Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Pakigsuod Kang Jehova

 KAPITULO 5

Gahom sa Paglalang—“Ang Magbubuhat sa Langit ug sa Yuta”

Gahom sa Paglalang—“Ang Magbubuhat sa Langit ug sa Yuta”

1, 2. Sa unsang paagi gipasundayag sa adlaw ang gahom ni Jehova sa paglalang?

NAKATINDOG ka ba sukad duol sa usa ka daob sa tugnaw nga gabii? Tingalig imong gituy-od ang imong mga kamot sa angay ra gayong distansiya gikan sa mga siga sa kalayo aron makapahimulos sa mikatap nga kainit. Sa dihang mihirag ka nga duol kaayo, ang kainit dili maagwanta. Sa dihang misibog ka nga layo kaayo, gihakgom ka sa matugnawng hangin sa kagabhion, ug nangilogkilog ka sa katugnaw.

2 Adunay “kalayo” nga makapainit sa atong panit sa maadlaw. Ang maong “kalayo” nagsilaob sa distansiyang mga 150 milyong kilometro! * Pagkakusog sa puwersa sa adlaw nga mabati mo ang kainit niini gikan sa maong distansiya! Bisan pa niana, ang yuta nagbiyo sa maong makapahingangha pag-ayong thermonuclear nga hurno sa husto ra gayong distansiya. Kon ang yuta duol kaayo, nan ang tubig sa yuta mokayab isip alisngaw; kon layo kaayo, nan kanang tanan mahimong yelo. Walay mabuhi sa atong planeta sa bisan haing hinobrang distansiya. Kay gikinahanglan alang sa kinabuhi sa yuta, ang kahayag sa adlaw mahinlo usab ug episyente, gawas pa sa pagkamakalipay.Ecclesiastes 11:7.

Si Jehova ‘nag-andam sa banwag, bisan sa adlaw’

3. Ang adlaw nagpamatuod bahin sa unsang hinungdanong kamatuoran?

3 Bisan pa niana, ang kadaghanang tawo wala kaayoy pagtagad sa adlaw, bisan pag ang ilang mga kinabuhi nagdepende niini. Busa, dili sila makasabot kon unsa ang ikatudlo sa adlaw kanato. Ang Bibliya nag-ingon bahin kang Jehova: “Giandam mo ang banwag, bisan ang adlaw.” (Salmo 74:16) Oo, ang adlaw nagpasidungog kang Jehova, “ang Magbubuhat sa langit ug sa yuta.” (Salmo 19:1; 146:6) Usa lang kini sa dili-maihap nga langitnong mga butang nga  may ikatudlo kanato bahin sa labihan ka dakong gahom ni Jehova sa paglalang. Susihon natog maayo ang pipila niini ug unya iliso ang atong pagtagad sa yuta ug sa kinabuhing naglambo ibabaw niini.

“Iyahat ang Inyong mga Mata sa Itaas ug Tan-awa”

4, 5. Unsa ka puwersado ug unsa ka dako ang adlaw, apan unsa ra kini kon itandi sa ubang mga bituon?

4 Sumala sa imo tingaling nahibaloan, ang atong adlaw maoy usa ka bituon. Mas dako kining tan-awon kay sa mga bituon nga atong makita sa magabii kay, kon itandi kanila, mas duol kini. Unsa ka puwersado kini? Diha sa uyok niini, ang adlaw maoy mga 15,000,000 grado Celsius. Kon makakuha kag tipik sa uyok sa adlaw nga samag gidak-on sa ulo sa dinagom ug ibutang kana sa yuta, dili ka makatindog nga dili masunog sulod sa 140 kilometros gikan sa maong gamay kaayong tinubdan sa kainit! Kada segundo, ang adlaw mobugag enerhiya nga tumbas sa pagbuto sa ginatos ka milyong nukleyar nga bomba.

