Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Maayong Balita Gikan sa Diyos!

 LEKSIYON 12

Sa Unsang Paagi Masuod Ka sa Diyos?

Sa Unsang Paagi Masuod Ka sa Diyos?

1. Pamatian ba sa Diyos ang tanang pag-ampo?

Ang Diyos nagdapit sa tanang matang sa mga tawo sa pagduol kaniya pinaagig pag-ampo. (Salmo 65:2) Apan, dili niya pamatian o dawaton ang tanang pag-ampo. Pananglitan, mababagan ang pag-ampo sa tawo nga nagmaltratar sa iyang asawa. (1 Pedro 3:7) Wala usab pamatia sa Diyos ang pag-ampo sa mga Israelinhon sa dihang padayon silang naghimog daotan. Tin-aw nga usa ka pribilehiyo ang pag-ampo. Hinuon, pamatian sa Diyos ang pag-ampo bisan niadtong nakahimog grabeng mga sala kon sila maghinulsol.—Basaha ang Isaias 1:15; 55:7.

2. Unsaon nato pag-ampo?

Ang pag-ampo usa ka bahin sa atong pagsimba, busa kita angayng moampo lamang sa atong Maglalalang, si Jehova. (Mateo 4:10; 6:9) Dugang pa, kay dili hingpit, kita kinahanglang moampo diha sa ngalan ni Jesus kay siya namatay alang sa atong mga sala. (Juan 14:6) Dili gusto ni Jehova nga sumaysumayon nato ang sinag-ulo o sinulat nga mga pag-ampo. Gusto niya nga iampo nato kon unsay anaa sa atong hunahuna ug kasingkasing.—Basaha ang Mateo 6:7; Filipos 4:6, 7.

Ang atong Maglalalang makadungog bisan sa hilom nga mga pag-ampo. (1 Samuel 1:12, 13) Gidapit kita niya sa pag-ampo sa bisan unsang oras, pananglitan sa pagsugod ug pagkatapos sa adlaw, sa pagpangaon, o sa dihang duna kitay problema.—Basaha ang Salmo 55:22; Mateo 15:36.

3. Nganong magtigom ang mga Kristohanon?

Ang pagpakigsuod sa Diyos dili sayon tungod kay gilibotan kitag mga tawo nga walay pagtuo sa Diyos ug nagbiaybiay sa iyang saad bahin sa usa ka malinawong yuta. (2 Timoteo 3:1, 4; 2 Pedro 3:3, 13) Busa nagkinahanglan kitag makapalig-ong pagpakig-uban sa mga isigkamagtutuo, ug sila nagkinahanglan usab kanato.—Basaha ang Hebreohanon 10:24, 25.

 Ang pagpakig-uban sa mga tawo nga nahigugma sa Diyos makatabang kanato nga masuod sa Diyos. Ang mga tigom sa mga Saksi ni Jehova naghatag ug maayong kahigayonan nga mapalig-on kita sa pagtuo sa uban.—Basaha ang Roma 1:11, 12.

4. Sa unsang paagi masuod ka sa Diyos?

Masuod ka kang Jehova pinaagi sa pagpamalandong sa imong nakat-onan gikan sa iyang Pulong. Palandonga ang iyang mga buhat, tambag, ug mga saad. Pinaagi sa pag-ampo ug pagpamalandong, mapabilhan nato ang gugma ug kaalam sa Diyos.—Basaha ang Josue 1:8; Salmo 1:1-3.

Masuod ka lamang sa Diyos kon ikaw mosalig ug magbatog pagtuo kaniya. Apan ang pagtuo nahisamag buhing butang nga kinahanglang amomahon. Aron buhi kanunay ang imong pagtuo kinahanglan nimo kining amomahon pinaagi sa pagpamalandong sa basehanan sa imong pagtuo.—Basaha ang Mateo 4:4; Hebreohanon 11:1, 6.

5. Unsay mga benepisyo kon makigsuod ka sa Diyos?

Si Jehova nahingawa niadtong nahigugma kaniya. Siya manalipod kanila batok sa bisan unsang butang nga makadaot sa ilang pagtuo ug sa ilang paglaom nga mabuhi sa walay kataposan. (Salmo 91:1, 2, 7-10) Siya nagpasidaan kanato batok sa mga estilo sa pagkinabuhi nga makadaot sa lawas ug makawala sa kalipay. Si Jehova nagtudlo kanato sa kinamaayohang pagkinabuhi.—Basaha ang Salmo 73:27, 28; Santiago 4:4, 8.

 

Pagkat-og Dugang

Nganong Tun-an ang Bibliya?

Ang Bibliya nagtabang sa minilyong tawo sa tibuok kalibotan nga masayran ang tubag sa dagkong pangutana bahin sa kinabuhi. Gusto ba sab nimong masayran kini?

Pakigsuod sa Diyos Pinaagi sa Pag-ampo

Mamati ba ang Diyos sa imong pag-ampo? Aron matubag kana, kinahanglang imong masabtan ang gitudlo sa Bibliya bahin sa pag-ampo.