Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Mahimong Magmalipayon ang Imong Pamilya

 SEKSIYON 3

Kon Unsaon Pagsulbad sa mga Problema

Kon Unsaon Pagsulbad sa mga Problema

“Batoni ang mainit nga gugma alang sa usag usa, kay ang gugma magatabon sa daghang sala.”—1 Pedro 4:8

Inigsugod sa inyong panagtiayon, motungha ang lainlaing problema kay magkalahi tingali mog hunahuna, pagbati, ug tinamdan sa kinabuhi. O kaha ang problema maggikan sa uban ug sa wala damhang panghitabo.

Sayon ra ang pagbalewala sa problema, apan gitambagan ta sa Bibliya nga atubangon kini. (Mateo 5:23, 24) Kon imong sundon ang mga prinsipyo sa Bibliya, makita nimo ang kinamaayohang solusyon sa imong mga problema.

 1 HISGOTI ANG PROBLEMA

ANG GIINGON SA BIBLIYA: “Adunay . . . panahon sa pagsulti.” (Ecclesiastes 3:1, 7) Seguroang makagahin kag panahon nga estoryahan ang inyong problema. Isulti sa imong kapikas ang tinuod nimong gibati ug gihunahuna. Kanunayng ‘isulti ang tinuod’ sa imong kapikas. (Efeso 4:25) Bisag suko na kaayo ka, likayi nga mosingka. Ang kalma nga tubag makatabang nga dili mosangko sa away ang simpleng panag-estorya.—Proverbio 15:4; 26:20.

Bisag dili mo magkasinabot, magpabiling kalma ug ayaw kalimti nga magpakitag gugma ug pagtahod sa imong kapikas. (Colosas 4:6) Paningkamoti nga sulbaron dayon ang problema, ug dili magbungolay.—Efeso 4:26.

UNSAY IMONG MAHIMO?

  • Pagtakdag hustong panahon aron hisgotan ang problema

  • Kon imong turno nga maminaw, ayaw pagsagbat. Paghulat sa imong turno nga mosulti

 2 PAMINAWA UG SABTA ANG IMONG KAPIKAS

ANG GIINGON SA BIBLIYA: ‘Batoni ang malumong pagmahal sa usag usa. Manguna sa pagpakitag pasidungog.’ (Roma 12:10) Importante kaayo nga maminaw. Sabta ang opinyon sa imong kapikas uban ang kaluoy ug pailob. (1 Pedro 3:8; Santiago 1:19) Ayaw pagpakaaron-ingnon nga naminaw. Kon mahimo, undangi una ang imong ginahimo ug paminawa ang imong kapikas, o pangutan-a siya kon puwede ninyo kining estoryahan unya. Kon imo siyang isipon nga ka-team imbes nga kontra, ‘dili ka daling masuko.’—Ecclesiastes 7:9.

UNSAY IMONG MAHIMO?

  • Paminaw nga bukas ang hunahuna, bisag dili ka makauyon sa imong madungog

  • Sabta ang kahulogan sa iyang gipanulti. Matikdi ang iyang lihok, ekspresyon sa nawong, ug tonada sa tingog

3 BUHATA ANG INYONG NASABOTAN

ANG GIINGON SA BIBLIYA: “Sa tanang matang sa pagbudlay adunay bentaha, apan ang pulong lamang sa mga ngabil mosangko sa kawalad-on.” (Proverbio 14:23) Dili igo nga magkauyon lang kon unsay maayong solusyon. Kinahanglang buhaton ninyo ang inyong nasabotan. Bisag nagkinahanglan kanag dakong paningkamot, dili kana makawang. (Proverbio 10:4) Kon magtinabangay mo, “adunay maayong balos” ang inyong paghago.—Ecclesiastes 4:9.

UNSAY IMONG MAHIMO?

  • Saboti kon unsay mahimo sa matag usa aron masulbad ang problema

  • Susiha kon duna bay pag-uswag matag karon ug unya

Pagkat-og Dugang

Kon sa Unsang Paagi Mahimo Kang Maayong Tigpaminaw

Ang pagpaminaw dili ordinaryong buhat kondili pagpakita kinig gugma. Sayra kon sa unsang paagi mahimo kang maayong tigpaminaw.

Kon Unsay Himoon Aron Dili Ka Makasultig Sakit

Unsay inyong himoon kon ang inyong relasyon ingong magtiayon naapektohan tungod sa sakit nga sinultihan?

Sa Unsang Paagi Malikayan ang Pagbungolay?

Nganong ang magtiayon magbungolay, ug unsay ilang himoon aron masulbad ang ilang panag-away?