang gipatungha ang lainlaing linalang nga atong makita karon. Ang pagtinabangay makita usab diha sa mga alagad sa Diyos. Makita nato kanang hiyasa panahon sa pagtukod sa arka sa adlaw ni Noe; sa pagpatindog, pagbungkag, ug pagbalhin sa tabernakulo samtang ang katawhan sa Diyos nagpanaw sa kamingawan; ug bisan sa pagpatugtog ug musika ug pag-awit ug mga pagdayeg kang Jehova sa templo. Kanang tanan nagkinahanglag pagtinabangay.—Gen. 6:14-16, 22; Num. 4:4-32; 1 Cron. 25:1-8.

2. (a) Unsang hiyas ang makita diha sa unang Kristohanong kongregasyon? (b) Unsang mga pangutana ang atong tubagon?

2 Makita usab ang pagtinabangay diha sa unang Kristohanong kongregasyon ubos sa ulo niini, si Jesu-Kristo. Gipatin-aw ni  apostol Pablo nga bisag ang matag dinihogang Kristohanon may “nagkadaiyang mga gasa” ug nakigbahin sa “nagkadaiyang mga pag-alagad” ug ‘nagkadaiyang mga kalihokan,’ silang tanan maoy bahin sa ‘usa ka lawas.’ (Basaha ang 1 Corinto 12:4-6, 12.) Komosta karon? Sa unsang paagi kita padayong magkahiusa sa pagsangyaw sa maayong balita? Ug sa unsang paagi kita magtinabangay diha sa kongregasyon ug sa pamilya?

MAGTINABANGAY SA PAGSANGYAW

3. Unsang panan-awon ang nakita ni apostol Juan?

3 Sa hinapos sa unang siglo C.E., si apostol Juan nakakita diha sa panan-awon ug pito ka manulonda, nga ang matag usa naghuyop ug trompeta. Dihang ang ikalimang manulonda mihuyop sa iyang trompeta, nakita ni Juan ang “usa ka bituon” nga nahulog gikan sa langit. Ang “bituon” nagkupot ug yawi nga maoy iyang giabli sa kahiladman. Miutbo ang mabagang aso, ug gikan niini nanggula ang mga dulon. Imbes daoton ang mga tanom, ang simbolikong mga dulon mihugpa sa “mga tawo . . . nga walay timbre sa Diyos diha sa ilang mga agtang.” (Pin. 9:1-4) Walay duhaduha nga si Juan nahibalo kon unsa ka dako ang kadaot nga mahitabo kon mohugpa ang mga dulon. Dili ba mihugpa ang mga dulon sa karaang Ehipto sa adlaw ni Moises? (Ex. 10:12-15) Ang simbolikong mga dulon nga nakita ni Juan nag-ilustrar sa dinihogang mga Kristohanon nga nagmantala sa masakit nga mensahe sa paghukom. Miduyog kanila ang minilyon nga may yutan-ong paglaom. Tungod kay nahiusa kita sa pagsangyaw, mihuyang ang impluwensiya sa bakak nga relihiyon nga gikontrolar ni Satanas.

4. Unsay buluhaton sa katawhan sa Diyos karon, ug pinaagi lamang sa unsa nga mahimo nila kini?

4 Ang katawhan ni Jehova dunay dakong buluhaton sa pagsangyaw sa “maayong balita” sa tibuok yuta sa dili pa matapos kining sistemaha. (Mat. 24:14; 28:19, 20) Kini naglakip sa pagdapit kang “bisan kinsa nga giuhaw” nga moinom sa “tubig sa kinabuhi nga walay bayad.” (Pin. 22:17) Ingong mga membro sa kongregasyon, sa unsang paagi kita molampos sa paghimo niini? Pinaagi lamang sa panaghiusa ug pagtinabangay.—Efe. 4:16.

5, 6. Sa unsang paagi kita nahiusa samtang nagsangyaw sa maayong balita?