5 Labihan ka dako ang adlaw nga masulod niini ang kapin sa 1,300,000 ka yuta nato. Ang adlaw ba maoy usa ka bituon nga talagsaon ug gidak-on? Dili, gitawag kini sa mga astronomo nga yellow  dwarf o ordinaryong bituon. Si apostol Pablo misulat nga “ang usa ka bituon lahi sa laing bituon sa himaya.” (1 Corinto 15:41) Mahimong siya wala gayod masayod unsa ka tinuod ang maong inspiradong mga pulong. Adunay usa ka bituon nga labihang dakoa nga kon kini ipahimutang sa mismong nahimutangan sa adlaw, ang atong yuta masulod niana. Ang laing higanteng bituon nga ipahimutang sa ingon nga paagi makaabot hangtod gayod sa Saturn—bisan pag kanang planetaha layo kaayo gikan sa yuta nga gidangtag upat ka tuig usa makaabot didto ang usa ka salakwanang, nga mipanawg kapin sa 40 ka pilo nga mas tulin kay sa bala nga ipabuto gikan sa kusog nga rebolber!

6. Giunsa pagpakita sa Bibliya nga ang kabituonan labihan ka daghan gikan sa tawhanong panglantaw?

6 Labi pang makapahingangha kay sa gidak-on sa kabituonan mao ang ilang gidaghanon. Sa pagkamatuod, ang Bibliya nagpasabot nga ang kabituonan halos dili maihap, nga lisod iphon ingon  sa “mga balas sa dagat.” (Jeremias 33:22) Kining mga pulonga nagpasabot nga labi pang daghan ang kabituonan kay nianang makita sa natural nga mata. Ngani, kon ang usa ka magsusulat sa Bibliya, sama kang Jeremias, nakahangad pa sa langit sa kagabhion ug nakasulay pag-ihap sa makita nga mga bituon, siya makaihap lang untag tulo ka libo o kapin pa, kay kana ra ang gidaghanon nga himatikdan sa walay-tabang nga tawhanong mata sa usa ka hayag nga gabii. Ang maong gidaghanon susama sa gidaghanon sa kinumkom nga mga lugas sa balas. Sa pagkamatuod, hinunoa, ang mga bituon hilabihan ka daghan, ingon sa mga balas sa dagat. * Kinsay makaihap sa maong gidaghanon?

“Siya nagtawag kanilang tanan pinaagi sa ngalan”

7. (a) Pila ka bituon ang mahimong sulod sa atong galaksiyang Milky Way, ug unsa kana ka daghan? (b) Nganong makahuloganon nga ang mga astronomo nalisdan sa pag-ihap sa mga galaksiya, ug unsay ginatudlo niini kanato bahin sa gahom ni Jehova sa paglalang?

7 Ang Isaias 40:26 nagtubag: “Iyahat ang inyong mga mata sa itaas ug tan-awa. Kinsay naglalang niining mga butanga? Mao ang Usa nga nagpatungha sa ilang panon nga hilabihan ka daghan, siya nagtawag kanilang tanan pinaagi sa ngalan.” Ang Salmo 147:4 nag-ingon: “Siya nagaihap sa gidaghanon sa mga bituon.” Unsa ang “gidaghanon sa mga bituon”? Kana dili usa ka yanong pangutana. Ang mga astronomo nagbanabana nga adunay kapig 100 ka bilyong bituon sa atong galaksiyang Milky Way lamang. * Apan ang atong galaksiya usa lamang sa daghang galaksiya, ug daghan niana gilangkoban ug labi pa ka daghang bituon. Unsa ka daghan ang mga galaksiya? Ang banabana sa pipila ka astronomo maoy 50 bilyones. Gikalkulo sa uban nga tingali adunay 125 bilyones. Busa ang tawo dili gani makatino sa gidaghanon sa mga galaksiya, unsa pa kaha ang eksaktong gidaghanon sa tanang binilyong bituon nga sulod niana. Bisan pa niana, si Jehova nahibalo sa gidaghanon. Dugang  pa, siya naghatag sa matag bituon sa kaugalingong ngalan niini!

8. (a) Unsaon nimo pagsaysay ang gidak-on sa galaksiyang Milky Way? (b) Sa unsang paagi si Jehova nagahikay sa mga lihok sa mga butang sa kalangitan?

