Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Tubag sa 10 ka Pangutana sa mga Batan-on

 PANGUTANA 1

Kinsa Ako?

Kinsa Ako?

KON NGANONG ANGAY KANG MAHIBALO

Kon nahibalo ka kon kinsa ka ug kon unsay imong baroganan, makahimo kag maayong mga desisyon dihang mag-atubang ug problema.

UNSAY IMONG HIMOON?

Handurawa kini: Wala pay diyes minutos sukad pag-abot ni Karen sa parti dihang nakadungog siyag pamilyar nga tingog.

“Unsa may imong gitindogtindog diha?”

Milingi siya ug iyang nakita ang iyang amigang si Jessica nga nagdalag duha ka botelyang makahubog nga ilimnon. Gitunol ni Jessica kang Karen ang usa ka botelya ug miingon, “Puwede ka nang mag-inom-inom kay di na man ka bata, di ba?”

Gustong mobalibad si Karen, pero amiga niya si Jessica. Ug dili siya gusto nga maghunahuna si Jessica nga siya killjoy. Gawas pa, buotan si Jessica. Busa kon si Jessica moinom, dili ra daotan ang pag-inom. ‘Ilimnon ra bitaw ni,’ miingon si Karen sa iyang kaugalingon. ‘Dili man ni droga.’

Kon ikaw si Karen, unsay imong himoon?

HUNONG UG PAMALANDONG!

Aron makahimog maayong desisyon, kinahanglang makaila ka sa imong kaugalingon o sa imong pagkatawo ug mahibalo kon unsay imong baroganan. Sa ingon, ikaw maoy nagkontrolar sa imong kinabuhi, dili ang uban.—1 Corinto 9:26, 27.

Sa unsang paagi imong mahimo kana? Ang pagtubag sa mosunod nga mga pangutana makatabang.

 1 UNSAY AKONG MAAYONG MGA KINAIYA UG ABILIDAD?

Kon mahibalo ka sa imong mga abilidad ug maayong mga kinaiya, molig-on ang imong pagsalig sa kaugalingon.

PANIG-INGNAN SA BIBLIYA: Si apostol Pablo misulat: “Bisan kon ako dili batid sa pagsulti, tino nga ako dili ingon niana labot sa kahibalo.” (2 Corinto 11:6) Tungod sa iyang kahibalo sa Kasulatan, si Pablo nakapabiling lig-on bisag gibiaybiay. Wala siya magpadaog sa ilang mga pagbiaybiay nga makapawala sa iyang pagsalig sa kaugalingon.—2 Corinto 10:10; 11:5.

SUSIHA ANG IMONG KAUGALINGON. Unsay imong mga abilidad o kahanas?

Unsay imong maayong mga kinaiya? (Pananglitan, ikaw ba matinagdanon? mahinatagon? kasaligan? moabot sa eksaktong oras?)

2 UNSAY AKONG MGA KAHUYANGAN?

Ang kadena mogabok kon kini patay-an. Sa susama, ang imong pagkatawo madaot kon magpadaog ka sa imong kahuyangan.

PANIG-INGNAN SA BIBLIYA: Si Pablo nahibalo sa iyang kahuyangan. Siya misulat: “Nahimuot gayod ako sa balaod sa Diyos sumala sa akong pagkatawo sa sulod, apan nakita ko sa akong mga sangkap ang laing balaod nga nakigbugno batok sa balaod sa akong hunahuna ug nagbihag kanako ngadto sa balaod sa sala nga ania sa akong mga sangkap.”—Roma 7:22, 23.

SUSIHA ANG IMONG KAUGALINGON. Unsang mga kahuyangan ang kinahanglan nimong kontrolahon?

 3 UNSAY AKONG MGA TUMONG?

Mosakay ka bag taksi ug mosulti sa drayber sa paglibotlibot sa usa ka lugar hangtod mahutdan siyag gasolina? Binuang na—dako kag mabayran!

Ang leksiyon? Ang imong tumong makatabang nimo sa pagbatog direksiyon sa imong kinabuhi. Duna kay adtoan ug plano kon unsaon pag-adto didto.

PANIG-INGNAN SA BIBLIYA: Si Pablo misulat: “Ang akong pagdagan dili kay walay-katinoan.” (1 Corinto 9:26) Imbes maghulat lang kon unsay mahitabo, si Pablo nagtakdag mga tumong ug nagkinabuhi subay niini.—Filipos 3:12-14.

SUSIHA ANG IMONG KAUGALINGON. Unsa ang tulo ka tumong nga gusto nimong makab-ot sunod tuig?

4 UNSAY AKONG BAROGANAN?

Kon lig-on kag baroganan, sama kag kahoyng lawom ug gamot nga makasugakod ug kusog nga bagyo

Kon wala kay baroganan, mag-usab-usab ang imong hunahuna. Samag chameleon (usa ka matang sa tabili) nga mag-usab-usab ug kolor, usbon nimo ang imong kolor aron maparehas ka sa imong mga higala—kana nagpakita nga wala ka makaila sa imong kaugalingon o sa imong pagkatawo.

Apan kon ang imong mga buhat uyon sa imong baroganan, ang imong pagkatawo dili mausab bisag unsa pay buhaton sa uban.

PANIG-INGNAN SA BIBLIYA: Tingali tin-edyer pa si propetang Daniel sa mihukom siya nga mosunod sa balaod sa Diyos, bisag layo siya sa iyang pamilya. (Daniel 1:8) Busa, iyang gipakita kon kinsa gyod siya. Si Daniel nagkinabuhi sumala sa iyang baroganan.

SUSIHA ANG IMONG KAUGALINGON. Unsay imong baroganan? Pananglitan: Motuo ka bag Diyos? Kon oo, ngano? Unsay nakapakombinsir nimo nga siya naglungtad?

Nagtuo ka ba nga ang sukdanan sa Diyos sa moralidad maoy alang sa imong kaayohan? Kon oo, ngano?

Unsay imong pilion—mahisama kag dahong laya nga mapalid bisan sa gamayng paghuyop sa hangin, o sa kahoy nga makabarog bisan sa kusog nga bagyo? Palig-ona ang imong pagkatawo, ug ikaw maparehas niana nga kahoy. Ug kana makatabang nimo sa pagtubag sa pangutanang Kinsa Ako?