Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE NUM. 1 2016

 ANG BIBLIYA MAKABAG-O SA KINABUHI

Hatagi Kog Bisan Usa Lang ka Tuig nga Kalinaw ug Kalipay

Hatagi Kog Bisan Usa Lang ka Tuig nga Kalinaw ug Kalipay
  • NATAWO: 1971

  • NASOD: FRANCE

  • KANIADTO: NALANGKIT SA KRIMEN, IMORALIDAD, UG DROGA

KAAGI:

Sa Tellancourt nagpuyo ang akong pamilya, usa ka baryo sa France sa amihanan-sidlakan. French si Papa, ug si Mama Italian. Sa nag-otso anyos ko, mibalhin mi sa pobre ug ordinaryong dapit nga bahin sa Rome, Italy. Lisod ang among kinabuhi didto. Tungod sa problema sa kuwarta grabe ang away sa akong mga ginikanan.

Sa nag-15 anyos ko, giingnan ko ni Mama nga mangitag amigo, dili kay mag-istambay lang pirme sa balay. Busa milakaw ko ug talagsa ra ko mag-ulian. Wa madugay nakabarkada kog mga bugoy. Usa ka adlaw, giduol kog lalaki nga morag mahigalaon. Gitanyagan ko niyag droga ug ako sab ning gidawat kay gusto kong isipon nga dili na bata. Naulipon dayon ko sa droga ug imoralidad. Makadaghan ko among-amongi. Para nako walay pulos ang kinabuhi; balewala nako kon mabuhi man ko o mamatay. Magul-anon kaayo ko. Sa edad nga 16, miinom kog usa ka botelya nga whiskey ug miambak sa linaw kay gusto kong mamatay. Ang resulta? Na-coma kog tulo ka adlaw.

Naningkamot na kong mabuhi human niadto, apan nahimo sab kong bayolente ug mangingilad. Manghagad kog sekso sa mga tawo, paimnon silag droga sa ilang balay, ug dayon kawaton ang ilang mahalong mga butang. Gigamit ko sa dagkong sindikato aron magpayuhot ug droga sa Italy. Kanunay kong makaengkuwentrog mga polis. Ang akong kinabuhi morag way padulngan ug dili makontrol. Apan nagtuo ko nga duna gyoy rason kon nganong naglungtad ko. Nag-ampo ko sa Diyos, nga naghangyo niyang hatagan kog bisan usa lang ka tuig nga kalinaw ug kalipay.

GIBAG-O SA BIBLIYA ANG AKONG KINABUHI:

Dihang nag-24 anyos ko, nakadesisyon ko nga mobalhin sa England. Nameligro ang akong kinabuhi tungod sa pagpakiglambigit sa mga namaligyag droga. Sa wa pa ko mibiya, gibisita nako si Mama ug nakurat ko dihang akong nakita nga nakig-estorya siya kang Annunziato Lugarà bahin sa Bibliya. * Nahadlok ko ug gipangutana nako si Annunziato sa iyang tuyo kay nahibalo ko sa iyang binuhatan. Gisultihan ko niya sa dakong kausaban nga iyang gihimo aron mahimong  Saksi ni Jehova, ug gipasaad ko niya nga makig-estorya sa mga Saksi inig-abot nako sa England. Misugot ko. Apan, dihang miabot ko didto, mao ra gihapon ang akong pagkinabuhi.

Usa ka adlaw sa London, nahibalag nako sa agianan nga daghag tawo ang usa ka Saksi nga nanghatag ug magasing Bantayanang Torre ug Pagmata! Kay nahinumdom sa akong saad kang Annunziato, gipangutana nako ang Saksi kon puwede ba kong magtuon ug Bibliya.

Nasorpresa ko sa akong nakat-onan sa Bibliya. Pananglitan, natandog ko sa 1 Juan 1:9, nga nag-ingon bahin sa Diyos: “Kon atong isugid ang atong mga sala, siya kasaligan ug matarong nga mopasaylo kanato sa atong mga sala ug mohinlo kanato.” Dako kadtog epekto kay gibati nako nga hugaw kaayo ang akong pagkinabuhi. Mitambong dayon ko sa mga tigom sa Kingdom Hall sa mga Saksi ni Jehova. Giabiabi kog maayo sa mga Saksi. Dihang akong nakita ang kasuod sa ilang panaghigalaay—nga maoy akong gipangandoy—gusto nako nga mahimong bahin sa ilang samag pamilya nga kongregasyon.

Wala ra kaayo ko malisdi sa pag-undang ug droga ug sa pagbiya sa akong imoral nga kinabuhi, apan nalisdan ko sa pagbag-o sa akong personalidad. Akong nakita nga kinahanglan nakong tahoron ug konsiderahon ang mga tawo. Gani, duna pay pipila ka ngil-ad nga mga kinaiya nga gipaningkamotan nakong wad-on. Apan sa tabang ni Jehova, miuswag ko. Sulod lang sa unom ka bulan nga pagtuon sa Bibliya, nabawtismohan ko ingong Saksi ni Jehova niadtong 1997.

MGA KAAYOHAN NGA AKONG NABATONAN:

Human sa akong bawtismo, naminyo ko kang Barbara nga bag-o lang sab nahimong Saksi ni Jehova. Dihang nakita sa barkada nako kaniadto ang akong dakong kausaban, nagtuon sab siyag Bibliya. Sa ngadtongadto, nahimo siyang Saksi, ug mao man ang iyang igsoong babaye. Dayon ang igsoong babaye sa akong lola, nga kapig 80 anyos, nagtuon sab ug nabawtismohan sa wala pa mamatay.

Nag-alagad ko karon ingong ansiyano sa among kongregasyon, ug kami sa akong asawa bug-os panahong mga ministro, nga nagtudlog Bibliya sa mga tawo nga nagsultig Italian dinhi sa London. Usahay, maguol ko tungod sa akong pagkinabuhi kaniadto, apan dako kaayog tabang si Barbara. Ako na gyong nabatonan ang kanunay nakong gipangandoy nga usa ka malipayong pamilya, ug naa na koy mahigugmaong Amahan nga dugay ra nakong gipangita. Nangayo ko sa Diyos ug usa lang ka tuig nga kalinaw ug kalipay, apan labaw pa niana ang iyang gihatag!

Ako na gyong nabatonan ang kanunay nakong gipangandoy nga usa ka malipayong pamilya, ug naa na koy mahigugmaong Amahan nga dugay ra nakong gipangita

^ par. 10 Tan-awa ang artikulong “Ang Bibliya Makabag-o sa Kinabuhi—Pirme Kong Magdaladalag Pusil,” sumala sa giasoy ni Annunziato Lugarà, sa Hulyo 1, 2014 nga gula sa Ang Bantayanang Torre, panid 8-9.

Pagkat-og Dugang

Nganong Angay Kang Magpabiling Buhi?

Nganong makahunahuna ang usa ka tawo nga higala ang kamatayon?