Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE NUM. 6 2016

 PANGUNANG TOPIKO | KINSAY ANAA SA ESPIRITUHANONG KALIBOTAN?

Mga Pangutana Bahin sa Espirituhanong Kalibotan

Mga Pangutana Bahin sa Espirituhanong Kalibotan

Nakapangutana ka na ba kon unsa ang espirituhanong kalibotan ug kon kinsay nagpuyo didto? Kon mao, dili lang ikaw ang nakapangutana niana. Sukad pa sa una, ang mga tawo daghag ideya bahin sa espirituhanong kalibotan. Ang uban nagtuo nga kini gipuy-an sa mga katigulangan kinsa angayng pasidunggan. Ang uban naghanduraw ug nindot kaayong dapit nga gitawag ug langit, nga gipuy-an sa mga anghel ug sa mga tawong buotan nga nangamatay. Ang uban pod nag-ingon nga ang espirituhanong kalibotan maoy puy-anan sa milyonmilyong diyos ug diyosa.

Daghan ang moingon nga dili nato mahibaloan kon unsa gyod ang espirituhanong kalibotan kay wala pay persona gikan didto nga mianhi sa yuta sa pagsulti kanato bahin niana. Pero sayop kana nga pangatarongan. Si Jesu-Kristo nabuhi na sa langit, sa espirituhanong kalibotan, una siya mianhi sa yuta. Prangka niyang gisultihan ang relihiyosong mga lider sa unang siglo: “Ako nanaog gikan sa langit aron buhaton, dili ang akong kabubut-on, kondili ang kabubut-on niya nga nagpadala kanako.” Busa si Jesus naghatag ug kasaligang impormasyon bahin sa langit dihang giingnan niya ang iyang mga apostoles: “Sa balay sa akong Amahan adunay daghang puloy-anan.”—Juan 6:38; 14:2.

Siyempre, ang Amahan ni Jesus mao ang Diyos, kansang ngalan mao si Jehova, ug ang “balay” ni Jehova anaa sa langit. (Salmo 83:18) Busa, walay laing makahubit ug maayo sa dili makitang kalibotan gawas kang Jehova nga Diyos ug Jesu-Kristo. Sila naghatag ug daghan kaayong impormasyon bahin sa espirituhanong kalibotan pinaagig talagsaong mga panan-awon nga ilang gihatag ngadto sa mga matinumanon.

Hisgotan sa sunod nga artikulo ang mga teksto sa Bibliya nga naghubit kon unsay nakita sa mga tawo diha sa mga panan-awon. Samtang mamalandong ka niini nga mga panan-awon, hinumdomi nga ang espirituhanong kalibotan dili literal nga mahikap o makita. Imbes maghatag ug eksplinasyon pinaagig espirituhanong mga termino nga dili nato masabtan, ang Diyos naghatag ug mga panan-awon bahin sa espirituhanong kalibotan sa paagi nga atong masabtan. Kini nga mga panan-awon makatabang nimo sa pagkahibalo kon kinsay nagpuyo sa “daghang puloy-anan” sa espirituhanong kalibotan.