5 Aron mapaambit nato ang maayong balita sa Gingharian ngadto sa daghang tawo kutob sa mahimo, kinahanglang himoon nato ang atong pagsangyaw sa organisadong paagi. Busa, gihatagan kitag mga instruksiyon. Ang giya nga gihatag pinaagi sa mga kongregasyon sa tibuok kalibotan nakatabang kanato nga magkahiusa sa pagsangyaw. Human kita magtigom alang sa pagsangyaw, kita moadto sa mga tawo aron imantala ang mensahe sa Gingharian. Pinaagi sa pagpakigsulti sa mga tawo ug pinaagi sa minilyong kopya sa binase sa Bibliyang mga publikasyon, atong gipakaylap ang mensahe. Naningkamot ka ba sa pagsunod sa instruksiyon nga makigbahin sa espesyal nga mga kampanya sa pagsangyaw? Sa paghimo niana, ikaw nahiusa sa minilyong uban pa sa pagmantala sa mensahe sa “manulonda nga naglupad sa kinatung-an sa langit,” nga gihisgotan sa Pinadayag 14:6.

6 Makapalipay gayod nga mabasa sa Tinuig nga Basahon ang resulta sa atong buluhaton sa tibuok kalibotan! Hunahunaa usab ang atong panaghiusa samtang kita nanagtag ug mga imbitasyon alang sa rehiyonal, espesyal, ug internasyonal nga mga kombensiyon. Niini nga mga okasyon, atong madungog ang makapadasig nga binase sa Bibliyang mga pakigpulong ug makita ang mga drama ug mga pasundayag. Kini nga mga bahin sa programa sagad nagpasiugda sa mahigugmaong hangyo sa Diyos nga alagaron siya kutob sa atong maarangan. Ang paghandom sa kamatayon ni Jesus makapahiusa usab kanato. Agig apresasyon sa dili takos nga kalulot sa Diyos ug pagsugot sa sugo ni Jesus, kita magtigom  alang nianang tinuig nga okasyon, human sa pagsalop sa adlaw sa Nisan 14. (1 Cor. 11:23-26) Ug dili lang bawtismadong mga Saksi ang motambong niini. Pipila ka semana una ang Memoryal, atong kobrehan ang teritoryo sa kongregasyon kutob sa atong mahimo, nga magdapit sa uban sa pagduyog kanato nianang importanteng okasyon.

7. Dihang kita magtinabangay, unsay atong mapalampos?

7 Ang usa lang ka dulon dili makapahinabog dakong kadaot. Sa susama, ang atong tagsatagsa ka paningkamot wala tingali kaayoy epekto. Apan pinaagi sa pagtinabangay, atong matabangan ang minilyong mga tawo nga makaila sa usa nga takos sa tanang pagdayeg ug pasidungog, si Jehova! Hinunoa, dili lang kini ang paagi nga ang atong pagtinabangay makapalambo sa panaghiusa sa katawhan sa Diyos.

MAGTINABANGAY DIHA SA KONGREGASYON

8, 9. (a) Unsang ilustrasyon ang gigamit ni Pablo sa pagtudlo sa mga Kristohanon nga angay silang magpabiling nahiusa? (b) Sa unsang paagi kita makigkooperar diha sa kongregasyon?

8 Sa iyang sulat sa mga taga-Efeso, gipatin-aw ni Pablo kon giunsa pag-organisar ang kongregasyon ug gipasiugda niya ang panginahanglan nga ‘motubo sa tanang butang.’ (Basaha ang Efeso 4:15, 16.) Unsay makatabang sa matag usa kanato sa pagkab-ot sa maong tumong? Gigamit ni Pablo ang lawas sa tawo ingong pananglitan sa pagpatin-aw nga ang matag usa makatabang nga padayong mahiusa ang kongregasyon ilalom sa ulo niini, si Jesu-Kristo. Siya naghisgot bahin sa pagtinabangay “pinaagi sa matag lutahan nga naghatag sa gikinahanglan.” Sa unsang paagi ang matag usa kanato, bata man o tigulang, kusgan o luya, makapalambo sa panaghiusa ug espirituwalidad sa kongregasyon?

9 Ang usa ka paagi mao ang pagpasakop ug pagtahod niadtong gitudlo ni Jesus nga mohatag ug instruksiyon sa kongregasyon, ang mga ansiyano. (Heb. 13:7, 17) Dili tingali kini kanunayng sayon. Apan, makapangayo tag giya sa Diyos. Ang iyang aktibong puwersa makatabang nato nga kinasingkasing nga paluyohan ang mga kahikayan sa kongregasyon. Busa kon usahay malisdan kita sa pagsunod sa instruksiyon nga gihatag, angay natong palandongon kon sa unsang paagi ang atong mapainubsanong pagkooperar makapalambo sa panaghiusa sa kongregasyon. Dugang pa, kon kita makigkooperar, molig-on ang atong gugma sa usag usa.

