Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Maayong Balita Gikan sa Diyos!

 LEKSIYON 14

Nganong ang Diyos Dunay Organisasyon?

Nganong ang Diyos Dunay Organisasyon?

1. Nganong giorganisar sa Diyos ang karaang Israel?

Giorganisar sa Diyos ingong usa ka nasod ang mga kaliwat sa patriarkang si Abraham ug gihatagan silag mga balaod. Iyang ginganlag “Israel” ang maong nasod ug gisalig niini ang matuod nga pagsimba ug iyang pulong. (Salmo 147:19, 20) Busa ang tanang kanasoran mapanalanginan pinaagi sa Israel.—Basaha ang Genesis 22:18.

Gipili sa Diyos ang mga Israelinhon ingong iyang mga saksi. Ang kasaysayan sa karaang Israel nagpakita nga ang pagsunod sa mga balaod sa Diyos makabenepisyo sa mga tawo. (Deuteronomio 4:6) Busa, pinaagi sa mga Israelinhon, mailhan sa mga tawo ang matuod nga Diyos.—Basaha ang Isaias 43:10, 12.

2. Nganong giorganisar ang matuod nga mga Kristohanon?

Sa kadugayan, ang nasod sa Israel gisalikway ni Jehova ug gipulihan sa Kristohanong kongregasyon. (Mateo 21:43; 23:37, 38) Karon, isip kapuli sa mga Israelinhon, ang matuod nga mga Kristohanon nagsilbing mga saksi ni Jehova.—Basaha ang Buhat 15:14, 17.

Giorganisar ni Jesus ang iyang mga sumusunod aron sa pagsangyaw ug paghimog tinun-an sa tanang kanasoran. (Mateo 10:7, 11; 24:14; 28:19, 20) Kini nga buluhaton hapit nang moabot sa tayuktok niini, sa konklusyon sa presenteng sistema sa mga butang. Sa unang higayon sa kasaysayan, nahiusa ni Jehova diha sa matuod nga pagsimba ang minilyon gikan sa tanang kanasoran. (Pinadayag 7:9, 10) Ang matuod nga mga Kristohanon giorganisar sa paglig-on ug pagtabang sa usag usa. Sa tibuok kalibotan, pareho ra ang programa sa pagtudlo sa Bibliya diha sa ilang mga tigom.—Basaha ang Hebreohanon 10:24, 25.

 3. Sa unsang paagi nagsugod ang organisasyon sa mga Saksi ni Jehova sa modernong panahon?

Sa katuigan sa 1870, ang gamayng grupo sa mga Estudyante sa Bibliya nagsugod pagdiskobreg mga kamatuoran sa Bibliya nga dugay nang nawala. Sila nahibalo nga giorganisar ni Jesus ang Kristohanong kongregasyon aron sa pagsangyaw, busa misugod sila sa pagsangyaw sa Gingharian sa daghang kanasoran. Sa 1931, gisagop nila ang ngalang mga Saksi ni Jehova.—Basaha ang Buhat 1:8; 2:1, 4; 5:42.

4. Sa unsang paagi giorganisar ang mga Saksi ni Jehova?

Sa unang siglo, ang nagamandong lawas, nga nag-ila kang Jesus ingong Ulo sa kongregasyon, maoy nagdumala sa tanang Kristohanong kongregasyon sa daghang kayutaan. (Buhat 16:4, 5) Sa susama karon, ang Nagamandong Lawas, nga gilangkobag eksperyensiyadong mga ansiyano, maoy nagdumala sa mga Saksi ni Jehova sa tibuok kalibotan. Kini nag-atiman sa mga sangang buhatan sa mga Saksi ni Jehova nga naghubad, nag-imprenta, ug nanagtag ug mga basahon sa Bibliya diha sa kapig 600 ka pinulongan. Busa ang Nagamandong Lawas makataganag Kasulatanhong pagpalig-on ug giya alang sa kapig 100,000 ka kongregasyon sa tibuok kalibotan. Sa matag kongregasyon, ang kuwalipikadong mga lalaki nag-alagad ingong mga ansiyano, o magtatan-aw. Sila mahigugmaong nag-atiman sa panon sa Diyos.—Basaha ang 1 Pedro 5:2, 3.

Ang mga Saksi ni Jehova giorganisar aron sa pagsangyaw sa maayong balita ug sa paghimog mga tinun-an. Sama sa mga apostoles, sila nagsangyaw sa balay ug balay. (Buhat 20:20) Sila nagtanyag usab ug pagtuon sa Bibliya niadtong sinserong nahigugma sa kamatuoran. Apan ang mga Saksi ni Jehova dili lang usa ka organisasyon. Sila maoy usa ka pamilya nga may mahigugmaong Amahan. Sila managsoon nga nahigugma sa usag usa. (2 Tesalonica 1:3) Sanglit ang katawhan ni Jehova giorganisar sa pagpahimuot sa Diyos ug sa pagtabang sa uban, sila ang labing malipayong pamilya sa yuta.—Basaha ang Salmo 33:12; Buhat 20:35.

 

Pagkat-og Dugang

Magpabilin Kamo Diha sa Gugma sa Diyos

Sa unsang paagi nato ikapakita ang gugma ug pagpasalamat sa tanang nahimo sa Diyos?

Unsang Matanga sa mga Tawo ang mga Saksi ni Jehova?

May kaila ka ba nga Saksi ni Jehova? Unsay imong nahibaloan bahin namo?