Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Ang Bibliya—Unsay Mensahe Niini?

 SEKSIYON 15

Ang Nabihag nga Propeta Nakakitag mga Panan-awon sa Umaabot

Ang Nabihag nga Propeta Nakakitag mga Panan-awon sa Umaabot

Si Daniel nagtagna bahin sa Gingharian sa Diyos ug sa pag-abot sa Mesiyas. Ang Babilonya napukan

SI Daniel, nga usa ka batan-on nga dunay talagsaong integridad, gibihag human mapukan ang Jerusalem. Didto sa Babilonya, siya ug ang pipila ka binihag nga mga Hudiyo gikan sa napukan nga gingharian sa Juda gihatagag diyutayng kagawasan. Sa taas nga panahon nga pagpuyo ni Daniel didto, siya gipanalanginan gayod sa Diyos. Gani, giluwas siya gikan sa langob sa mga leyon ug gipakita kaniya ang mga panghitabo sa umaabot. Ang labing hinungdanong mga tagna ni Daniel nasentro sa Mesiyas ug sa Iyang pagmando.

Nahibaloan ni Daniel kon kanus-a moabot ang Mesiyas. Si Daniel gisultihan nga ang katawhan sa Diyos makadahom nga moabot ang “Mesiyas nga Pangulo” sa ika-69 ka semana sa mga tuig human ihatag ang sugo nga tukoron pag-usab ang mga paril sa Jerusalem. Ang literal nga usa ka semana adunay pito ka adlaw, samtang ang usa ka semana sa mga tuig adunay pito ka tuig. Ang maong sugo gihatag niadtong 455 B.C.E., ug nianang panahona dugay nang namatay si Daniel. Ang 69 ka “semana” o 483 ka tuig nagsugod nianang tuiga ug natapos sa tuig 29 C.E. Sa mosunod nga seksiyon, imong mahibaloan kon unsay nahitabo nianang tuiga. Gipakita usab kang Daniel nga ang Mesiyas “pagapatyon” alang sa kapasayloan sa sala.—Daniel 9:24-26.

Ang Mesiyas mahimong Hari sa langit. Sa usa ka talagsaong panan-awon sa langit, nakita ni Daniel ang Mesiyas, nga gikaingong “sama sa anak sa tawo” nga miduol sa trono ni Jehova. Si Jehova naghatag kaniyag “pagmando ug dignidad ug gingharian.” Kana nga Gingharian molungtad sa walay kataposan. Nahibaloan usab ni Daniel ang lain pang kulbahinam nga detalye bahin sa Gingharian sa Mesiyas, nga iyang ipaambit ang iyang pagmando ngadto sa usa ka grupo nga gitawag ug “mga balaan sa Supremong Usa.”—Daniel 7:13, 14, 27.

Ang Gingharian magpukan sa mga gobyerno niining kalibotana. Ang Diyos naghatag kang Daniel ug katakos sa paghubad sa usa ka damgo nga nakapalibog pag-ayo kang Nabukodonosor, ang hari sa Babilonya. Ang hari nakakita ug dako kaayong larawan nga bulawan ang ulo, plata ang dughan ug mga bukton, tumbaga ang tiyan ug mga paa, puthaw ang batiis, ug sagol nga puthaw ug yutang-kulonon ang mga tiil. Dayon dihay bato nga nasiak gikan sa bukid nga mihapak sa mga tiil niini ug midugmok sa larawan nga sama ka pino sa tahop. Gisaysay ni Daniel nga ang lainlaing bahin sa larawan naghulagway sa nagsunodsunod nga pagmando sa mga gahom sa kalibotan, nga nagsugod sa Babilonya ingong ulo nga bulawan. Nakita usab ni Daniel nga panahon sa pagmando sa kataposang kagamhanan niining daotang kalibotan, ang Gingharian sa Diyos molihok. Kini magpukan sa tanang gobyerno niining kalibotana. Dayon kini magmando hangtod sa kahangtoran.—Daniel, kapitulo 2.

Si Daniel tigulang na kaayo sa dihang nalumpag ang Babilonya. Gipukan ni Haring Ciro ang siyudad sumala sa gitagna sa mga propeta. Wala madugay, ang mga Hudiyo nakagawas gikan sa pagkabihag nga eksakto gayod sumala sa gitagna nga 70 ka tuig nga pagkaawaaw sa ilang yutang-natawhan. Ilalom sa pagpanguna sa matinumanong mga gobernador, saserdote, ug mga propeta, anam-anam nga gitukod pag-usab sa mga Hudiyo ang Jerusalem ug gipasig-uli ang templo ni Jehova. Apan, unsay nahitabo human sa 483 ka tuig?

Gipasukad sa basahon ni Daniel.

Pagkat-og Dugang

Kanus-a Nagsugod Pagmando ang Gingharian sa Diyos? (Bahin 1)

Kon nahibalo ka sa tubag, mapatin-aw ba nimo ni sa uban diha sa Bibliya?