Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Mahimong Magmalipayon ang Imong Pamilya

 SEKSIYON 1

Magpagiya sa Diyos Aron Magmalipayon ang Kaminyoon

Magpagiya sa Diyos Aron Magmalipayon ang Kaminyoon

“Siya nga naglalang kanila sukad sa sinugdan nagbuhat kanila nga lalaki ug babaye.”—Mateo 19:4

Si Jehova * nga Diyos ang naghiusa sa unang magtiayon. Ang Bibliya nag-ingon nga gibuhat niya ang unang babaye ug “gidala siya ngadto sa lalaki.” Sa kalipay ni Adan siya nakaingon: “Kini sa kataposan bukog sa akong mga bukog ug unod sa akong unod.” (Genesis 2:22, 23) Karon, gusto gihapon ni Jehova nga magmalipayon ang mga magtiayon.

Inigkaminyo nimo, tingali maghunahuna ka nga pulos kalipay ang imong masinati. Apan sa pagkatinuod, bisag nagkahigugmaay pag-ayo ang magtiayon, motungha gihapon ang mga problema. (1 Corinto 7:28) Niini nga brosyur, makakat-on kag mga prinsipyo sa Bibliya nga kon ipadapat, magmalipayon ang imong kaminyoon ug pamilya.—Salmo 19:8-11.

 1 TUMANA ANG PAPEL NGA GIHATAG NI JEHOVA KANIMO

ANG GIINGON SA BIBLIYA: Ang bana mao ang ulo sa pamilya.—Efeso 5:23.

Kon ikaw usa ka bana, gidahom ni Jehova nga panggaon nimo ang imong asawa. (1 Pedro 3:7) Siya gihatag kanimo ingong katimbang, ug buot sa Diyos nga tratahon nimo siya nga may dignidad ug gugma. (Genesis 2:18) Angay nimo siyang higugmaon pag-ayo, nga andam unahon ang iyang panginahanglan kay sa imoha.—Efeso 5:25-29.

Kon ikaw usa ka asawa, gidahom ni Jehova nga tahoron gyod nimo ang imong bana ug tabangan siya sa pagtuman sa iyang papel. (1 Corinto 11:3; Efeso 5:33) Suportahi ang iyang mga desisyon ug tinuoray nga magpasakop niya. (Colosas 3:18) Sa pagbuhat niana, matahom ka sa mga mata sa imong bana ug kang Jehova.—1 Pedro 3:1-6.

UNSAY IMONG MAHIMO?

  • Pangutan-a ang imong kapikas kon unsay imong pauswagon aron mahimo kang mas maayong bana o asawa. Paminaw pag-ayo, ug paningkamot nga mouswag

  • Magmapailobon. Nagkinahanglag panahon ang pagkat-on kon unsaon nga mapalipay ang usag usa

2 KONSIDERAHA ANG PAGBATI SA IMONG KAPIKAS

ANG GIINGON SA BIBLIYA: Kinahanglang mahunahunaon ka sa kaayohan sa imong kapikas. (Filipos 2:3, 4) Trataha siya sa malumong paagi, kay gusto ni Jehova nga ang iyang mga alagad “magmalumo sa tanan.” (2 Timoteo 2:24) Ang mga pulong nga ‘wala hunahunaa samag mga dunggab sa espada, apan ang dila sa mga maalamon makaayo.’ Busa pag-amping sa imong sinultihan. (Proverbio 12:18) Ang espiritu ni Jehova motabang nimo nga mosulti nga may kalumo ug gugma.—Galacia 5:22, 23; Colosas 4:6.

UNSAY IMONG MAHIMO?

  • Sa dili pa hisgotan ang seryosong mga butang uban sa imong kapikas, pag-ampo nga magpabilin kang kalma ug andam maminaw

  • Hunahunaag maayo ang imong isulti ug kon unsaon kana pagsulti

 3 KONSULTAHA ANG USAG USA

ANG GIINGON SA BIBLIYA: Pagkaminyo nimo, ikaw ug ang imong kapikas nahimong “usa ka unod.” (Mateo 19:5) Apan duha gihapon mo ka indibiduwal ug usahay magkalahi mog opinyon. Busa kinahanglan ninyong makat-onan kon unsaon nga magkauyon ang inyong hunahuna ug pagbati. (Filipos 2:2) Gikinahanglan ang panaghiusa dihang mohimog mga desisyon. Matod sa Bibliya: “Kadtong nagkonsultahanay adunay kaalam.” (Proverbio 13:10) Magpagiya sa mga prinsipyo sa Bibliya dihang kamo mohimog dagkong desisyon.—Proverbio 8:32, 33.

UNSAY IMONG MAHIMO?

  • Isulti sa imong kapikas ang imong gibati, dili lang ang mga impormasyon o opinyon

  • Konsultaha ang imong kapikas sa dili pa modesisyon

^ par. 4 Jehova ang ngalan sa Diyos sumala sa Bibliya.

Pagkat-og Dugang

Pagsagubang sa Unang Tuig sa Kaminyoon

Bag-o ka bang minyo? Ang Bibliya makatabang kanimo sa pagpalig-on sa inyong kaminyoon.

Mga Bana—Himoang Malipayon ang Inyong Panimalay

Ang pamilya mahimong abunda sa materyal pero dili gihapon malipayon.

Makatabang ba Kanako ang Bibliya sa Pagbatog Malipayong Pamilya?

Ang maalamong tambag gikan sa Bibliya nakatabang na sa milyonmilyon sa pagbatog malipayong pamilya.