10. Sa unsang paagi ang ministeryal nga mga alagad makatabang sa pagpalambo sa panaghiusa sa kongregasyon? (Tan-awa ang hulagway sa sinugdan sa artikulo.)

10 Ang ministeryal nga mga alagad makatabang usab sa pagpalambo sa panaghiusa sa kongregasyon. Bisag unsay ilang edad, kini nga mga brader kinabubut-ong naghago alang sa kaayohan sa tanan, ug kana gipabilhan pag-ayo. Pananglitan, sila nagtabang sa mga ansiyano sa pagseguro nga dunay igong suplay sa mga publikasyon alang sa ministeryo. Dugang pa, sila nag-atiman usab sa regular nga pagpanghinlo ug pagmentinar sa Kingdom Hall, ug sila nag-abiabi sa mga bisita nga motambong sa tigom. Kon kita makigkooperar kanila, kita makatampo sa kahapsay sa kongregasyon.—Itandi ang Buhat 6:3-6.

11. Sa unsang paagi ang bata-batang mga brader makapalambo sa panaghiusa sa kongregasyon?

11 Daghang hamtong nga brader ang nag-abagag mga responsabilidad sa kongregasyon sulod sa daghang katuigan. Apan kay nagkatigulang na, limitado na ang ilang mahimo, maong gikinahanglan ang mga kausaban. Ang bata-batang mga brader dakog ikatabang. Bisag kulang pa silag kasinatian, pinaagi sa pagbansay sila matabangan sa pagdawat ug dugang responsabilidad. Pagkamaayo kon ang ministeryal nga mga alagad maningkamot aron mokuwalipikar  ingong mga ansiyano! (1 Tim. 3:1, 10) Ang bata-batang mga ansiyano mas miuswag ug nahimo pa ganing mga tigdumala sa sirkito, nga nag-alagad sa mga igsoon sa daghang kongregasyon. Mapasalamaton gayod kita sa kinabubut-ong pag-alagad niining bata-batang mga brader.—Basaha ang Salmo 110:3; Ecclesiastes 12:1.

MAGTINABANGAY DIHA SA PAMILYA

12, 13. Sa unsang paagi magtinabangay ang matag usa diha sa pamilya?

12 Komosta diha sa pamilya? Sa unsang paagi nato mapalambo ang kooperasyon diha sa atong pamilya? Nakita sa daghan nga ang epektibo nga Pamilyahanong Pagsimba kada semana makatabang sa pagpalig-on sa gugma tali sa mga bata ug tigulang. Niining makapalipayng mga higayon, kita maghisgot bahin sa espirituwal nga mga butang, ug kini makapalambo sa panaghiusa sa pamilya. Ang pag-ensayog mga presentasyon makatabang sa pamilya nga mahimong epektibo sa pagsangyaw. Ug dihang ang mga membro sa pamilya mopahayag sa ilang komento bahin sa Pulong sa Diyos, sila masuod sa usag usa kay sila parehong nahigugma kang Jehova ug gustong mohimo sa iyang kabubut-on.

Ang pamilyahanong pagsimba makapalig-on sa gugma tali sa mga bata ug tigulang (Tan-awa ang parapo 12, 15)

13 Sa unsang paagi magkatinabangay ang mga magtiayon alang sa kadayeganan ni Jehova? Kon ang magtiayon parehong matinumanon nga mga alagad ni Jehova, sila magmalipayon ug magkahiusa. Si Abraham ug Sara, Isaac ug Rebeca, Elkana ug Ana parehong nagpahayag ug gugma alang sa ilang kapikas. Kinahanglang himoon usab nato kana. (Gen. 26:8; 1 Sam. 1:5, 8; 1 Ped. 3:5, 6) Kana makapahiusa kanato sa atong kapikas ug makapasuod nato sa atong langitnong Amahan.—Basaha ang Ecclesiastes 4:12.

