Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Tudloi ang Inyong mga Anak

 LEKSIYON 10

Si Jesus Nagmasinugtanon

Si Jesus Nagmasinugtanon

Kanunay bang sayon ang pagsugot sa imong ginikanan?— Usahay, lisod kana. Nahibalo ka ba nga si Jesus nagmasinugtanon kang Jehova ug sa iyang ginikanan?— Ang gihimo ni Jesus makatabang kanimo nga magmasinugtanon sa imong ginikanan bisan usahay dili kini sayon. Maghisgot kita ug dugang bahin niini.

Sa wala pa moanhi si Jesus sa yuta, kauban siya sa iyang Amahan nga si Jehova sa langit. Apan si Jesus may ginikanan usab dinhi sa yuta. Sila si Jose ug Maria. Nahibalo ka ba kon sa unsang paagi sila nahimong iyang ginikanan?—

Gibalhin ni Jehova ang kinabuhi ni Jesus sa langit ngadto sa tiyan ni Maria aron si Jesus ikapanganak ug mabuhi dinhi sa yuta. Usa kini ka milagro! Sama sa mga bata nga mitubo sulod sa tiyan sa ilang inahan, si Jesus mitubo sulod sa tiyan ni Maria. Mga siyam ka bulan sa ulahi, si Jesus natawo. Niining paagiha nga si Maria ug ang iyang bana, si Jose, nahimong ginikanan ni Jesus dinhi sa yuta.

Sa 12 anyos pa lang si Jesus, may gibuhat siya nga nagpakitang gihigugma gayod niya ang iyang Amahan, si Jehova. Nahitabo kini sa dihang si Jesus ug ang iyang pamilya miadto sa Jerusalem alang sa Paskuwa. Kadto maoy dugay nga biyahe. Sa ilang pagpauli, wala makit-i ni Jose ug Maria si Jesus. Nahibalo ka ba kon diin siya?—

Nganong didto si Jesus sa templo?

Si Jose ug Maria nagdali pagbalik sa Jerusalem ug nangita kang Jesus. Nabalaka sila kay wala nila siya makit-i. Apan human sa tulo ka adlaw, ilang nakit-an siya sa templo! Nahibalo ka ba kon nganong didto si Jesus sa templo?— Kay makakat-on siya didto bahin sa iyang Amahan, si Jehova. Siya nahigugma kang Jehova ug gusto niyang mahibaloan kon unsay buhaton aron malipay si Jehova. Bisan sa nahingkod na si Jesus, siya nagmasinugtanon kang Jehova. Si Jesus nagmasinugtanon bisan pag lisod kaniya ang paghimo niana ug kinahanglan siyang mag-antos. Nagmasinugtanon ba usab si Jesus kang Jose ug Maria?— Oo, nag-ingon ang Bibliya.

Unsay imong makat-onan kang Jesus?— Kinahanglan nga magmasinugtanon ka sa imong ginikanan, bisan lisod usahay ang paghimo niana. Buhaton ba nimo kana?—