8 Ang atong kahingangha modako lamang sa dihang palandongon nato ang gidak-on sa mga galaksiya. Ang galaksiyang Milky Way gibanabana nga mosukod ug mga 100,000 ka light-year tadlas niini. Hulagwaya ang usa ka silaw sa kahayag nga mopanaw nga tulin kaayo sa 300,000 kilometros kada segundo. Ang maong silaw dangtag 100,000 ka tuig aron makatadlas sa atong galaksiya! Ug pilopilo ang gidak-on sa pipila ka galaksiya kay sa atong galaksiya. Ang Bibliya nag-ingon nga si Jehova ‘nagabuklad’ niining labihan ka dakong kalangitan nga samag panapton lamang kini. (Salmo 104:2) Iyang gihikay usab ang mga lihok sa maong mga linalang. Gikan sa labing gamay nga tipik sa abog taliwala sa kabituonan ngadto sa labing gamhanang galaksiya, ang tanan naglihok sumala sa pisikal nga mga balaod nga gilatid ug gipatuman sa Diyos. (Job 38:31-33) Sa ingon, ang mga siyentipiko nagtandi sa eksaktong mga lihok sa mga butang sa kalangitan ngadto sa komposisyon ug kahikayan sa usa ka makutihong sayaw nga ballet! Nan, hunahunaa ang Usa nga naglalang niining mga butanga. Dili ka ba mahingangha gayod sa Diyos nga adunay ingon ka dako kaayong gahom sa paglalang?

“Ang Magbubuhat sa Yuta Pinaagi sa Iyang Gahom”

9, 10. Sa unsang paagi dayag ang gahom ni Jehova kon bahin sa pagkabutang sa atong sistema solar, sa Jupiter, sa yuta, ug sa bulan?

9 Ang gahom ni Jehova sa paglalang dayag diha sa atong puy-anan, ang yuta. Mainampingon kaayo niyang gipahimutang ang yuta niining luag kaayong uniberso. Ang pipila ka siyentipiko nagtuo nga daghang galaksiya mahimong dili kapuy-an kon itandi sa may-kinabuhing planeta sama sa atoa. Ang kadaghanan sa atong galaksiyang Milky Way dayag nga wala idisenyo alang sa kinabuhi. Ang sentro sa galaksiya punog mga bituon. Kusog ang radyasyon, ug ang mga bituon kasagarang halos magbanggaay. Ang gawas nga ngilit sa galaksiya kulang sa daghang substansiya nga gikinahanglan sa kinabuhi. Ang atong sistema solar maayong pagkabutang tali sa maong hingaping mga kahimtang.

 10 Ang Yuta nakabatog kaayohan gikan sa halayo ug higanteng tigpanalipod—ang planetang Jupiter. Kapin sa usa ka libo ka pilo ang gidak-on kay sa Yuta, ang Jupiter nagagamit ug dako kaayong grabidad. Ang resulta? Kini mosuyop o mopatipas sa mga butang nga motadlas sa wanang. Gibanabana sa mga siyentipiko nga kon dili pa tungod sa Jupiter, ang samag-ulan sa labihan ka dagkong mga missile nga maigo sa yuta mahimong 10,000 ka pilong grabe pa kay sa pagkakaron. Kay mas duol sa atong pinuy-anan, ang atong yuta nakabatog kaayohan gikan sa talagsaong satelayt—ang bulan. Dili lang kay matahom nga butang ug “suga sa gabii,” ang bulan naghupot sa yuta diha sa dili-mausab, dili-matarog nga paghirig. Ang maong paghirig mohatag ug dili-mabalhinon, matagna nga mga panahon sa yuta—laing hinungdanong kaayohan alang sa kinabuhi dinhi.

11. Sa unsang paagi ang atmospera sa yuta gidisenyo aron magsilbing mapanalipdanong salipod?

11 Ang gahom ni Jehova sa paglalang dayag sa matag bahin sa disenyo sa yuta. Palandonga ang atmospera, nga nagsilbing usa ka salipod. Ang adlaw mobuga sa makaayo ug makadaot nga mga silaw. Sa dihang ang makadaot nga mga silaw maigo sa ibabawng atmospera sa yuta, kini magbalhin sa ordinaryong oksiheno ngadto sa ozone. Ang moresultang hut-ong sa ozone, sa baylo, mosuhop sa kadaghanan nianang maong mga silaw. Sa pagkamatuod, ang atong planeta gidisenyo nga may kaugalingong salipod!

