Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Maayong Balita Gikan sa Diyos!

 LEKSIYON 8

Nganong Gitugotan sa Diyos ang Pagkadaotan ug Pag-antos?

Nganong Gitugotan sa Diyos ang Pagkadaotan ug Pag-antos?

1. Sa unsang paagi nagsugod ang pagkadaotan?

Gitugotan sa Diyos nga magmando ang mga tawo ug taastaas nga panahon aron ipakita nga dili sila makasulbad sa mga problema sa katawhan

Ang pagkadaotan nagsugod sa dihang gisulti ni Satanas ang unang bakak. Sa sinugdan, siya hingpit nga manulonda, apan “wala mobarog nga lig-on diha sa kamatuoran.” (Juan 8:44) Naugmad niya ang tinguha nga simbahon, nga angay lamang sa Diyos. Si Satanas namakak sa unang babaye, si Eva, ug gidani siya nga mosunod kaniya inay sa Diyos. Si Adan miduyog kang Eva sa pagsupak sa Diyos. Ang desisyon ni Adan miresultag pag-antos ug kamatayon.—Basaha ang Genesis 3:1-6, 19.

Sa gihulhogan ni Satanas si Eva nga supakon ang Diyos, gisugdan niya ang rebelyon batok sa pagkasoberano sa Diyos, o sa iyang posisyon ingong Labing Hataas. Ang kadaghanang tawo miduyog kang Satanas sa pagsalikway sa Diyos ingong ilang Magmamando. Busa, si Satanas nahimong “magmamando niining kalibotana.”—Basaha ang Juan 14:30; 1 Juan 5:19.

2. Depektoso ba ang kalalangan sa Diyos?

Hingpit ang tanang buhat sa Diyos. Ang mga tawo ug manulonda nga gilalang niya may katakos nga bug-os mosunod kaniya. (Deuteronomio 32:4, 5) Kita gilalang sa Diyos nga may kagawasan sa pagpili sa paghimog maayo o sa paghimog daotan. Ang maong kagawasan naghatag kanatog kahigayonan nga ipakita ang atong gugma sa Diyos.—Basaha ang Santiago 1:13-15; 1 Juan 5:3.

3. Nganong gitugotan sa Diyos ang pag-antos hangtod karon?

Sa limitadong panahon, gitugotan ni Jehova ang rebelyon batok sa iyang pagkasoberano. Ngano? Aron ipakita nga ang pagmando nga bulag kaniya dili makahatag ug kaayohan sa tawo. (Ecclesiastes 7:29; 8:9) Human sa 6,000 ka tuig, klaro ang ebidensiya. Pakyas ang tawhanong  mga magmamando sa paghanaw sa gubat, krimen, inhustisya, o sakit.—Basaha ang Jeremias 10:23; Roma 9:17.

Sukwahi sa tawhanong pagmando, ang pagmando sa Diyos makahatag ug kaayohan niadtong magpasakop niini. (Isaias 48:17, 18) Sa dili madugay, laglagon ni Jehova ang tanang tawhanong gobyerno. Kadto lamang mopili sa pagmando sa Diyos ang makapuyo sa yuta.—Isaias 11:9.—Basaha ang Daniel 2:44.

4. Unsay atong kahigayonan tungod sa pailob sa Diyos?

Nangangkon si Satanas nga ang tawo nag-alagad kang Jehova tungod lang sa kahakog. Gusto ba nimong pamatud-an nga kana bakak? Makahimo ka! Ang pailob sa Diyos naghatag kanatog kahigayonan nga ipakita kon kita ba dapig sa pagmando sa Diyos o sa tawo. Ang atong pagkinabuhi magpaila sa atong gipili.—Basaha ang Job 1:8-12; Proverbio 27:11.

5. Sa unsang paagi makapili ta sa Diyos ingong atong Magmamando?

Ang atong mga desisyon magpakita kon ang Diyos ba ang atong Magmamando

Makapili ta sa Diyos ingong atong Magmamando pinaagi sa pagkat-on ug pagpakigbahin sa matuod nga pagsimba nga binase sa iyang Pulong, ang Bibliya. (Juan 4:23) Masalikway nato si Satanas ingong magmamando pinaagi sa dili pag-apil sa politika ug sa gubat sama kang Jesus.—Basaha ang Juan 17:14.

Pinaagi sa iyang gahom, gipakita ni Satanas nga daw maayo ang imoral ug makadaot nga mga buhat. Kon isalikway nato kanang mga buhata, tingali biaybiayon o supakon ta sa pipila nato ka higala ug paryente. (1 Pedro 4:3, 4) Busa kinahanglan tang mopili. Makig-uban ba kita sa mga tawo nga nahigugma sa Diyos? Motuman ba kita sa iyang maalamon ug mahigugmaong mga balaod? Kon himoon nato kana, mapamatud-an nato nga si Satanas namakak sa dihang siya miingon nga ang tawo dili magmasinugtanon sa Diyos ubos sa pagpit-os.—Basaha ang 1 Corinto 6:9, 10; 15:33.

Ang gugma sa Diyos sa tawo maoy garantiya nga mawagtang ang pagkadaotan ug pag-antos. Kadtong nagpakitag pagtuo niini mabuhi sa yuta sa walay kataposan.—Basaha ang Juan 3:16.

 

Pagkat-og Dugang

Nganong Gitugotan sa Diyos ang Pag-antos?

Daghan ang nagtuo nga Diyos ang mabasol sa tanang pag-antos sa kalibotan. Unsay imong hunahuna? Sayra ang giingon sa Diyos bahin sa mga hinungdan sa pag-antos.