Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Ang Bibliya—Unsay Mensahe Niini?

 SEKSIYON 19

Mga Tagna ni Jesus nga Makaapektar sa Tibuok Kalibotan

Mga Tagna ni Jesus nga Makaapektar sa Tibuok Kalibotan

Si Jesus naghisgot sa mga panghitabo nga magpaila sa iyang pagmando ug sa kataposang mga adlaw sa sistema sa mga butang

SA Bukid sa mga Olibo, diin malantaw ang nindot kaayong talan-awon sa Jerusalem ug sa templo niini, si Jesus gipangutana sa upat sa iyang mga apostoles bahin sa mga butang nga iyang gisulti. Si Jesus bag-o pang miingon nga ang templo sa Jerusalem lumpagon. Una pa niana, siya naghisgot kanila bahin sa ‘kataposang mga adlaw sa sistema sa mga butang.’ (Mateo 13:40, 49) Busa, ang mga apostoles nangutana: ‘Unsa man unya ang ilhanan sa imong presensiya ug sa kataposang mga adlaw sa sistema sa mga butang?’—Mateo 24:3.

Sa pagtubag, si Jesus nag-asoy kon unsay mahitabo sa dili pa lumpagon ang Jerusalem. Apan ang iyang gipamulong dili lamang mapadapat sa maong panahon. Kadto adunay umaabot nga katumanan sa tibuok kalibotan. Si Jesus nagtagnag mga panghitabo ug mga kahimtang sa kalibotan nga maglangkob sa usa ka ilhanan. Pinaagi sa maong ilhanan, masabtan sa tanang tawo sa yuta nga si Jesus naghari na sa langit. Sa laing pagkasulti, ang maong ilhanan magpaila nga si Jehova nga Diyos nag-entrono na kang Jesus ingong Hari sa dugay nang gisaad nga Gingharian sa Mesiyas. Kana magpaila usab nga hapit nang wagtangon sa Gingharian ang tanang pagkadaotan ug ipatungha ang tinuod nga pakigdait sa tanang katawhan. Ang mga hitabo nga gitagna ni Jesus magpaila nga miabot na ang kataposang mga adlaw sa karaang sistema sa relihiyon, politika, ug sa katilingban karon, ug hapit nang mosugod ang bag-ong sistema.

Sa dihang gisaysay ni Jesus ang mga panghitabo dinhi sa yuta panahon sa iyang paghari sa langit, siya miingon nga mahitabo ang mga gubat tali sa mga nasod, kanihit sa pagkaon, dagkong mga linog, ug pagkaylap sa mga sakit. Mosamot usab ang pagkadaotan. Ang tinuod nga mga tinun-an ni Jesus magsangyaw sa maayong balita sa Gingharian sa Diyos sa tibuok kalibotan. Kining tanan motultol sa “dakong kasakitan” nga wala pa mahitabo sukad.—Mateo 24:21.

Sa unsang paagi mahibalo ang mga tinun-an ni Jesus nga duol na ang maong kasakitan? ‘Tun-i ninyo kini gikan sa kahoyng igos,’ miingon si Jesus. (Mateo 24:32) Kon manalingsing na ang igos, ilhanan kini nga hapit na ang ting-init. Sa susama, kon mahitabo na ang tanang gitagna ni Jesus sa usa ka yugto sa panahon, ilhanan kana nga hapit na ang dakong kasakitan. Ang Amahan lamang ang nahibalo sa adlaw ug oras kon kanus-a kana magsugod. Busa, si Jesus nag-awhag sa iyang mga tinun-an: “Magpadayon sa pagtukaw, kay wala kamo mahibalo kon kanus-a ang tinudlong panahon.”—Marcos 13:33.

—Gipasukad sa Mateo kapitulo 24 ug 25; Marcos kapitulo 13; Lucas kapitulo 21.

^ par. 14 Alang sa dugang panaghisgot sa tagna ni Jesus, tan-awa ang kapitulo 9 sa librong Unsay Tinuod nga Gitudlo sa Bibliya? nga gipatik sa mga Saksi ni Jehova.

Pagkat-og Dugang

Nagkinabuhi na ba Kita sa “Kataposang mga Adlaw”?

Tagda kon nganong ang binuhatan ug tinamdan sa mga tawo nagpamatuod nga kita nagkinabuhi na karon sa “kataposang mga adlaw” nga gitagna sa Bibliya.

Kataposang mga Adlaw—Tukmang Tagna sa Bibliya

Duna bay linaing kahulogan ang panghitabo karon sa kalibotan? Susiha ang pito ka tagna nga nagpakita nga talagsaon ang atong panahon.