12. Sa unsang paagi ang siklo sa tubig diha sa atmospera nag-ilustrar sa gahom ni Jehova sa paglalang?

12 Usa lang kana ka kinaiya sa atong atmospera, nga usa ka komplikadong panagsagol sa mga gas nga mithianong angay aron mabuhi ang mga linalang nga nagpuyo diha o duol sa nawong sa yuta. Apil sa mga katingalahang butang sa atmospera mao ang siklo sa tubig. Kada tuig ang adlaw magpakayab pinaagi sa pagpaalisngaw sa kapig 400,000 kilometro kubiko nga tubig gikan sa kadagatan sa yuta. Ang tubig maporma nga mga panganod, nga ipadpad sa halayo pinaagi sa kahanginan sa atmospera. Ang maong tubig, nga sa maong panahon nasala ug nalunsay na, mahulog isip ulan, niyebe, ug yelo, aron madugangan ang abiyo sa tubig. Kini maoy sumala sa giingon sa Ecclesiastes 1:7: “Ang tanang suba sa tingtugnaw mopadulong sa dagat, apan ang dagat wala mapuno. Sa dapit diin ang  suba sa tingtugnaw mopadulong, didto kini mobalik.” Si Jehova lamang ang makapalihok sa maong siklo.

13. Unsang ebidensiya sa gahom sa Maglalalang ang atong makita diha sa mga tanom ug sa yuta sa atong planeta?

13 Sa bisan diin nga makakita kitag kinabuhi, makita nato ang ebidensiya sa gahom sa Maglalalang. Gikan sa nagbuntaog nga kakahoyang redwood nga habog pa kay sa 30-andana nga mga tinukod ngadto sa mikroskopikong mga tanom nga naghitak diha sa kadagatan ug mohatag sa kadaghanan sa oksiheno nga atong gihanggab, ang gahom ni Jehova sa paglalang maoy dayag. Ang yuta mismo napunog buhing mga butang—mga wati, fungi, ug mga mikrobyo, nga ang tanan nagtambayayong sa pagbuhat diha sa makutihong mga paagi aron makatabang nga motubo ang mga tanom. Sa kahaom, ang Bibliya naghisgot sa yuta ingong may gahom.Genesis 4:12.

14. Unsang natagong puwersa ang anaa bisan sa labihan ka gamayng atomo?

14 Sa walay duhaduha, si Jehova mao “ang Magbubuhat sa yuta pinaagi sa iyang gahom.” (Jeremias 10:12) Ang gahom sa Diyos dayag bisan diha sa iyang kinagamyang mga linalang. Pananglitan, ang usa ka milyong atomo nga tapadtaparon dili makalukop sa gibag-on sa usa ka buhok sa tawo. Ug bisan pag ang usa ka atomo padak-on hangtod kini ingon ka habog sa 14-andana nga tinukod, ang uyok niini sama lamang ka dako sa usa ka grano sa asin nga anaa sa ikapitong andana. Bisan pa niana, ang maong labihan ka gamayng uyok mao ang tinubdan sa katingalahang gahom nga ipagawas sa usa ka nukleyar nga pagbuto!

“Tanang May Gininhawa”

15. Pinaagi sa paghisgot sa nagkadaiyang ihalas nga mga hayop, unsang pagtulon-an ang gitudlo ni Jehova kang Job?

15 Ang laing tin-awng pamatuod sa gahom ni Jehova sa paglalang makita diha sa dagayang kahayopan sa yuta. Natala sa Salmo 148 ang daghang butang nga nagdayeg kang Jehova, ug ang bersikulo 10 naglakip sa “kamong ihalas nga kahayopan ug kamong anad nga kahayopan.” Sa pagpakita kon nganong ang tawo angayng mahingangha sa Maglalalang, si Jehova kas-a nakigsulti kang Job bahin sa mga hayop sama sa leyon, sebra, ihalas nga torong baka, Behemot (o, hippopotamus), ug sa Leviatan (lagmit ang buaya). Unsay  punto? Kon ang tawo mahingangha sa maong kusgan, kahadlokan, ug dili-mapaaghop nga mga linalang, unsay angay niyang bation bahin sa ilang Maglalalang?Job, mga kapitulo 38-41.