14. Kon ang imong kapikas wala mag-alagad kang Jehova, unsay imong mahimo aron magpabiling lig-on ang inyong kaminyoon?

14 Angayng likayan sa mga Kristohanon ang pagpayugo nga dili timbang sa mga dili magtutuo. (2 Cor. 6:14) Komosta ang atong mga igsoon kansang kapikas dili Saksi? Ang pipila nga nag-alagad karon sa Diyos minyo na dihang nakakat-on sa kamatuoran, ug dili Saksi ang ilang kapikas. Bisan pa niana, ang pagpadapat sa mga prinsipyo sa Bibliya makapalambo sa panaghiusa diha sa pamilya. Naglakip kana sa pagkooperar kutob sa mahimo basta walay malapas nga prinsipyo. Lisod tingali kana, apan hunahunaa ang ganti nga imong madawat. Ang pagpadapat sa mga prinsipyo sa Bibliya mahimong lisod usab kon ang usa ka kapikas mopahilayo sa kongregasyon. Nahitabo kini sa usa ka sister nga ginganlag Mary. Siya ug ang iyang banang si David parehong alagad ni Jehova, apan mga 25 ka tuig kanhi, si David mihunong sa pagtambog tigom. Si Mary padayong mitambong sa mga tigom ug kombensiyon ug naningkamot sa pagpadapat sa mga prinsipyo sa Bibliya diha sa panimalay, nga naglakip sa pagtudlo sa ilang unom ka anak. Dihang ang mga anak nanagko na ug mibiya sa balay, gibati ni Mary nga nag-inusara na lang siya. Unya misugod si David pagbasa sa mga magasin nga gituyo pagbilin ni Mary para niya. Sa ngadtongadto, mibalik ug tambong si David sa Kingdom Hall, diin ang iyang sayis anyos nga apo magreserbag lingkoranan para niya. Kon dili makatambong si David, sultian siya sa iyang apo, “Lo, wa lagi ta ka makita sa tigom ganina.” Karon si David malipayon nang nag-alagad kang Jehova, ug si Mary nalipay kaayo nga magkauban na sila sa pag-alagad.

15. Sa unsang paagi ang gulanggulang nga mga magtiayon makatabang sa mga bata-bata pa?

15 Tungod kay giatake ni Satanas ang mga pamilya karon, hinungdanon alang sa mga magtiayong nag-alagad sa Diyos nga magtinabangay. Bisag unsa na mo ka dugayng naminyo, hunahunaa kon unsay inyong isulti  o buhaton aron mapalig-on ang inyong kaminyoon. Ang mga gulanggulang na makatabang gani sa bata-batang mga membro sa kongregasyon niining bahina. Mahimo ninyong imbitahon sa balay ang bata-batang mga magtiayon aron moapil sa inyong pamilyahanong pagsimba. Sa maong pag-ubanay, ilang makita nga importante ang panaghiusa ug pagpakitag pagmahal bisag unsa na ka dugayng naminyo ang magtiayon.—Tito 2:3-7.

“MANUNGAS KITA NGADTO SA BUKID NI JEHOVA”

16, 17. Unsay gilaoman sa nahiusang mga alagad sa Diyos?

16 Handurawa ang mga Israelinhon sa kapanahonan sa Bibliya nga nagdayeg kang Jehova panahon sa usa ka pista diha sa templo sa Jerusalem. Sila mangandam pag-ayo, mag-atiman sa panginahanglan sa usag usa samtang nagpanaw, ug magkahiusa sa pagsimba didto sa templo. Kining tanan nagkinahanglag kooperasyon. (Luc. 2:41-44) Samtang magpadayon kita sa atong panaw paingon sa bag-ong kalibotan, kinahanglan usab kitang magkahiusa ug magtinabangay. Kini nagkinahanglag regular ug makugihong paningkamot. May angay ka bang pauswagon niining bahina?

17 Hunahunaa ang mga panalangin nga naghulat kanato! Ato nang gitalikdan ang kagubot ug kalibog nga komon kaayo niining sistemaha sa mga butang. Atong makita karon nga nagakatuman ang gitagna ni Isaias ug Miqueas—ang katawhan sa Diyos nagkahiusa sa pagtungas “sa bukid ni Jehova.” (Isa. 2:2-4; basaha ang Miqueas 4:2-4.) Sa pagkatinuod, pagkalabaw sa atong matang sa pagsimba niining “kaulahiang bahin sa mga adlaw.” Apan pagkadako unya sa atong kalipay kon magkinabuhi na kita sa panahon diin ang tanang katawhan magkahiusa ug magtinabangay!