Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Tubag sa 10 ka Pangutana sa mga Batan-on

 PANGUTANA 6

Unsay Akong Himoon Kon Presyuron Ko?

Unsay Akong Himoon Kon Presyuron Ko?

KON NGANONG ANGAY KANG MAHIBALO

Kon dili ka magpadala sa presyur, ikay nagkontrol sa imong kinabuhi ug dili ang uban.

UNSAY IMONG HIMOON?

Handurawa kini: Duha ka eskolmet ni Brian nagpaingon niya, busa gikulbaan siya. Karong semanaha, kaduha na siya gipresyur sa pagpanigarilyo. Ikatulo na unya kini.

Ang unang batan-on miingon:

“Nag-inusara na pod ka? Duna koy ipailaila nimo nga amigo.”

Nangidhat siya sa pagsulti niyag “amigo” ug may gikuot siya sa bulsa ug gitunol kini kang Brian.

Nakita ni Brian nga sigarilyo ang giipitan sa batan-on diha sa iyang mga tudlo. Misamot ang iyang kakulba.

“Pasensiya na,” si Brian miingon. “Giingnan na baya ta mo nga dili ko . . .”

Misagbat ang ikaduhang batan-on: “Katalawan god nimo!”

“Dili oy!” mitubag si Brian.

Giagbayan sa ikaduhang batan-on si Brian ug mihunghong, “Sige na, dawata na na.”

Gipaduol sa unang batan-on ang sigarilyo sa nawong ni Brian ug mihunghong sab: “Ato-ato ra ni. Walay mahibalo ini.”

Kon ikaw si Brian, unsay imong himoon?

 HUNONG UG PAMALANDONG!

Nahibalo ba gyod kaha ang maong mga batan-on sa ilang gihimo? Mao ba gyod kanay ilang gusto? Lagmit dili. Nagpadala sila sa impluwensiya sa uban. Gusto nilang magustohan sila, busa nagpakontrol sila sa uban.

Kon makaatubang kag ingon niana nga situwasyon, unsay imong himoon aron dili ka madaog sa pagpresyur sa ubang batan-on?

  1. HUNAHUNAA DAAN ANG MAHITABO

    Ang Bibliya nag-ingon: “Maalamon ang tawo nga nakakita sa katalagman ug nagtago sa iyang kaugalingon, apan ang walay kasinatian moagi ug magaantos sa silot.”—Proverbio 22:3.

    Sagad, makita na nimo ang posibleng mahitabo. Pananglitan, nakita nimo ang imong mga eskolmet nga nagpaingon nimo ug nanigarilyo. Ang paghunahuna daan sa posibleng mahitabo makatabang nimo nga malikayan ang problema.

  2. PAMALANDONG

    Ang Bibliya nag-ingon: “Paghupot ug maayong tanlag [o, konsensiya].”—1 Pedro 3:16.

    Pangutan-a ang imong kaugalingon, ‘Unsa kahay akong bation kon magsunodsunod lang ko sa ginahimo sa uban?’ Tinuod, sa primero mahimo nimo silang mga amigo. Pero unsa may imong bation sa ulahi? Isakripisyo ba nimo ang imong pagkatawo aron lang ganahan sila nimo?—Exodo 23:2.

  3. PAGDESISYON

    Ang Bibliya nag-ingon: “Ang usa nga maalamon magapalandong sa iyang mga lakang.”—Proverbio 14:15.

    Kitang tanan kinahanglang mohimog desisyon ug andam modawat sa mga resulta niini. Ang Bibliya naghisgot bahin kang Jose, Job, ug Jesus kinsa mihimog hustong mga desisyon. Naghisgot sab kini bahin kang Cain, Esau, ug Judas kinsa mihimog sayop nga mga desisyon. Unsay imong himoon?

Ang Bibliya nag-ingon: “Makiglabot ka uban ang pagkamatinumanon.” (Salmo 37:3) Kon napamalandong na nimo ang mga resulta ug nakadesisyon ka na, dili ka na maglisod sa pagsulti sa imong baroganan—ug mogaan pa ang imong pamati.

Ayawg kabalaka—dili nimo sila kinahanglang lektyuran. Ang simple apan lig-ong pagbalibad igo na. O aron mahibalo sila nga tininuod ang imong pagbalibad, ingna sila:

  • “Dili lagi ko moapil!”

  • “Dili ko mohimog ingon niana!”

  • “Nahibalo na baya ka nga dili ko ingon ana!”

Isulti dayon ang imong baroganan ug ipakita nga seryoso ka. Sa ingon, dili na ka nila presyuron!

 KON UNSAY BUHATON DIHANG YAGAYAGAAN KA

Kon magpadala ka sa ubang batan-on, mora kag robot nga ila lang kontrolahon

Unsay imong buhaton kon dunay magyagayaga nimo? Pananglitan, kon dunay moingon, “Naunsa man ka? Katalawan god nimo!” Komon kini nga pagyagayaga. Unsay imong reaksiyon? Duna kay duha ka opsiyon.

  • Uyoni lang sila. (“Bitaw, talawan ko.” Dayon isulti kon ngano.)

  • Ibalik kanila ang ilang gisulti. Isulti kon nganong mibalibad ka, ug ipakita nga sayop ang ilang gihimo. (“Abi nakog nahibalo mo nga dili maayong manigarilyo!”)

Kon ila gihapon kang yagayagaan, lakaw na lang! Hinumdomi, kon dili dayon ka mohawa, mas presyuron ka nila. Pero kon molakaw dayon ka, imong gipakita nga dili ka nila makontrolar.

Sa tinuod lang, dili nimo malikayan nga dunay mopresyur nimo. Pero ikaw ang magbuot kon unsay imong himoon. Isulti ang imong baroganan, ug ayawg padaog. Naa ra nimo kon magpadala ka!—Josue 24:15.