16. Unsay makapahingangha kanimo bahin sa pipila ka langgam nga gilalang ni Jehova?

16 Ang Salmo 148:10 naghisgot usab sa “pak-an nga kalanggaman.” Hunahunaa lang ang nagkadaiyang mga klase niini! Si Jehova nagsugid kang Job bahin sa ostrik, nga ‘mokatawa sa kabayo ug sa nagsakay niini.’ Sa pagkatinuod, kining duha ug tunga ka metros nga langgam dili makalupad, apan makadagan kinig 65 kilometros matag oras, nga makakobreg abot sa upat ug tunga ka metros sa usa ka pagtikang! (Job 39:13, 18) Sa laing bahin, ang albatross mogugol sa kinadak-ang kinabuhi niini sa kahanginan ibabaw sa kadagatan. Nga kinaiyanhong tigsarap, kining langgama adunay bukhad sa pako nga mga tulo ka metros. Kini makalupad sa daghang oras sa usa ka distansiya nga dili ikapakapa ang mga pako niini. Sa pagtandi, nga duha ka pulgada lang ang gitas-on, ang bee hummingbird mao ang kinagamyang langgam sa kalibotan . Mahimong ipakapakapa niini ang iyang mga pako abot ug 80 ka beses sa usa ka segundo! Ang mga hummingbird, nga mangidlap samag gagmayng pak-ang mga mutya, makalupad nga pondo samag mga helikopter ug makalupad ganing paatras.

17. Unsa ka dako ang asul nga balyena, ug unsang konklusyon ang natural natong makab-ot human sa pagpalandong sa gilalang ni Jehova nga kahayopan?

17 Ang Salmo 148:7 nag-ingon nga bisan ang “dagkong mga linalang sa dagat” nagdayeg kang Jehova. Tagda ang sagad giisip nga kinadak-ang hayop nga nabuhi sukad niining planetaha, ang asul nga balyena. Kining ‘dakong linalang’ sa kadagatan mahimong moabot sa gitas-ong 30 metros o labaw pa. Kini mahimong motimbang sama sa panon sa 30 ka hingkod nang mga elepante. Ang dila lamang niini motimbang ingon sa usa ka elepante. Ang kasingkasing niini sama ka dako sa gamayng kotse. Kining dako kaayong organo mopitik ug 9 ka beses lamang matag minuto—nga lahi sa kasingkasing sa hummingbird, nga mahimong mopitik ug mga 1,200 ka beses matag minuto. Labing menos usa sa kaugatan sa asul nga balyena maoy dako kaayo nga ang usa ka bata makakamang pasulod niini. Segurado nga ang atong mga kasingkasing magtukmod kanato sa pagpahayag pag-usab sa tambag nga konklusyon sa basahong  Mga Salmo: “Ang tanang may gininhawa—ipadayeg si Jah.”Salmo 150:6.

Pagkat-on Gikan sa Gahom ni Jehova sa Paglalang

18, 19. Unsa ang nagkalainlaing buhing mga butang nga gibuhat ni Jehova niining yutaa, ug unsay gitudlo kanato sa kalalangan bahin sa iyang pagkasoberano?

18 Unsay atong makat-onan gikan sa paggamit ni Jehova sa iyang gahom sa paglalang? Kita mahingangha sa pagkadaiya sa kalalangan. Usa ka salmista mipatugbaw: “Pagkadaghan sa imong mga buhat, Oh Jehova! . . . Ang yuta napuno sa imong mga binuhat.” (Salmo 104:24) Pagkatinuod! Nailhan sa mga biologo ang kapig usa ka milyong espisye sa buhing mga butang sa yuta; bisan pa niana, nagkalainlain ang ilang mga opinyon nga mahimong adunay abot sa 10 milyones, 30 milyones, o labaw pa. Ang usa ka tawo sa arte mahimong makadiskobre nga usahay mahutdan siya sa iyang kamamugnaon. Sa kasukwahi, ang kamamugnaon ni Jehova—ang iyang gahom sa pag-imbento ug paglalang sa bag-o ug nagkalainlaing mga butang—dayag nga dili mahutdan.

19 May gitudlo kanato ang paggamit ni Jehova sa iyang gahom sa paglalang bahin sa iyang pagkasoberano. Ang pulong mismong “Maglalalang” nagseparar kang Jehova gikan sa tanang uban pa sa uniberso, nga ang tanan maoy “linalang.” Bisan ang bugtong Anak ni Jehova, nga nag-alagad isip “batid nga magbubuhat” panahon sa pagpanglalang, wala gayod tawgang Maglalalang o kaubang-Maglalalang diha sa Bibliya. (Proverbio 8:30; Mateo 19:4) Hinunoa, siya  mao “ang panganay sa tanang kalalangan.” (Colosas 1:15) Ang posisyon ni Jehova ingong Maglalalang mohatag kaniya sa kinaiyanhong katungod sa pagpatuman ug linaing gahom sa pagmando sa tibuok uniberso.Roma 1:20; Pinadayag 4:11.

