Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE NUM. 3 2016

 ANG BIBLIYA MAKABAG-O SA KINABUHI

Gitahod na Nako ang mga Babaye ug ang Akong Kaugalingon

Gitahod na Nako ang mga Babaye ug ang Akong Kaugalingon
  • NATAWO: 1960

  • NASOD: FRANCE

  • KANIADTO: BAYOLENTE, ADIK, UG WAY TAHOD SA MGA BABAYE

KAAGI:

Natawo ko sa Mulhouse, pobreng lungsod sa amihanan sidlakang France, nga ilado sa kapintasan. Nagdako ko sa gubot nga lugar kay magsige lag away ang mga pamilya. Sa among pamilya, ang mga babaye gipakamenos ug halos dili konsultahon sa mga lalaki. Gitudloan ko nga sila pangkosina ra ug tig-atiman lang sa mga lalaki ug mga anak.

Di lalim ang akong pagkabatan-on. Sa 10 anyos ko, namatay si Papa kay palainom. Paglabayg lima ka tuig, naghikog ang usa nako ka kuya. Nianang tuiga, nasaksihan nako nga dunay gipatay tungod sa away sa pamilya, ug nalisang kaayo ko. Gitudloan ko sa akong pamilya kon unsaon paggamit ug kutsilyo ug pusil, ug sa pagpakig-away kon gikinahanglan. Kay gubot akong hunahuna, naghuboghubog ko ug nagpa-tattoo sa tibuok lawas.

Sa edad nga 16, kada adlaw kong moinom ug 10 hangtod 15 ka botelya sa beer, ug wa madugay nagdroga ko. Namaligya kog scrap metal ug mangawat para sa akong bisyo. Pagka-17 anyos, nakasulay na ko nga mapriso. Tanantanan, nasentensiyahan kog 18 ka beses tungod sa pagkabayolente ug pagpangawat.

Pagka-20 anyos, misamot ko ka bugoy. Kada adlaw, makahurot kog 20 ka likit sa marijuana, dayon maghithit kog heroin ug uban pang gidili nga droga. Kadaghan ko hapit mamatay kay nasobrahan. Kay namaligya kog droga, pirme kong magdalag kutsilyo ug pusil. Kas-a, naa koy gipusil pero maayo gani kay bilya ra sa bakos ang naigo! Sa 24 anyos ko, namatay si Mama maong misamot ko ka pungot. Ang mga tawong makasugat nako motabok sa pikas dalan kay mahadlok. Pirme kong makig-away, maong sa presinto ko sagad mag-weekend o kaha sa ospital aron ipatahi ang akong mga samad.

Naminyo ko pagka-28. Siyempre, wa koy tahod sa akong asawa. Insultohon ug kulatahon nako siya. Wala gyod miy gihimo nga magkauban. Abi nakog igo na ang paghatag niyag daghang kinawat nga alahas. Unya, wa ko magdahom nga nagtuon siyag Bibliya uban sa mga Saksi ni Jehova. Human sa iyang unang pagtuon, wa na siya manigarilyo, wa na modawat ug kuwartang kinawat, ug giuli niya nako ang mga alahas. Nasuko ko. Gidid-an nako siya nga  magtuon sa Bibliya ug bulhotag aso sa sigarilyo ang iyang nawong. Gipakaulawan sab nako siya sa among kasilinganan.

Usa ka gabii, kay grabeng huboga, nasunog nako ang among apartment. Ako ug ang among singko anyos nga anak nga babaye giluwas sa akong asawa. Dihang nahuwasan, nakonsensiya ko. Gibati nako nga dili na mapasaylo sa Diyos. Nahinumdom ko nga miingon ang pari nga ang mga daotan maimpiyerno. Bisan ang akong psychiatrist miingon: “Wa na kay paglaom! Di na gyod ka mabag-o.”

GIBAG-O SA BIBLIYA ANG AKONG KINABUHI:

Human sa sunog, miipon mi sa ginikanan sa akong asawa. Dihang gibisita siya sa mga Saksi, ako silang gipangutana, “Mapasaylo pa kaha ko sa Diyos?” Gipabasa nila nako ang 1 Corinto 6:9-11. Mabasa niana ang mga panggawi nga gidumtan sa Diyos, pero kini midugang: “Ingon niana ang pipila kaninyo kaniadto.” Kadto nagpasalig nako nga puwede pang magbag-o. Dayon gamit ang 1 Juan 4:8, gipasaligan ko sa mga Saksi nga gihigugma ko sa Diyos. Kay nadasig, gihangyo nako sila nga tudloan kog Bibliya kaduha kada semana, ug mitambong ko sa Kristohanong mga tigom. Kanunay kong nag-ampo kang Jehova.

Sulod sa usa ka bulan, nakadesisyon ko nga di na magdroga ug moinom. Gibati dayon nako nga morag dunay gubat sa akong lawas! Uromon ko, sakitag ulo, bikogan, ug mobati pag ubang resulta sa pag-undang. Pero, gibati sab nakong gitabangan ug gipalig-on ko ni Jehova. Nasinatian nako ang gibati ni apostol Pablo. Bahin sa tabang nga gihatag sa Diyos kaniya, siya misulat: “Sa tanang butang ako adunay kusog pinaagi kaniya nga naghatag ug gahom kanako.” (Filipos 4:13) Kadugayan, nakaundang sab ko sa pagpanabako.—2 Corinto 7:1.

Natabangan ko sa Bibliya nga makontrolar ang akong kinabuhi ug nga magmalipayon ang among pamilya. Nausab ang akong pagtratar sa akong asawa. Gitahod na nako siya ug ingnag “palihog” ug “salamat.” Nahimo kong tinuod nga amahan sa among anak. Human sa usa ka tuig nga pagtuon sa Bibliya, gidedikar nako ang akong kinabuhi kang Jehova ug nagpabawtismo, ingong pagsundog sa akong asawa.

MGA KAAYOHAN NGA AKONG NABATONAN:

Buhi ko karon tungod sa mga prinsipyo sa Bibliya. Bisan gani ang among mga paryente nga dili Saksi nakaingon nga dugay ra unta kong namatay tungod sa droga o sa away.

Bug-os nabag-o ang kinabuhi sa akong pamilya kay gitudloan ko sa Bibliya kon unsay responsabilidad sa bana ug amahan. (Efeso 5:25; 6:4) Karon magkauban na mi sa mga buluhaton ingong pamilya. Imbes sa kosina lang ang akong asawa, mosuportar na ko sa iyang buluhaton ingong bug-os panahong magwawali. Ug gisuportahan sab ko niya sa akong pagkaansiyano sa kongregasyon.

Nabag-o gyod ang akong kinabuhi tungod sa gugma ug kaluoy ni Jehova nga Diyos. Gusto kaayo nakong ipaambit ang iyang mga hiyas ngadto sa mga tawo nga giisip nga di na mabag-o, kay kaniadto mao nay pag-isip sa uban nako. Nahibalo kong ang Bibliya gamhanan ug makatabang kang bisan kinsa aron makabaton ug hinlo ug makahuloganong kinabuhi. Gawas nga gitudloan ko sa Bibliya nga parehong higugmaon ug tahoron ang lalaki ug babaye, gitudloan sab ko niini nga tahoron ang akong kaugalingon.

Pagkat-og Dugang

Sa Unsang Paagi Makabenepisyo Kita sa mga Prinsipyo sa Bibliya?

Si Jesus naghisgot nga kita nagkinahanglag giya ug kon unsa ang duha ka prinsipyo sa Bibliya nga labing hinungdanon.