Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Ang Bantayanang Torre  |  Num. 1 2016

 KARAANG PRINSIPYO NGA PRAKTIKAL GIHAPON

Ayaw Pagkabalaka

Ayaw Pagkabalaka

PRINSIPYO SA BIBLIYA: “Ayaw kamo kabalaka bahin sa inyong kinabuhi.”—Mateo 6:25, Ang Biblia (New Cebuano Version).

Unsay kahulogan niini? Ang maong mga pulong gipahayag ni Jesus sa iyang Wali sa Bukid. Sumala sa usa ka diksiyonaryo sa Bibliya, ang Gregong pulong nga “pagkabalaka” puwedeng magtumong sa “normal nga bation sa tawo tungod sa kakabos, kagutom, ug uban pang problema sa iyang kinabuhi matag adlaw.” Sagad nalangkit kini sa pagkabalaka sa kon unsay mahitabo sa umaabot. Normal ug husto lamang nga mabalaka sa atong materyal nga mga panginahanglan ug sa kaayohan sa atong mga minahal. (Filipos 2:20) Apan sa dihang si Jesus miingon, “ayaw gayod pagkabalaka,” iyang gitambagan ang iyang mga sumusunod nga likayan ang wala kinahanglanang kabalaka—ang tumang kahadlok sa sunod adlaw nga makawala sa kalipay karon.—Mateo 6:31, 34.

Praktikal pa ba kini? Maayong sundon nato ang tambag ni Jesus. Ngano? Matod sa mga reperensiya nga kon ang tawo maghinobra sa iyang pagkabalaka, kanunayng aktibo ang iyang sympathetic nervous system nga maoy makaamot sa “mga sakit nga sama sa ulcer, sakit sa kasingkasing, ug hubak.”

Si Jesus naghatag ug makapakombinsir nga rason kon nganong likayan ang sobrang pagkabalaka: Kini walay kapuslanan. “Kinsa ba kaninyoy makadugang ug usa ka maniko sa gitas-on sa iyang kinabuhi pinaagi sa pagkabalaka?” nangutana si Jesus. (Mateo 6:27) Sa paghunahuna kanunay sa atong mga gikabalak-an, ang atong kinabuhi dili madugangag bisan tipik lamang sa segundo, ug labaw nang dili kini moarang-arang. Gawas pa, sagad dili mahitabo ang atong mga gikabalak-an. Matod pa sa usa ka eskolar: “Usik lang sa panahon ang pagkabalaka sa kaugmaon, ug sagad ang mahitabo sa umaabot dili ingon ka grabe kay sa atong gikahadlokan.”

Sa unsang paagi malikayan nato ang pagkabalaka? Una, salig sa Diyos. Kon gitagan-an sa Diyos ug pagkaon ang mga langgam ug gibestihan ang mga bulak ug katahom, dili ba niya tagan-an ang panginahanglan sa mga tawo nga giuna sa kinabuhi ang pagsimba kaniya? (Mateo 6:25, 26, 28-30) Ikaduha, ang problema lamang nianang adlawa ang atubanga. Si Jesus miingon: “Ayaw gayod kamo kabalaka bahin sa sunod nga adlaw, kay ang sunod nga adlaw adunay iyang kaugalingong mga kabalaka.” Seguradong mouyon ka nga “igo na sa matag adlaw ang iyang kaugalingong pagkadaotan.”—Mateo 6:34.

Kon sundon nato ang maalamong tambag ni Jesus, makalikay ta sa kapeligrohan. Labaw pa niana, makabaton tag kalinaw sa hunahuna, nga gitawag sa Bibliya ug “kalinaw sa Diyos.”—Filipos 4:6, 7.

Pagkat-og Dugang

ANG BANTAYANANG TORRE

Mosalig Ka ba sa Diyos?

Tagamtama ang kalipay nga bation sa pagkaila sa Diyos ingong kasaligang Higala.