Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Maayong Balita Gikan sa Diyos!

 LEKSIYON 10

Unsaon Nimo Pag-ila sa Matuod nga Pagsimba?

Unsaon Nimo Pag-ila sa Matuod nga Pagsimba?

1. Usa ra ba ang matuod nga relihiyon?

“Pagbantay sa mini nga mga manalagna.”—MATEO 7:15.

Usa ra ka relihiyon ang gitudlo ni Jesus sa iyang mga tinun-an, ang matuod nga relihiyon. Sama kinig dalan paingon sa kinabuhing walay kataposan. Matod niya: “Diyutay ra ang mga nakakaplag” niining dalana. (Mateo 7:14) Ang pagsimba nga gibase sa Pulong sa Diyos mao ray gidawat sa Diyos. Ang tanang matuod nga magsisimba nahiusa diha sa usa ka pagtuo.—Basaha ang Juan 4:23, 24; 14:6; Efeso 4:4, 5.

2. Unsay giingon ni Jesus bahin sa bakak nga mga Kristohanon?

“Sila nagpahayag sa dayag nga sila nakaila sa Diyos, apan sila naglimod kaniya pinaagi sa ilang mga buhat.”—TITO 1:16.

Si Jesus nagpasidaan nga daoton sa mini nga mga manalagna ang Kristiyanidad. Sa panggawas, sila daw matuod nga mga magsisimba. Ang ilang simbahan nag-angkong Kristohanon. Apan imong mailhan kon kinsa gayod ang maong mga tawo. Sa unsang paagi? Ang matuod nga pagsimba lamang ang mopatunghag matuod nga mga Kristohanon nga mailhan sa ilang mga hiyas ug binuhatan.—Basaha ang Mateo 7:13-23.

3. Sa unsang paagi mailhan nimo ang matuod nga mga magsisimba?

Tagda kining lima ka ilhanan:

  • Ang matuod nga mga magsisimba nagtahod sa Bibliya ingong Pulong sa Diyos. Sila naningkamot sa pagkinabuhi uyon sa mga prinsipyo niini. Busa ang matuod nga relihiyon lahi nianang gibase sa tawhanong mga ideya. (Mateo 15:7-9) Ang matuod nga mga magsisimba nagkinabuhi sumala sa ilang gitudlo.—Basaha ang Juan 17:17; 2 Timoteo 3:16, 17.

  •   Ang matuod nga mga sumusunod ni Jesus nagpasidungog sa ngalan sa Diyos nga Jehova. Si Jesus nagpasidungog sa ngalan sa Diyos pinaagi sa pagpaila niini. Gitabangan niya ang mga tawo nga mailhan ang Diyos ug gitudloan sila sa pag-ampo nga balaanon ang ngalan sa Diyos. (Mateo 6:9) Sa inyong lugar, unsang relihiyona ang nagpaila sa ngalan sa Diyos?—Basaha ang Juan 17:26; Roma 10:13, 14.

  • Ang matuod nga mga Kristohanon nagsangyaw sa Gingharian sa Diyos. Gipadala sa Diyos si Jesus aron isangyaw ang maayong balita sa Gingharian. Ang Gingharian sa Diyos mao ang bugtong paglaom sa katawhan. Gisangyaw kini ni Jesus hangtod sa adlaw sa iyang kamatayon. (Lucas 4:43; 8:1; 23:42, 43) Siya miingon nga isangyaw usab kana sa iyang mga sumusunod. Kon dunay makigsulti nimo bahin sa Gingharian sa Diyos, unsa kahay iyang relihiyon?—Basaha ang Mateo 24:14.

  • Ang mga sumusunod ni Jesus dili bahin niining daotang kalibotan. Mailhan nimo sila kay sila dili makigbahin sa politika o sa katilingbanong mga panagbangi. (Juan 17:16; 18:36) Dugang pa, sila wala magsundog sa makadaot nga mga buhat ug tinamdan sa kalibotan.—Basaha ang Santiago 4:4.

  • Ang matuod nga mga Kristohanon may talagsaong gugma sa usag usa. Ilang nakat-onan sa Pulong sa Diyos ang pagtahod sa tanang rasa sa tawo. Ang bakak nga relihiyon sagad nagpaluyo sa mga gubat sa kanasoran, apan ang matuod nga mga magsisimba dili gayod makiglangkit niana. (Miqueas 4:1-3) Hinunoa, sila nagsakripisyo sa ilang panahon ug kahinguhaan sa pagtabang ug pagdasig sa uban.—Basaha ang Juan 13:34, 35; 1 Juan 4:20.

4. Mailhan ba nimo ang matuod nga relihiyon?

Unsang relihiyona ang nagbase sa tanan nilang pagtulon-an sa Pulong sa Diyos, nagpasidungog sa ngalan sa Diyos, ug nagsangyaw sa Gingharian sa Diyos ingong bugtong paglaom sa katawhan? Unsang relihiyona ang nagpakitag gugma ug wala makiglangkit sa gubat? Unsay imong hunahuna?—Basaha ang 1 Juan 3:10-12.

 

Pagkat-og Dugang

Pagsimba nga Giuyonan sa Diyos

Tagda ang unom ka ilhanan sa mga tawo nga nagpadapat sa pagtulon-an sa matuod nga relihiyon.