20. Sa unsang diwa si Jehova mipahulay sukad sa pagkatapos sa iyang yutan-ong pagpanglalang?

20 Mihunong na ba si Jehova sa paggamit sa iyang gahom sa paglalang? Aw, ang Bibliya nag-ingon nga sa natapos ni Jehova ang iyang pagpanglalang sa ikaunom nga adlaw sa paglalang, “siya mipahulay sa ikapitong adlaw gikan sa tanan niyang buhat nga iyang gihimo.” (Genesis 2:2) Gipasabot ni apostol Pablo nga kining ikapitong “adlaw” maoy libolibo ka tuig sa gidugayon, kay kini nagpadayon pa sa iyang adlaw. (Hebreohanon 4:3-6) Apan ang ‘pagpahulay’ nagpasabot ba nga si Jehova mihunong sa bug-os sa pagbuhat? Dili, si Jehova dili gayod mohunong sa pagbuhat. (Salmo 92:4; Juan 5:17) Ang iyang pagpahulay, diay, yanong nagtumong gayod sa paghunong sa iyang buluhaton sa pisikal nga pagpanglalang kon bahin sa yuta. Hinunoa, ang iyang buluhaton sa pagpatuman sa iyang mga katuyoan nagpadayong walay pagkabalda. Ang maong buluhaton naglakip sa pag-inspirar sa Balaang Kasulatan. Ang iyang buluhaton naglangkit pa gani sa pagpatungha sa “usa ka bag-ong linalang,” nga pagahisgotan sa Kapitulo 19.2 Corinto 5:17.

21. Sa unsang paagi ang gahom ni Jehova sa paglalang makaapektar sa matinumanong mga tawo hangtod sa kahangtoran?

21 Sa dihang modangat na gayod sa kataposan ang adlaw sa pagpahulay ni Jehova, siya makaarang sa pagpahayag nga ang tanan niyang buhat sa yuta “maayo kaayo,” sama gayod sa iyang gipahayag pagkatapos sa unom ka adlaw nga pagpanglalang. (Genesis 1:31) Kon sa unsang paagi siya tingali mohukom sa paggamit sa iyang walay-kinutobang gahom sa paglalang human niana, tan-awonon pa. Sa bisan unsang kahimtang, kita makapaneguro nga kita padayong malingaw sa paggamit ni Jehova sa iyang gahom sa paglalang. Hangtod sa kahangtoran, kita makakat-on ug dugang pa mahitungod kang Jehova pinaagi sa iyang kalalangan. (Ecclesiastes 3:11) Sa dugang nga makakat-on kita mahitungod kaniya, dugang modako ang atong kahingangha—ug kita mas masuod pa sa atong Dakong Maglalalang.

^ par. 2 Aron maisip sa hustong paagi ang maong labihan ka dakong numero, palandonga kini: Ang pagpadagan sa usa ka kotse sa maong distansiya—bisan sa katulinon nga 160 kilometros matag oras, 24 oras sa usa ka adlaw—dangtag kapin sa usa ka gatos ka tuig!

^ par. 6 Ang pipila naghunahuna nga ang mga karaang tawo sa kapanahonan sa Bibliya migamit gayod ug karaang matang sa teleskopyo. Sa unsang paagi, sumala sa pangatarongan, mahimong nahibalo ang mga tawo niadtong mga panahona nga ang kabituonan labihan ka daghan, nga dili maihap, gikan sa tawhanong panglantaw? Ang maong pangagpas nga walay pasikaranan wala mag-ila kang Jehova, ang Awtor sa Bibliya.2 Timoteo 3:16.

^ par. 7 Palandonga ang gidugayon nga imong magugol sa pag-ihap lamang ug 100 bilyones nga bituon. Kon makaihap kag usa ka bag-ong bituon matag segundo—ug ipadayon kana 24 oras sa usa ka adlaw—dangtan kag 3,171 ka tuig!

Pagkat-og Dugang

Ang Kalalangan Nagpadayag sa Buhi nga Diyos

Sayra kon sa unsang paagi nato matabangan ang uban nga masabtan ang kamatuoran bahin sa Maglalalang ug kon sa unsang paagi mapalig-on ang atong pagtuo kaniya.