Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE NUM. 3 2016

 PANGUNANG TOPIKO | DIHANG MAMATYAN UG MINAHAL

Sayop ba nga Magbangotan?

Sayop ba nga Magbangotan?

Nasakit na ba ka? Tingali naayo ra ka dayon maong nalimtan ra nimo ni. Buweno, lahi ang pagbangotan. “Walay ‘bug-os makabuntog’ sa pagbangotan,” misulat si Dr. Alan Wolfelt sa iyang librong Healing a Spouse’s Grieving Heart. Apan siya midugang: “Paglabay sa panahon ug sa tabang sa uban, dili na kaayo bug-at ang imong bation.”

Tagda ang reaksiyon sa patriarkang si Abraham pagkamatay sa iyang asawa. Nag-ingon ang orihinal nga pinulongan sa Bibliya nga “si Abraham misugod sa pagbangotan ug paghilak tungod kang Sara.” Gipakita sa ekspresyong “misugod sa” nga wala dayon niya mabuntog ang iyang kaguol. * Ang laing pananglitan mao si Jacob, kinsa gipatuo nga gipatay sa ihalas nga mananap ang iyang anak nga si Jose. Siya nagbangotan sulod sa “daghang adlaw,” ug walay membro sa iyang pamilya ang nakahupay niya. Katuigan sa ulahi, nagbangotan gihapon siya.—Genesis 23:2; 37:34, 35; 42:36; 45:28.

Si Abraham nagbangotan tungod sa kamatayon sa iyang pinalanggang si Sara

Daghan sab karon ang naguol sa taastaas nga panahon dihang namatyag minahal. Tagda ang mosunod nga mga kasinatian.

  • “Ang akong bana, si Robert, namatay sa aksidente niadtong Hulyo 9, 2008. Kadtong buntaga pareho lang sa ubang adlaw. Human mamahaw, ingon sa among naandan sa di pa siya motrabaho, halokan ko niya, gakson, ug ingnag ‘gimahal tika’ ug mao pod nay akong buhaton niya. Unom ka tuig sa ulahi, nasakitan pa gihapon ko sa kamatayon ni Rob. Morag di na mawala ang akong kaguol.”—Gail, 60 anyos.

  • “Bisag kapin nag 18 ka tuig nga namatay ang akong pinalanggang asawa, mingawon gihapon ko niya ug maghilak. Kon may nindot nga talan-awon, mahinumdom ko niya, ug di nako malikayan nga maghanduraw niya nga malipay kon iyang makita ang akong nakita.”—Etienne, 84 anyos.

Busa, normal lang nga magbangotan sa taastaas nga panahon. Ang matag tawo lainlaig paagi sa pagbangotan, ug dili maayong manaway sa reaksiyon sa uban dihang mamatyan. Dugang pa, kon daw sobra ra ang atong kaguol sa kamatayon, tingali makatabang kon dili nato hukman ang atong kaugalingon. Unsaon nato pagsagubang sa pagbangotan?

^ par. 4 Ang anak ni Abraham nga si Isaac nagbangotan sab sa taastaas nga panahon. Sumala sa artikulong “Sundoga ang Ilang Pagtuo” niini nga gula, naguol gihapon si Isaac sa kamatayon sa iyang inahan, si Sara, bisag tulo ka tuig na ang milabay.—Genesis 24:67.

Pagkat-og Dugang

Pagsagubang sa Kamatayon sa Imong Kapikas

Sakit kaayong mawad-ag kapikas ug dugay kining mawala. Tagda kon sa unsang paagi ang paglaom sa pagkabanhaw diha sa Pulong sa Diyos makahupay ug makahatag kanatog paglaom.