Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) ABRIL 2016

Ang Imo Bang Ministeryo Samag Yamog?

Ang Imo Bang Ministeryo Samag Yamog?

ANG atong ministeryo hinungdanon ug bililhon. Pero dili tanan nga atong sangyawan ang makaapresyar niini. Bisag ang pipila interesado sa mensahe sa Bibliya, wala sila mobati nga kinahanglan silang magtuon sa Pulong sa Diyos uban nato.

Tinuod kana kang Gavin, kinsa tigtambongan na sa mga tigom; bisan pa niana, iyang gibalibaran ang gitanyag nga pagtuon sa Bibliya. Siya miingon: “Diyutay ra kog nahibaloan sa Kasulatan, ug dili ko gustong mahibaloan sa uban nga kulang kog kahibalo. Nahadlok kong malimbongan, ug dili ko gustong maobligar.” Sa imong hunahuna, dili na gyod kaha mosugot si Gavin nga magtuon sa Bibliya? Dili sa ingon niana. Tagda ang posibleng maayong epekto sa pagtulon-an sa Bibliya diha sa usa ka tawo. Giingnan ni Jehova ang iyang katawhan kaniadto: “Ang akong pulong modaligdig ingon sa yamog, ingon sa alindahaw diha sa balili.” (Deut. 31:19, 30; 32:2) Ang kinaiyahan sa yamog nagpakita kon sa unsang paagi epektibo natong matabangan ang tanang matang sa tawo diha sa ministeryo.—1 Tim. 2:3, 4.

 SA UNSANG PAAGI MAHISAMAG YAMOG ANG IMONG MINISTERYO?

Ang yamog makapahupay. Ang yamog inanayng maporma gikan sa gagmayng tinulo sa alisngaw diha sa hangin. Ang mga pulong ni Jehova ‘midaligdig ingon sa yamog’ kay siya misulti sa iyang katawhan sa maluloton, malumo, ug mabinationg paagi. Ato siyang masundog kon atong tahoron ang opinyon sa uban. Atong dasigon ang mga tawo sa paghunahuna ug paghimog kaugalingong konklusyon. Kon atong ipakita ang maong personal nga interes, mas daling dawaton ang atong gisulti ug mas epektibo ang atong ministeryo.

Ang yamog makapadasig. Ang atong ministeryo makapadasig sa uban kon atong hunahunaon kon sa unsang paagi matabangan nato sila sa pagkat-on sa kamatuoran. Si Gavin, nga gihisgotan ganina, wala pugsa sa pagdawat sa tanyag nga magtuon sa Bibliya. Hinunoa, si Chris, ang brader nga unang miduol niya, nangitag lainlaing paagi aron ganahan si Gavin nga maghisgot bahin sa Bibliya. Gipatin-aw ni Chris kang Gavin nga ang Bibliya dunay tema ug ang pagkahibalo niana motabang niya nga mas masabtan ang mga tigom. Dayon, gisaysay ni Chris nga ang mga tagna sa Bibliya ang nakapakombinsir niya nga tinuod ang Bibliya. Miresulta kini sa daghang panaghisgot bahin sa katumanan sa mga tagna. Nadasig si Gavin niini nga mga panaghisgot ug sa ulahi gidawat niya ang gitanyag nga pagtuon sa Bibliya.

Ang yamog makapatunhay sa kinabuhi. Panahon sa ting-init sa Israel, posibleng dili moulan sulod sa ubay-ubayng mga bulan. Kon walay yamog, ang mga tanom malawos ug mamatay. Karong adlawa, dunay espirituwal nga hulaw, ingon sa gitagna ni Jehova. (Amos 8:11) Iyang gisaad nga ang mga dinihogan mahisamag “yamog gikan kang Jehova” samtang sila nagmantala sa mensahe sa Gingharian, nga gipaluyohan sa “ubang mga karnero.” (Miq. 5:7; Juan 10:16) Ato bang gipabilhan ang maayong balita sa Gingharian ingong bahin sa gitagana ni Jehova nga espirituwal nga yamog nga makapatunhay sa kinabuhi?

Ang yamog maoy panalangin gikan kang Jehova. (Deut. 33:13) Ang atong ministeryo puwedeng mahimong panalangin niadtong mosanong. Nadawat ni Gavin ang ingon niana nga panalangin. Pinaagi sa pagtuon sa Bibliya, nakaplagan niya ang tubag sa tanan niyang pangutana. Dali ra siyang miuswag ngadto sa bawtismo ug karon, uban sa iyang asawa nga si Joyce, siya bug-os nga nakigbahin sa pagsangyaw sa maayong balita sa Gingharian.

Ang yuta natumog sa mensahe sa Gingharian nga gipakaylap sa mga Saksi ni Jehova

PABILHI ANG IMONG MINISTERYO

Ang paghunahuna bahin sa yamog makapadasig usab kanato sa pagpabili pag-ayo sa atong tagsatagsa ka paningkamot diha sa ministeryo. Sa unsang paagi? Ang usa ka tulo sa tubig wala kaayoy epekto, pero kon dunay milyonmilyong tulo sa yamog, ang yuta matumog. Sa susama, naghunahuna tingali kita nga ang atong nahimo diha sa ministeryo gamay ra kaayo. Apan, ang hiniusang paningkamot sa tanang alagad ni Jehova nagahatag ug pamatuod “ngadto sa tanang kanasoran.” (Mat. 24:14) Ang ato bang ministeryo mahimong panalangin ngadto sa uban? Oo, kon ang mensahe nga atong gisangyaw mahisamag yamog—makapahupay, makapadasig, ug makapatunhay sa kinabuhi!