Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE NUM. 4 2016

Usa ka Kalibotan nga Walay Kapintasan—Posible Ba?

Usa ka Kalibotan nga Walay Kapintasan—Posible Ba?

Ikaw ba o usa sa membro sa imong pamilya nabiktima sa kapintasan? Nahadlok ka bang mabiktima sab? Ang kapintasan gitawag nga usa ka “nagkadakong problema sa panglawas sa kalibotan.” Tagda ang pipila ka pananglitan.

KAPINTASAN SA PANIMALAY UG SEKSUWAL NGA KAPINTASAN: “Usa sa tulo ka babaye nahimong biktima sa pisikal o seksuwal nga kapintasan sa ilang bana o puyopuyo,” matod sa report sa United Nations. Ikasubo, “gibanabana nga sa tibuok kalibotan, usa sa lima ka babaye nabiktima sa pagpanglugos o hapit malugos.”

KRIMEN SA KADALANAN: Sumala sa report, kapin sa 30,000 ka bayolenteng mga gang aktibo karon sa United States. Sa Latin America, halos 1 sa 3 ka tawo biktima sa mapintas nga krimen.

PAGPATAY: Gibanabana nga halos katunga sa usa ka milyon ang gipamatay niadtong 2012, mas daghan kay sa nangamatay sa gubat. Ang kinadaghanag kaso sa pagpamatay mao ang Southern Africa ug Central America, diin 30 ug 26 sa matag 100,000 ka residente ang nabiktima sa maong mga dapit. Kapig 100,000 ang gipamatay sa Latin America sa usa lang ka tuig, ug mga 50,000 sa Brazil. Duna bay permanenteng solusyon sa kapintasan?

MATAPOS BA ANG KAPINTASAN?

Nganong daghan kaayo ang kapintasan? Daghan ang posibleng hinungdan niini, lakip ang mosunod: tensiyon tungod sa dili patas nga kahimtang diha sa katilingban ug pagkabutang sa kinabuhi, pagtamay sa kinabuhi sa uban, pag-abuso sa makahubog nga ilimnon ug droga, kanunayng pagkakita sa mga bata ug pintas nga kinaiya sa mga hamtong, ug pagtuo nga ang mga kriminal makalusot ra sa balaod sa ilang gihimo.

Tinuod, ang krimen sa ubang bahin sa kalibotan mius-os. Sa São Paulo, Brazil, diin daghan kaayo ang populasyon, gikataho nga miubos ug mga 80 porsiyento ang mga kaso sa pagpamatay sulod sa miaging napulo ka tuig. Bisan pa niana, daghan gihapon ang krimen nianang siyudara, ug ang gidaghanon sa pagpamatay nagpabiling mga 10 sa matag 100,000 ka residente. Nan, unsay gikinahanglan aron matapos ang kapintasan?

Ang panghunahuna ug batasan sa tawo dakog ikatabang aron matapos ang kapintasan. Aron mausab ang mga tawong bayolente, ang mga kinaiya sama sa garbo, kahakog, ug kadalo kinahanglang pulihan ug gugma, pagtahod, ug kahingawa o pagkabalaka sa uban.

Unsay makatabang sa tawo aron siya magbag-o sa iyang kinabuhi? Palandonga kon unsay gitudlo sa Bibliya:

  • “Kini ang kahulogan sa paghigugma sa Diyos, nga atong bantayan ang iyang mga sugo.”1 Juan 5:3.

  • “Ang pagkahadlok kang Jehova mao ang pagdumot sa daotan.” *Proverbio 8:13.

Ang gugma sa Diyos ug kahadlok nga masuko siya maoy magpalihok sa bayolenteng mga tawo sa paghimog kausaban sa ilang kinabuhi—dili taphaw, kondili tinud-anay nga kausaban. Mahitabo ba gayod kana?

 Tagda pananglitan si Alex, * kinsa napriso sulod sa 19 ka tuig didto sa Brazil tungod sa daghang pintas nga krimen nga iyang nahimo. Siya nahimong Saksi ni Jehova sa tuig 2000, human magtuon ug Bibliya uban sa mga Saksi. Nagbag-o ba gyod siya? Oo, ug si Alex nagbasol sa tanan niyang nahimong krimen. Siya miingon: “Nakakat-on ko sa paghigugma sa Diyos kay akong gibati nga iya gayod kong gipasaylo. Ang akong pagkamapasalamaton ug gugma kang Jehova nakatabang nako sa pagbag-o.”

