Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE NUM. 2 2016

 PANGUNANG TOPIKO | NGANONG SI JESUS NAG-ANTOS UG NAMATAY?

Nahitabo ba Gyod Kini?

Nahitabo ba Gyod Kini?

Niadtong tingpamulak sa 33 C.E., si Jesus nga Nasaretnon gipatay. Siya gipasanginlang mibatok sa gobyerno, gikulata, ug gilansang sa estaka. Namatay siya sa tumang kasakit. Pero gibanhaw siya sa Diyos, ug paglabayg 40 ka adlaw, si Jesus misaka sa langit.

Kining talagsaong asoy mabasa diha sa upat ka Ebanghelyo sa Kristohanon Gregong Kasulatan, nga sagad gitawag ug Bag-ong Tugon. Nahitabo ba gyod kadto? Hinungdanon ug seryoso kanang pangutanaha. Kay kon wala to mahitabo, way pulos ang pagtuo sa mga Kristohanon ug ilusyon lang diay ang paglaom nga mabuhing walay kataposan sa Paraiso. (1 Corinto 15:14) Sa laing bahin, kon kadto tinuod, nan hayag ang kaugmaon sa katawhan, ug puwede sab nimo kining matagamtam. Busa, ang mga asoy ba sa Ebanghelyo tinuod o dili?

ANG GIPAKITA SA EBIDENSIYA

Lahi sa mga sugilambong, ang Ebanghelyo tukma kaayo ug detalyado. Pananglitan, naghisgot kinig ngalan sa tinuod nga mga lugar nga ang uban puwede pang adtoon karon. Tinuod sab ang gihisgotan niini nga mga tawo, kinsa gipamatud-an sa mga historyano.—Lucas 3:1, 2, 23.

 Si Jesus mismo gihisgotan sa ubang magsusulat sa una ug ikaduha nga siglo. * Ang pagkahubit sa Ebanghelyo bahin sa iyang kamatayon nahiuyon sa pamaagi sa mga Romano sa pagpatay kaniadto. Ang pagkaasoy sab sa mga panghitabo tinuod ug prangka, ug gihisgotan pa gani ang negatibong taras sa mga tinun-an ni Jesus. (Mateo 26:56; Lucas 22:24-26; Juan 18:10, 11) Kini maoy klarong pamatuod nga ang mga magsusulat sa Ebanghelyo matinud-anon ug naghatag ug tukmang impormasyon bahin kang Jesus.

KOMOSTA ANG PAGKABANHAW NI JESUS?

Gidawat sa kadaghanan nga si Jesus naglungtad ug namatay, pero dili motuo ang uban nga siya nabanhaw. Bisan gani ang iyang mga apostoles wala dayon motuo sa balita nga siya nabuhi pag-usab. (Lucas 24:11) Apan, nawala ra ang ilang pagduhaduha dihang nakita nila ug sa uban pang tinun-an ang nabanhaw nga si Jesus sa lainlaing higayon. Gani, dihay kas-a nga kapig 500 ang nakakita niya.—1 Corinto 15:6.

Bisag nameligrong dakpon ug patyon, maisogon gihapong gipahibalo sa mga tinun-an ang pagkabanhaw ni Jesus ngadto sa tanan, lakip niadtong nagpatay kaniya. (Buhat 4:1-3, 10, 19, 20; 5:27-32) Ingon kaha niana ka determinado ang daghan kaayong tinun-an kon dili pa sila segurado nga nabanhaw si Jesus? Kay tinuod man ang pagkabanhaw ni Jesus, ang Kristiyanidad dako kaayog impluwensiya sa kalibotan kaniadto ug karon.

Makita sa mga asoy sa Ebanghelyo nga tinuod ang tanang narekord niini bahin sa kamatayon ug pagkabanhaw ni Jesus. Kon imo kining tun-an, makombinsir ka nga tinuod gyod ning nahitabo. Mas molig-on pa ang imong pagtuo kon imong masabtan kon nganong nahitabo kini. Mao kanay hisgotan sa sunod artikulo.

^ par. 7 Si Tacitus, nga natawo mga 55 C.E., misulat nga “si Kristo, nga maoy gigikanan sa ngalang [Kristohanon], gisilotag kamatayon ni Poncio Pilato nga usa nato ka opisyal panahon sa pagmando ni Tiberio.” Si Jesus gihisgotan sab ni Suetonius (unang siglo); ni Josephus nga historyanong Hudiyo (unang siglo); ug ni Pliny nga Manghod, gobernador sa Bitinia (sayong bahin sa ikaduhang siglo).