Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Maayong Balita Gikan sa Diyos!

 LEKSIYON 2

Kinsa ang Diyos?

Kinsa ang Diyos?

1. Nganong angay natong simbahon ang Diyos?

Ang matuod nga Diyos mao ang Maglalalang sa tanang butang. Siya walay sinugdanan ug walay kataposan. (Salmo 90:2) Siya ang Tinubdan sa maayong balita nga anaa sa Bibliya. (1 Timoteo 1:11) Sanglit ang Diyos maoy naghatag kanatog kinabuhi, siya lamang ang angay natong simbahon.—Basaha ang Pinadayag 4:11.

2. Unsang matanga sa persona ang Diyos?

Wala gayoy tawo nga nakakita sa Diyos kay siya Espiritu, nga maoy mas taas nga matang sa kinabuhi kay sa pisikal nga mga linalang sa yuta. (Juan 1:18; 4:24) Hinuon, mailhan ang mga hiyas sa Diyos diha sa iyang mga linalang. Pananglitan, ang nagkadaiyang prutas ug bulak nagpaila sa iyang gugma ug kaalam. Ang dakong uniberso nagpaila sa iyang gahom.—Basaha ang Roma 1:20.

Mas daghan pa kitag makat-onan bahin sa personalidad sa Diyos pinaagi sa pagbasa sa Bibliya. Pananglitan, kini naghisgot kon unsay iyang gusto ug dili gusto, kon unsay iyang tinagdan sa mga tawo, ug kon unsay iyang reaksiyon sa lainlaing kahimtang.—Basaha ang Salmo 103:7-10.

3. Duna bay ngalan ang Diyos?

Si Jesus miingon: “Amahan namo nga anaa sa mga langit, pagabalaanon unta ang imong ngalan.” (Mateo 6:9) Bisag ang Diyos daghag titulo, usa ray iyang ngalan. Sa matag pinulongan, lahi ang paglitok niini. Sa Cebuano, kini sagad gilitok nga “Jehova.” Apan ang uban naglitok niini nga “Yahweh.”—Basaha ang Salmo 83:18.

Ang ngalan sa Diyos gitangtang gikan sa daghang Bibliya ug gipulihan sa titulong Ginoo o Diyos. Apan sa dihang gisulat ang Bibliya, ang ngalan sa Diyos makitag mga 7,000 ka beses.  Si Jesus nagpaila sa ngalan sa Diyos sa dihang nagtudlo siya sa mga tawo bahin sa Diyos.—Basaha ang Juan 17:26.

4. Nahingawa ba si Jehova kanato?

Sama niining mahigugmaong amahan, ang Diyos may ginabuhat alang sa atong dumalayong kaayohan

Ang kaylap nga pag-antos nagpasabot ba nga si Jehova nga Diyos walay kahingawa kanato? Ang uban nag-ingon nga iya kitang gipaantos aron sulayan kita, apan dili kana tinuod.—Basaha ang Santiago 1:13.

Gihatagan kita sa Diyos ug kagawasan sa pagpili, nga nagpakita nga iya kitang gipabilhan. Dili ba kita mapasalamaton kay makapili ta sa pag-alagad sa Diyos? (Josue 24:15) Apan daghan ang mipili sa pagbuhat ug daotan ngadto sa uban, busa daghan ang nag-antos. Maguol si Jehova nga makakita sa maong inhustisya.—Basaha ang Genesis 6:5, 6.

Si Jehova nga Diyos nahingawa kanato. Gusto niya nga magmalipayon kita. Hapit na niyang hanawon ang pag-antos ug kadtong nagpahinabo niana. Hinuon, siya may katarongan sa pagtugot sa pag-antos sa limitadong panahon. Sa Leksiyon 8, atong masayran ang maong katarongan.—Basaha ang 2 Pedro 2:9; 3:7, 13.

5. Sa unsang paagi kita mas masuod sa Diyos?

Si Jehova nagdapit kanato nga makigsuod kaniya pinaagi sa pag-ampo. Siya interesado sa matag usa kanato. (Salmo 65:2; 145:18) Andam siyang mopasaylo. Iyang makita ang atong paningkamot nga pahimut-an siya, bisag mapakyas kita usahay. Busa bisag dili hingpit, makabaton kitag suod nga relasyon sa Diyos.—Basaha ang Salmo 103:12-14; Santiago 4:8.

Sanglit si Jehova ang naghatag kanatog kinabuhi, angay nga mas dako ang atong gugma kaniya kay sa atong gugma sa uban. (Marcos 12:30) Pinaagi sa pagkat-og dugang bahin kaniya ug pagtuman sa iyang mga sugo ingong pagpahayag sa imong gugma, mas masuod ka kaniya.—Basaha ang 1 Timoteo 2:4; 1 Juan 5:3.

Pagkat-og Dugang

MAAYONG BALITA GIKAN SA DIYOS!

Duna bay Ngalan ang Diyos?

Ang Diyos daghag titulo, sama sa Labing Gamhanan, Maglalalang, ug Ginoo. Apan ang ngalan sa Diyos makita kapig 7,000 ka beses diha sa Bibliya.