Si César, nga taga-Brazil, kawatan ug tulisan. Mao kanay iyang kinabuhi sulod sa mga 15 ka tuig. Unsay nakapausab niya? Samtang napriso, siya nagtuon ug Bibliya uban sa mga Saksi ni Jehova. Siya miingon: “Ang akong kinabuhi karon duna na gyoy katuyoan. Nakakat-on ko sa paghigugma sa Diyos ug sa pagkahadlok kaniya—kahadlok nga makahimo na usab ug daotan nga makapasubo kang Jehova. Dili ko gusto nga mahimong ingrato sa Diyos. Kana nga gugma ug kahadlok nagpalihok nako sa pag-usab sa akong kinabuhi.”

Sayra kon sa unsang paagi makapuyo ka sa kalibotan nga walay kapintasan

Unsay gipakita niana nga mga kasinatian? Kana nagpakita nga ang Bibliya dunay gahom sa pagbag-o sa kinabuhi sa tawo—pinaagi sa pag-usab sa ilang panghunahuna. (Efeso 4:23) Si Alex, nga nahisgotan na, miingon: “Ang akong nakat-onan sa Bibliya nahisamag hinlong tubig nga gibubo kanako, nga anam-anam nga naghinlo kanako pinaagi sa pagbanlas sa daotang mga hunahuna. Wala gyod ko magdahom nga ang maong mga hunahuna mawala kanako.” Busa, kon atong pun-on ang atong hunahuna sa hinlong mensahe sa Bibliya, kini makabanlas sa pagkadaotan. Ang Pulong sa Diyos dunay gahom sa paghinlo. (Efeso 5:26) Tungod niini, ang mga tawong mapintas ug dalo mahimong mag-usab, ug mahimong buotan ug makigdaiton. (Roma 12:18) Ang ilang kinabuhi magmalinawon dihang ipadapat ang mga prinsipyo sa Bibliya.—Isaias 48:18.

Kapig otso milyones ka mga Saksi ni Jehova sa 240 ka kayutaan nakakitag solusyon sa pagwagtang sa kapintasan. Ang mga tawo gikan sa nagkalainlaing rasa, kahimtang diha sa komunidad, ug kagikan nakakat-on sa paghigugma ug pagkahadlok sa Diyos ug sa paghigugmaay sa usag usa, nga malinawong nagkinabuhi ingong tibuok kalibotang pamilya. (1 Pedro 4:8) Sila maoy buhing pamatuod nga ang kalibotan nga walay kapintasan posible gayod.

USA KA KALIBOTAN NGA WALA NAY KAPINTASAN—DUOL NA!

Ang Bibliya nagsaad nga sa dili madugay wagtangon sa Diyos ang kapintasan dinhi sa yuta. Kining bayolenteng kalibotan gitakda sa Diyos alang sa “adlaw sa paghukom ug sa kalaglagan sa mga tawong dili-diyosnon.” (2 Pedro 3:5-7) Wala nay mga tawong bayolente nga magpaantos sa mga tawo. Nganong makaseguro kita nga mangilabot ang Diyos ug magwagtang sa kapintasan?

Ang Bibliya nag-ingon nga kadtong “nahigugma sa kapintasan ginadumtan” sa Diyos. (Salmo 11:5) Ang Maglalalang nahigugma sa pakigdait ug hustisya. (Salmo 33:5; 37:28) Busa dili gayod siya motugot nga magpabilin ang bayolenteng mga tawo hangtod sa hangtod.

Oo, ang usa ka malinawong bag-ong kalibotan duol na. (Salmo 37:11; 72:14) Sayra kon sa unsang paagi makapuyo ka niana nga kalibotan.

Pagkat-og Dugang

Kalinaw sa Yuta—Sa Unsang Paagi Kini Makab-ot?

Sayra kon unsay gisaad sa Diyos bahin sa pagpatunghag kalinaw sa yuta pinaagi sa iyang Gingharian.

Ang Giingon sa Bibliya Bahin sa Kapintasan

Unsay hunahuna sa Diyos bahin sa kapintasan? Mausab pa ba ang pintas nga mga tawo?