Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Tudloi ang Inyong mga Anak

 LEKSIYON 8

Si Josias Adunay Maayong mga Higala

Si Josias Adunay Maayong mga Higala

Sa imong hunahuna, lisod ba ang pagbuhat ug maayo?— Daghan ang naghunahuna nga lisod kana. Ang Bibliya nag-ingon nga lisod kaayo alang sa usa ka bata nga si Josias ang pagbuhat ug maayo. Apan siya adunay maayong mga higala nga mitabang kaniya. Mokat-on kita ug dugang bahin kang Josias ug sa iyang mga higala.

Ang amahan ni Josias mao si Amon, usa ka hari sa Juda. Si Amon daotan kaayo ug nagsimba sa mga diyosdiyos. Pagkamatay sa amahan ni Josias, siya nahimong hari sa Juda. Apan otso anyos pa lang siya! Daotan sab kaha siya sama sa iyang amahan?— Dili gayod!

Gisultihan ni Sofonias ang mga tawo nga dili sila angay mosimba sa mga diyosdiyos

Bisan sa bata pa siya, si Josias gusto nang mosunod kang Jehova. Busa ang gipili niyang mga higala kadto lang mga tawo nga nahigugma kang Jehova. Ug gitabangan nila si Josias sa pagbuhat ug maayo. Kinsa ang pipila sa mga higala ni Josias?

Usa kanila si Sofonias. Si Sofonias maoy manalagna nga nagsulti sa mga tawo sa  Juda nga dunay daotang mahitabo kanila kon sila mosimba sa mga diyosdiyos. Si Josias namati kang Sofonias ug nagsimba kang Jehova, dili sa mga diyosdiyos.

Ang laing higala ni Josias mao si Jeremias. Halos pareho silag edad ug managsilingan ra samtang nagdako. Suod kaayo silang managhigala nga sa dihang namatay si Josias, si Jeremias nagsulat ug kanta nga nagpakita nga siya gimingaw pag-ayo kang Josias. Silang duha nagtinabangay sa pagbuhat ug maayo ug sa pagsunod kang Jehova.

Si Josias ug Jeremias nagtinabangay sa pagbuhat ug maayo

Unsay imong makat-onan kang Josias?— Bisan sa bata pa si Josias, gusto na niyang mobuhat ug maayo. Nahibalo siya nga angay siyang makighigala sa mga tawo nga nahigugma kang Jehova. Busa, pilia gayod ang mga higala nga nahigugma kang Jehova ug makatabang kanimo sa pagbuhat ug maayo!